ମହାରାଷ୍ଟ୍ରର ନାସିକ୍ ସ୍ଥିତ ଟିସିଏସ୍ ବିପିଓ ସେଣ୍ଟରରେ ମହିଳାଙ୍କୁ ଯୋଗୁଁ ଯୌନ ନିର୍ଯାତନା ଦିଆଯାଇଥିବା ଅଭିଯୋଗକୁ ନେଇ ଜାତୀୟ ମହିଳା ଆୟୋଗ (ଏନ୍ସିଡବ୍ଲ୍ୟୁ) ସ୍ବତଃ ସଂଜ୍ଞାନ ନେଇଛି। ଏହାକୁ ଗୁରୁତ୍ୱ ଦେଇ ଆୟୋଗ ଏକ ତଥ୍ୟ ଅନୁସନ୍ଧାନ କମିଟି ଗଠନ କରି ଘଟଣାର ତଦନ୍ତ ଆରମ୍ଭ କରିଛି।

ଆୟୋଗ ଜାରି କରିଥିବା ବିବୃତି ଅନୁଯାୟୀ, କମିଟି ନାସିକ୍ରେ ଘଟଣାସ୍ଥଳ ପରିଦର୍ଶନ କରିବା ସହିତ ପୀଡିତା, ସାକ୍ଷୀ ଓ ସମ୍ପୃକ୍ତ ଅଧିକାରୀଙ୍କୁ ପଚାରାଉଚାରା କରିବ। ଜାତୀୟ ମହିଳା ଆୟୋଗ ଆଇନ ୧୯୯୦ ର ଧାରା ୮ ଅନୁଯାୟୀ ଏହି କମିଟି ଗଠନ କରାଯାଇଛି।

ଏହି କମିଟିରେ ବମ୍ବେ ହାଇକୋର୍ଟର ଅବସରପ୍ରାପ୍ତ ବିଚାରପତି ଜଷ୍ଟିସ୍ ସାଧନା ଯାଧବ, ପୂର୍ବତନ ଡିଜିପି ବିକେ ସିହ୍ନା, ସୁପ୍ରିମକୋର୍ଟ ଓକିଲ ମୋନିକା ଆରୋରା ଓ ଏନ୍ସିଡବ୍ଲ୍ୟୁର ବରିଷ୍ଠ ସଂଯୋଜକ ଲୀଳାବତୀ ଅଛନ୍ତି। କମିଟି ୧୦ ଦିନ ମଧ୍ୟରେ ତାଙ୍କ ରିପୋର୍ଟ ଦାଖଲ କରିବ।

ଘଟଣାଟି ୨୦୨୬ ମାର୍ଚ୍ଚ ଶେଷ ସପ୍ତାହରେ ଜଣେ ମହିଳା କର୍ମଚାରୀଙ୍କ ଅଭିଯୋଗ ପରେ ସାମ୍ନାକୁ ଆସିଥିଲା। ଅଭିଯୋଗ ଅନୁଯାୟୀ, ୨୦୨୨ ରୁ ୨୦୨୬ ପର୍ଯ୍ୟନ୍ତ ପ୍ରାୟ ଚାରି ବର୍ଷ ଧରି ଦୁଷ୍କର୍ମ ଓ ଧର୍ମ ପରିବର୍ତ୍ତନ ପାଇଁ ଚାପ ପ୍ରୟୋଗ ହେଉଥିଲା।

ନାସିକ୍ ପୁଲିସ ଏହି ମାମଲାରେ ଏପର୍ଯ୍ୟନ୍ତ ୮ ଜଣଙ୍କୁ ଗିରଫ କରିଛି ଓ ଜଣେ ମହିଳା ଅଭିଯୁକ୍ତ ଏପର୍ଯ୍ୟନ୍ତ ଫେରାର୍ ଅଛନ୍ତି। ତଦନ୍ତ ପାଇଁ ଏକ ବିଶେଷ ତଦନ୍ତ ଦଳ (SIT) ମଧ୍ୟ ଗଠନ କରାଯାଇଛି, ଯେଉଁଥିରେ ୪୦ରୁ ଅଧିକ ସିସିଟିଭି ଫୁଟେଜ୍ ଯାଞ୍ଚ କରାଯାଇଛି।

ଟାଟା ସନ୍ସର ଅଧ୍ୟକ୍ଷ ଏନ୍. ଚନ୍ଦ୍ରଶେଖରନ୍ ମଧ୍ୟ ଆଭ୍ୟନ୍ତରୀଣ ତଦନ୍ତ ଆରମ୍ଭ କରିଛନ୍ତି। କମ୍ପାନୀ ପକ୍ଷରୁ କୁହାଯାଇଛି ଯେ, କୌଣସି ପ୍ରକାରର ଅସଦାଚରଣ ପ୍ରତି ଶୂନ୍ୟ ସହିଷ୍ଣୁତା ନୀତି ଅନୁସରଣ କରାଯିବ।

ଅନ୍ୟପଟେ, ଏହି ମାମଲାର ମୁଖ୍ୟ ଅଭିଯୁକ୍ତ ଭାବେ ଚର୍ଚ୍ଚିତ ନିଦା ଖାନ୍ ଏପର୍ଯ୍ୟନ୍ତ ଫେରାର୍ ଅଛନ୍ତି। ସେ ମୁମ୍ବାଇରେ ଥିବା ନେଇ ସୂଚନା ମିଳୁଛି। ସେ ଏଚଆର୍ ବିଭାଗର ଅଂଶ ନୁହେଁ ବୋଲି ତାଙ୍କ ପରିବାର ପକ୍ଷରୁ ସପ୍ଷଟ କରାଯାଇଛି।