ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବୁଧବାର ଇରାନ ସହ ସମ୍ପର୍କକୁ ନେଇ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ, ଇରାନ ସହ ହୋଇଥିବା ମଧ୍ୟବର୍ତ୍ତୀକାଳୀନ ଅସ୍ତ୍ରବିରତି ତାଙ୍କ ଦୃଷ୍ଟିରେ ଶେଷ ହୋଇଯାଇଛି ଏବଂ ସେ ଆଉ ଇରାନ ସହ କୌଣସି ଡିଲ୍ କରିବାକୁ ଚାହୁଁନାହାନ୍ତି।

ଅସ୍ତ୍ରବିରତିର ସ୍ଥିତି ସମ୍ପର୍କରେ ପଚରାଯିବାରୁ ଟ୍ରମ୍ପ କହିଥିଲେ,"ମୋ ଦୃଷ୍ଟିକୋଣରୁ ଏହା ଶେଷ ହୋଇଛି। ସେମାନଙ୍କ ସହ କଥାବାର୍ତ୍ତା କରିବା କେବଳ ସମୟର ଅପଚୟ।"

ତୁର୍କିର ଅଙ୍କାରାରେ ଆୟୋଜିତ ଦୁଇ ଦିନିଆ ନାଟୋ ଶିଖର ସମ୍ମିଳନୀ ସମୟରେ ଟ୍ରମ୍ପ ଏହି ପ୍ରତିକ୍ରିୟା ଦେଇଥିଲେ। ହର୍ମୁଜ୍ ପ୍ରଣାଳୀରେ ଟ୍ୟାଙ୍କର ଉପରେ ହୋଇଥିବା ଆକ୍ରମଣ ପରେ ଆମେରିକା ପକ୍ଷରୁ ଇରାନ ବିରୋଧରେ କରାଯାଇଥିବା ସାମରିକ କାର୍ଯ୍ୟାନୁଷ୍ଠାନର କିଛି ସମୟ ପରେ ଏହି ବୟାନ ସାମ୍ନାକୁ ଆସିଛି।

ଟ୍ରମ୍ପ କହିଛନ୍ତି ଯେ, ଆମେରିକୀୟ ପ୍ରତିନିଧିମାନେ ଇରାନ ସହ ଆଲୋଚନା ଜାରି ରଖିପାରନ୍ତି, କିନ୍ତୁ ସେ ଏହି ଆଲୋଚନାରୁ କୌଣସି ସକାରାତ୍ମକ ଫଳାଫଳ ଆସିବ ବୋଲି ବିଶ୍ୱାସ କରୁନାହାନ୍ତି।

ସେ ଆହୁରି କହିଥିଲେ,"ସେମାନେ କଥାବାର୍ତ୍ତା କରିପାରିବେ, କିନ୍ତୁ ମୋ ମତରେ ସେମାନେ ନିଜ ସମୟ ନଷ୍ଟ କରୁଛନ୍ତି।"ଟ୍ରମ୍ପ ଇରାନର ନେତୃତ୍ୱକୁ ନେଇ ମଧ୍ୟ କଟାକ୍ଷ କରି ସେମାନଙ୍କ ମାନସିକତା ଉପରେ ପ୍ରଶ୍ନ ଉଠାଇଥିଲେ।

ଟ୍ରମ୍ପଙ୍କ ଏହି ବୟାନ ପରେ ଆମେରିକା-ଇରାନ ସମ୍ପର୍କ ପୁଣିଥରେ ଚର୍ଚ୍ଚାର କେନ୍ଦ୍ରବିନ୍ଦୁକୁ ଆସିଛି। ଆଗାମୀ ଦିନରେ ଦୁଇ ଦେଶ ମଧ୍ୟରେ କୂଟନୈତିକ ଆଲୋଚନା କେଉଁ ଦିଗକୁ ଯିବ, ତାହା ଉପରେ ସମସ୍ତଙ୍କ ନଜର ରହିଛି।