ଯୁବ କ୍ରିକେଟ୍‌ର ରୋମାଞ୍ଚକର ପ୍ରତିଯୋଗିତା ପୁରୁଷ ଅଣ୍ଡର-୧୯ ଏସିଆ କପ୍ ୨୦୨୬ ନଭେମ୍ବର ୫ରୁ ଓମାନରେ ଆରମ୍ଭ ହେବ। ଏସୀୟ କ୍ରିକେଟ୍ ପରିଷଦ (ACC) ପକ୍ଷରୁ ଟୁର୍ଣ୍ଣାମେଣ୍ଟର କାର୍ଯ୍ୟସୂଚୀ ଘୋଷଣା କରାଯାଇଛି। ନଭେମ୍ବର ୧୪ରେ ଫାଇନାଲ୍ ମ୍ୟାଚ୍ ଖେଳାଯିବ। ଏଥର ୮ଟି ଦଳ ଟ୍ରଫି ପାଇଁ ଲଢ଼ିବେ।

ନଭେମ୍ବର ୮ରେ ଭାରତ–ପାକିସ୍ତାନ ମୁକାବିଲା

କ୍ରିକେଟ୍‌ପ୍ରେମୀଙ୍କ ନଜର ନଭେମ୍ବର ୮ ତାରିଖ ଉପରେ ରହିବ। ସେହି ଦିନ ଭାରତୀୟ ଅଣ୍ଡର-୧୯ ଦଳ ପାକିସ୍ତାନକୁ ଭେଟିବ। ଉଭୟ ଦଳ ଗ୍ରୁପ୍‌-ଏ’ରେ ରହିଛନ୍ତି। ଏହି ମ୍ୟାଚ୍‌ରେ ଯୁବ ଖେଳାଳିଙ୍କ ପ୍ରଦର୍ଶନ ଉପରେ କ୍ରିକେଟ୍‌ପ୍ରେମୀଙ୍କ ବିଶେଷ ନଜର ରହିବ।

ଭାରତର ମ୍ୟାଚ୍ ସୂଚୀ

• ନଭେମ୍ବର ୬: ଭାରତ ବନାମ ନେପାଳ

• ନଭେମ୍ବର ୮: ଭାରତ ବନାମ ପାକିସ୍ତାନ

• ନଭେମ୍ବର ୧୦: ଭାରତ ବନାମ ୟୁଏଇ

ଭାରତ ସହ ପାକିସ୍ତାନ, ନେପାଳ ଓ ସଂଯୁକ୍ତ ଆରବ ଏମିରେଟ୍ସ ଗ୍ରୁପ୍‌-ଏ’ରେ ରହିଛନ୍ତି। ଗ୍ରୁପ୍‌-ବି’ରେ ବାଂଲାଦେଶ, ଶ୍ରୀଲଙ୍କା, ଆଫଗାନିସ୍ତାନ ଓ ମାଲେସିଆ ସ୍ଥାନ ପାଇଛନ୍ତି।

ନଭେମ୍ବର ୧୨ରେ ସେମିଫାଇନାଲ୍, ୧୪ରେ ଫାଇନାଲ୍

ଦୁଇଟି ଗ୍ରୁପ୍‌ର ଶ୍ରେଷ୍ଠ ଦୁଇଟି ଦଳ ସେମିଫାଇନାଲ୍‌କୁ ଯୋଗ୍ୟତା ହାସଲ କରିବେ। ନଭେମ୍ବର ୧୨ରେ ଉଭୟ ସେମିଫାଇନାଲ୍ ଏବଂ ନଭେମ୍ବର ୧୪ରେ ଫାଇନାଲ୍ ଖେଳାଯିବ। ସମସ୍ତ ମ୍ୟାଚ୍ ଓମାନର ଅଲ୍‌ ଆମେରାଟ୍‌ କ୍ରିକେଟ୍ ଗ୍ରାଉଣ୍ଡରେ ଆୟୋଜିତ ହେବ।

ଭାରତ ଏହି ପ୍ରତିଯୋଗିତାରେ ନିଜର ଅଭିଜ୍ଞତା ଓ ପୂର୍ବ ସଫଳତାକୁ ଆଧାର କରି ଭଲ ପ୍ରଦର୍ଶନ କରିବା ଲକ୍ଷ୍ୟରେ ରହିବ। ତେବେ ଟ୍ରଫି ଜିତିବା ପାଇଁ ଦଳକୁ ଗ୍ରୁପ୍ ପର୍ଯ୍ୟାୟରେ ଭଲ ଖେଳି ସେମିଫାଇନାଲ୍‌ରେ ସ୍ଥାନ ପକ୍କା କରିବାକୁ ପଡ଼ିବ।