ୱାଶିଂଟନ୍: ଆମେରିକାରେ ଡାଟା ସେଣ୍ଟରର ଦ୍ରୁତ ବିସ୍ତାର ମଧ୍ୟରେ ବିଦ୍ୟୁତ ଚାହିଦା ଏବଂ ସ୍ଥାନୀୟ ସମୁଦାୟ ଉପରେ ଏହାର ପ୍ରଭାବକୁ ନେଇ ନୂଆ ମତ ରଖିଛନ୍ତି ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ।

ଟ୍ରମ୍ପ କହିଛନ୍ତି ଯେ, ନୂଆ ଏବଂ ବଡ଼ ଡାଟା ସେଣ୍ଟର—ବିଶେଷକରି ବିଶାଳ ଆକାରର ଡାଟା ସେଣ୍ଟର—ନିଜ ଆବଶ୍ୟକତା ପାଇଁ ନିଜେ ବିଦ୍ୟୁତ ଉତ୍ପାଦନ କରିବା ଉଚିତ। ଏହି ବ୍ୟବସ୍ଥା ଦ୍ୱାରା ଡାଟା ସେଣ୍ଟରଗୁଡ଼ିକ ସ୍ଥାନୀୟ ବିଦ୍ୟୁତ ବ୍ୟବସ୍ଥା ଉପରେ ଅତିରିକ୍ତ ଚାପ ପକାଇବାରୁ ବଞ୍ଚିପାରିବେ ବୋଲି ତାଙ୍କ ମତ।

ଟ୍ରମ୍ପ ତାଙ୍କ ସୋସିଆଲ୍ ମିଡିଆ ପ୍ଲାଟଫର୍ମ Truth Socialରେ ଏନେଇ ମତ ରଖିଛନ୍ତି। ତାଙ୍କ କହିବା ଅନୁଯାୟୀ, ଡାଟା ସେଣ୍ଟର ନିଜେ ଉତ୍ପାଦନ କରୁଥିବା ବିଦ୍ୟୁତର ଆବଶ୍ୟକତାରୁ ଅଧିକ ଅଂଶ ଥିଲେ ତାହାକୁ ସ୍ଥାନୀୟ ସମୁଦାୟ କିମ୍ବା ବିଦ୍ୟୁତ ଗ୍ରିଡ୍‌କୁ ଯୋଗାଇବା ବା ବିକ୍ରି କରିବା ଉଚିତ। ଏହା ହେଲେ ବିଦ୍ୟୁତ ମୂଲ୍ୟ ବୃଦ୍ଧିର ଆଶଙ୍କା କମିବା ସହ ଭବିଷ୍ୟତରେ ମୂଲ୍ୟ କମିବାର ସମ୍ଭାବନା ମଧ୍ୟ ରହିପାରେ ବୋଲି ସେ ଦାବି କରିଛନ୍ତି।

ଡାଟା ସେଣ୍ଟର ପାଇଁ ବିପୁଳ ପରିମାଣର ବିଦ୍ୟୁତ ଆବଶ୍ୟକ ହୁଏ। ବିଶେଷକରି କୃତ୍ରିମ ବୁଦ୍ଧିମତ୍ତା (AI), କ୍ଲାଉଡ୍ କମ୍ପ୍ୟୁଟିଂ ଏବଂ ବଡ଼ ପରିମାଣର ଡିଜିଟାଲ୍ ସେବା ବଢ଼ିବା ସହ ଡାଟା ସେଣ୍ଟରର ବିଦ୍ୟୁତ ଚାହିଦା ମଧ୍ୟ ବୃଦ୍ଧି ପାଉଛି।

ଏହା ସହ ଡାଟା ସେଣ୍ଟର ନିର୍ମାଣ ହେଉଥିବା ସ୍ଥାନୀୟ ଅଞ୍ଚଳର ଲୋକମାନଙ୍କୁ ମଧ୍ୟ ଆର୍ଥିକ ଲାଭ ମିଳିବା ଉଚିତ ବୋଲି ଟ୍ରମ୍ପ ମତ ଦେଇଛନ୍ତି। ଯଦି କମ୍ପାନୀଗୁଡ଼ିକ ନିଜ ଡାଟା ସେଣ୍ଟରକୁ ସ୍ଥାନୀୟ ଲୋକଙ୍କ ମଧ୍ୟରେ ଅଧିକ ଗ୍ରହଣଯୋଗ୍ୟ କରିବାକୁ ଚାହାନ୍ତି, ତେବେ ସମୁଦାୟ କିମ୍ବା ସେଠାକାର ବ୍ୟକ୍ତିମାନଙ୍କୁ ଆର୍ଥିକ ଲାଭ ଦେବା ଭଳି ବ୍ୟବସ୍ଥା କରିବା ଉଚିତ ବୋଲି ସେ କହିଛନ୍ତି।

ଟ୍ରମ୍ପ ଏହି ଆର୍ଥିକ ଲାଭକୁ ‘କମ୍ୟୁନିଟି ଡିଭିଡେଣ୍ଡ’ ବା ସମୁଦାୟ ଡିଭିଡେଣ୍ଡ ଭାବେ ଉଲ୍ଲେଖ କରିଛନ୍ତି। ତାଙ୍କ ମତରେ, ଡାଟା ସେଣ୍ଟର ନିର୍ମାଣରୁ ସ୍ଥାନୀୟ ଅଞ୍ଚଳକୁ ଯଦି ସିଧାସଳଖ ଆର୍ଥିକ ଲାଭ ମିଳେ, ତେବେ ଏଭଳି ବୃହତ୍ ପ୍ରକଳ୍ପ ପ୍ରତି ଲୋକଙ୍କ ସମର୍ଥନ ବଢ଼ିପାରେ।

ବୃହତ୍ ଡାଟା ସେଣ୍ଟର ପାଇଁ ବିଦ୍ୟୁତ ଯୋଗାଣ, ଭିତ୍ତିଭୂମି ଉପରେ ଚାପ ଏବଂ ସ୍ଥାନୀୟ ଲୋକଙ୍କ ଉପରେ ପ୍ରଭାବ ନେଇ ଆମେରିକାରେ ଚର୍ଚ୍ଚା ବଢ଼ୁଥିବା ସମୟରେ ଟ୍ରମ୍ପଙ୍କ ଏହି ମତ ସାମ୍ନାକୁ ଆସିଛି।