ଓଡ଼ିଶା ପାଇଁ ଗର୍ବ ଓ ଗୌରବର ମୁହୂର୍ତ୍ତ। ଅନ୍ତର୍ଜାତୀୟ ବ୍ୟାଡମିଣ୍ଟନ ମଞ୍ଚରେ ପୁଣି ଚମକିଛନ୍ତି ଓଡ଼ିଆ ଝିଅ। ମାତ୍ର ୧୫ ବର୍ଷ ବୟସରେ ତନ୍ୱୀ ପତ୍ରୀ ୟୁଥ୍ ଅଲିମ୍ପିକ୍ସ ବ୍ୟାଡମିଣ୍ଟନ ଫାଇନାଲ୍ରେ ପହଞ୍ଚି ଇତିହାସ ରଚିଛନ୍ତି। ଏହି ପ୍ରତିଯୋଗିତାର ମହିଳା ସିଙ୍ଗଲ୍ସ ଫାଇନାଲ୍ରେ ପହଞ୍ଚିବାରେ ସେ ପ୍ରଥମ ଭାରତୀୟ ମହିଳା ଖେଳାଳି ହୋଇଛନ୍ତି ।

ବୁଧବାର ଖେଳାଯାଇଥିବା ରୋମାଞ୍ଚକର ସେମିଫାଇନାଲ୍ରେ ତନ୍ୱୀ ଜାପାନର ଶକ୍ତିଶାଳୀ ଖେଳାଳି ୟୁଜୁନୋ ୱାତାନାବେଙ୍କୁ ୨୧-୧୪, ୧୧-୨୧, ୨୧-୧୯ରେ ପରାସ୍ତ କରିଛନ୍ତି। ଏହି ମ୍ୟାଚ୍ ପ୍ରାୟ ୫୪ ମିନିଟ୍ ଧରି ଚାଲିଥିଲା ।

ସଂଘର୍ଷପୂର୍ଣ୍ଣ ମ୍ୟାଚ୍ରେ ତନ୍ୱୀଙ୍କ ଦମ୍ଦାର ବିଜୟ

ମ୍ୟାଚ୍ର ପ୍ରଥମ ଗେମ୍ରୁ ହିଁ ତନ୍ୱୀ ଆକ୍ରମଣାତ୍ମକ ଖେଳ ପ୍ରଦର୍ଶନ କରିଥିଲେ। ନିଜର ଚମତ୍କାର ସ୍ମାଶ୍ ଓ କ୍ରସ୍ କୋର୍ଟ ସଟ୍ରେ ଜାପାନୀ ଖେଳାଳିଙ୍କୁ ଚାପରେ ରଖି ପ୍ରଥମ ଗେମ୍କୁ ୨୧-୧୪ରେ ଜିତି ନେଇଥିଲେ।

ତେବେ ଦ୍ୱିତୀୟ ଗେମ୍ରେ ୱାତାନାବେ ଜୋରଦାର ପ୍ରତ୍ୟାବର୍ତ୍ତନ କରିଥିଲେ। ଭାରତୀୟ ଖେଳାଳିଙ୍କୁ ଚାପରେ ରଖି ୨୧-୧୧ରେ ଗେମ୍ ଜିତି ମ୍ୟାଚ୍କୁ ୧-୧ ସ୍ଥିତିକୁ ନେଇଆସିଥିଲେ ।

ନିର୍ଣ୍ଣାୟକ ତୃତୀୟ ଗେମ୍ରେ ଉଭୟ ଖେଳାଳିଙ୍କ ମଧ୍ୟରେ କଡ଼ା ଟକ୍କର ହୋଇଥିଲା। ଚାପପୂର୍ଣ୍ଣ ସମୟରେ ମଧ୍ୟ ତନ୍ୱୀ ନିଜର ଧୈର୍ଯ୍ୟ ହରାଇନଥିଲେ। ଶେଷରେ ୨୧-୧୯ରେ ଗେମ୍ ଜିତି ଫାଇନାଲ୍ରେ ନିଜ ସ୍ଥାନ ପକ୍କା କରିଥିଲେ ।

ୟୁଥ୍ ଅଲିମ୍ପିକ୍ସରେ ନୂଆ ଇତିହାସ

ତନ୍ୱୀଙ୍କ ଏହି ସଫଳତା ଭାରତୀୟ ବ୍ୟାଡମିଣ୍ଟନ ଇତିହାସରେ ଏକ ବଡ଼ ମାଇଲଖୁଣ୍ଟ। ତାଙ୍କ ପୂର୍ବରୁ ଏଚ୍.ଏସ୍. ପ୍ରଣୟ, ଲକ୍ଷ୍ୟ ସେନ୍ ଓ ଆଦିତ୍ୟ ଯୋଶୀ ୟୁଥ୍ ଅଲିମ୍ପିକ୍ସ ବ୍ୟାଡମିଣ୍ଟନରେ ସେମିଫାଇନାଲ୍ରେ ପହଞ୍ଚିଥିଲେ ।

୨୦୧୦ରେ ଏଚ୍.ଏସ୍. ପ୍ରଣୟ ରୌପ୍ୟ ପଦକ ଜିତିଥିବା ବେଳେ ୨୦୧୮ରେ ଲକ୍ଷ୍ୟ ସେନ୍ ମଧ୍ୟ ରୌପ୍ୟ ପଦକ ହାସଲ କରିଥିଲେ। ଏବେ ତନ୍ୱୀଙ୍କ ସଫଳତା ଭାରତୀୟ ମହିଳା ବ୍ୟାଡମିଣ୍ଟନ ପାଇଁ ଏକ ନୂଆ ଅଧ୍ୟାୟ ଯୋଡ଼ିଛି ।

ଫାଇନାଲ୍ରେ ପହଞ୍ଚିବା ସହ ତନ୍ୱୀ ଅନ୍ତତଃ ରୌପ୍ୟ ପଦକ ନିଶ୍ଚିତ କରିଛନ୍ତି। ଏବେ ତାଙ୍କ ଆଗରେ ରହିଛି ସ୍ୱର୍ଣ୍ଣ ପଦକ ଜିତିବାର ସୁଯୋଗ ।

ଏବେ ସ୍ୱର୍ଣ୍ଣ ପଦକ ଉପରେ ନଜର

ଫାଇନାଲ୍ରେ ତନ୍ୱୀଙ୍କ ମୁକାବିଲା ଚୀନ୍ର ୱାଙ୍ଗ୍ ୟି ଜିନ୍ (Yi Xin Zhang)ଙ୍କ ସହ ହେବ। ସେ ଚଳିତ ବର୍ଷର ବିଶ୍ୱ ଜୁନିୟର ଚାମ୍ପିୟନ୍। ଉଭୟଙ୍କ ମଧ୍ୟରେ ପୂର୍ବରୁ ଏସିଆ ଜୁନିୟର ଚାମ୍ପିୟନସିପ୍ରେ ମୁକାବିଲା ହୋଇଥିଲା, ଯେଉଁଥିରେ ତନ୍ୱୀ ପରାସ୍ତ ହୋଇଥିଲେ ।

ତେବେ ଏଥର ଫାଇନାଲ୍ରେ ତନ୍ୱୀଙ୍କ ପାଖରେ ଇତିହାସ ରଚିବାର ବଡ଼ ସୁଯୋଗ ରହିଛି। ସମଗ୍ର ଓଡ଼ିଶା ଓ ଦେଶର କ୍ରୀଡ଼ାପ୍ରେମୀଙ୍କ ନଜର ଏବେ ଏହି ଯୁବ ପ୍ରତିଭାଙ୍କ ଉପରେ ରହିଛି ।

ଓଡ଼ିଶାର ଏହି ଝିଅ ଆଗାମୀ ଦିନରେ ଭାରତୀୟ ବ୍ୟାଡମିଣ୍ଟନକୁ ଆହୁରି ଗୌରବାନ୍ୱିତ କରିବେ ବୋଲି ଆଶା କରାଯାଉଛି ।