ଓମାନ ଉପକୂଳ ନିକଟ ହର୍ମୁଜ୍ ସମୁଦ୍ର ସଙ୍କୁଳ ଅଞ୍ଚଳରେ ଘଟିଥିବା ଏକ ଜାହାଜ ଆକ୍ରମଣ ଘଟଣା ଆନ୍ତର୍ଜାତିକ ସ୍ତରରେ ଚିନ୍ତା ବଢ଼ାଇଛି। ଏହି ଆକ୍ରମଣ ପରେ ୩ ଜଣ ଭାରତୀୟ ନାଗରିକ ନିଖୋଜ ହୋଇଥିବା ବେଳେ ୨୧ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି।

ସୂଚନା ଅନୁସାରେ, ‘ଏମଟି ମାରିଭେକ୍ସ’ ନାମକ ଜାହାଜଟି ହର୍ମୁଜ୍ ସମୁଦ୍ର ସଙ୍କୁଳ ଦେଇ ଯାତ୍ରା କରୁଥିବା ବେଳେ ଆକ୍ରମଣର ଶିକାର ହୋଇଥିଲା। ଆକ୍ରମଣ ପରେ ଜାହାଜରେ ଅଗ୍ନିକାଣ୍ଡ ଘଟିଥିଲା ଏବଂ ଜାହାଜରୁ ଘନ ଧୂଆଁ ବାହାରୁଥିବା ଦେଖାଯାଇଥିଲା।

ଘଟଣା ପରେ ଜାହାଜ ପକ୍ଷରୁ ତୁରନ୍ତ ସହାୟତା ପାଇଁ ଜରୁରୀ ସଙ୍କେତ ପଠାଯାଇଥିଲା। ଏହା ପାଇବା ପରେ ମୁମ୍ବାଇସ୍ଥିତ ଭାରତୀୟ ନୌସେନାର ମାରିଟାଇମ୍ ରେସ୍କ୍ୟୁ କୋ-ଅର୍ଡିନେସନ୍ ସେଣ୍ଟର (MRCC) ତୁରନ୍ତ ଉଦ୍ଧାର ଅଭିଯାନ ଆରମ୍ଭ କରିଥିଲା।

ଉଦ୍ଧାର ଅଭିଯାନରେ ହେଲିକପ୍ଟର ବ୍ୟବହାର କରାଯାଇ ଜାହାଜରେ ଫସି ରହିଥିବା ଅନେକ ଲୋକଙ୍କୁ ସୁରକ୍ଷିତ ଭାବେ ବାହାର କରାଯାଇଥିଲା। ତଥାପି ୩ ଜଣ ଭାରତୀୟଙ୍କ ଏପର୍ଯ୍ୟନ୍ତ କୌଣସି ସନ୍ଧାନ ମିଳିନଥିବାରୁ ଚିନ୍ତା ବଢ଼ିଛି।

ଭାରତ ସରକାର ଏହି ଆକ୍ରମଣକୁ କଡ଼ା ଭାବେ ନିନ୍ଦା କରିଛନ୍ତି। ଓମାନରେ ଥିବା ଭାରତୀୟ ଦୂତାବାସ ନିଖୋଜ ନାଗରିକଙ୍କୁ ଖୋଜିବା ପାଇଁ ସ୍ଥାନୀୟ କର୍ତ୍ତୃପକ୍ଷ ଏବଂ ଉଦ୍ଧାରକାରୀ ସଂସ୍ଥାମାନଙ୍କ ସହ ସମନ୍ୱୟ ରକ୍ଷା କରୁଛି।

ଏହି ଆକ୍ରମଣ ପଛରେ କିଏ ରହିଛି ସେନେଇ ବିଭିନ୍ନ ଅନୁମାନ ଲାଗି ରହିଛି। କିଛି ମହଳରେ ଆମେରିକାର ସମ୍ପୃକ୍ତି ନେଇ ସନ୍ଦେହ ପ୍ରକାଶ ପାଇଥିବା ବେଳେ ଏହା ସମ୍ପର୍କରେ କୂଟନୈତିକ ସ୍ତରରେ ମଧ୍ୟ ଚର୍ଚ୍ଚା ଜୋର ଧରିଛି। ତେବେ ଆକ୍ରମଣର ପ୍ରକୃତ କାରଣ ଓ ଦାୟୀ ବ୍ୟକ୍ତି ବା ସଂଗଠନ ସମ୍ପର୍କରେ ଏପର୍ଯ୍ୟନ୍ତ କୌଣସି ଅଧିକୃତ ସ୍ପଷ୍ଟୀକରଣ ମିଳିନାହିଁ।

ନିଖୋଜ ଭାରତୀୟଙ୍କୁ ଖୋଜିବା ପାଇଁ ସମୁଦ୍ର ଓ ଆକାଶପଥରେ ତଲାସି ଅଭିଯାନ ଜାରି ରହିଥିବା ବେଳେ ଭାରତୀୟ ବିଦେଶ ମନ୍ତ୍ରାଳୟ ପରିସ୍ଥିତି ଉପରେ କଡ଼ା ନଜର ରଖିଛି।