ତାମିଲନାଡୁର କଲ୍ଲାକୁରିଚି ଜିଲ୍ଲାର ଜଣେ ମହିଳା କୁଏତ୍ରୁ ଏକ SOS ଭିଡିଓ ଜାରି କରି ସହାୟତା ମାଗିଛନ୍ତି। ଘରୋଇ କାମ ପାଇଁ କିଛି ମାସ ପୂର୍ବରୁ କୁଏତ୍ ଯାଇଥିବା ଅନିଥା ନାମକ ଏହି ମହିଳା ତାଙ୍କୁ ଗୁରୁତର ନିର୍ଯାତନା ଓ ଦୁର୍ବ୍ୟବହାର କରାଯାଉଥିବା ଅଭିଯୋଗ କରିଛନ୍ତି।

ଭିଡିଓରେ ଅନିଥା କହିଛନ୍ତି ଯେ କୁଏତ୍ରେ ପହଞ୍ଚିବାର ୩ ମାସ ହୋଇଛି। କିନ୍ତୁ ଗତ ଦୁଇ ମାସ ଧରି ସେ ଅତ୍ୟନ୍ତ ନିର୍ଯାତନାର ଶିକାର ହେଉଥିବା ଅଭିଯୋଗ କରିଛନ୍ତି। ଏପରିକି ୫୦ ଦିନରୁ ଅଧିକ ସମୟ ଧରି ତାଙ୍କୁ ଠିକ୍ ଭାବେ ଖାଦ୍ୟ ମିଳିନଥିବା ସେ କହିଛନ୍ତି।

ଦୁଇ ମାସର ଦରମା ମଧ୍ୟ ତାଙ୍କୁ ଦିଆଯାଇନଥିବା ଅନିଥା ଅଭିଯୋଗ କରିଛନ୍ତି। ନିଜ ଜୀବନ ପ୍ରତି ଭୟ ଥିବା ଦର୍ଶାଇ ସେ କଲ୍ଲାକୁରିଚି ଜିଲ୍ଲାପାଳ ଓ ଏସ୍ପିଙ୍କୁ ହସ୍ତକ୍ଷେପ କରି ତାଙ୍କୁ ଉଦ୍ଧାର କରି ଭାରତକୁ ଫେରାଇ ଆଣିବାକୁ ଅନୁରୋଧ କରିଛନ୍ତି।

ଅନିଥା କହିଛନ୍ତି,“ସେମାନେ ମୋତେ ନିର୍ଯାତନା ଦେଉଛନ୍ତି ଏବଂ ଅତ୍ୟନ୍ତ ନିଷ୍ଠୁର ଭାବେ ବ୍ୟବହାର କରୁଛନ୍ତି। ଦୟାକରି ମୋତେ ଜୀବିତ ଉଦ୍ଧାର କରି ମୋ ଦେଶକୁ ଫେରାଇ ଆଣନ୍ତୁ।”

ସେ ଆହୁରି ଅଭିଯୋଗ କରିଛନ୍ତି ଯେ, ଦୁଇ ମାସର ଦରମା ନଦେଇ ତାଙ୍କ ସହ ଖରାପ ବ୍ୟବହାର କରାଯାଉଛି। ତାଙ୍କୁ ମାରିଦେବାର ଭୟ ଥିବା ନେଇ ମଧ୍ୟ ସେ ଭିଡିଓରେ ଆଶଙ୍କା ପ୍ରକାଶ କରିଛନ୍ତି।

ଅନିଥାଙ୍କ ମା’ ଅନିଲା ମଧ୍ୟ ଝିଅକୁ ଶୀଘ୍ର ଉଦ୍ଧାର କରି ଭାରତ ଫେରାଇ ଆଣିବାକୁ କର୍ତ୍ତୃପକ୍ଷଙ୍କୁ ଅନୁରୋଧ କରିଛନ୍ତି। ଜଣେ ଏଜେଣ୍ଟଙ୍କ ଦ୍ୱାରା ତାଙ୍କ ପରିବାର ଠକାମିର ଶିକାର ହୋଇଥିବା ଏବଂ ଝିଅଙ୍କୁ ଅତ୍ୟନ୍ତ ନିଷ୍ଠୁର ଭାବେ ନିର୍ଯାତନା ଦିଆଯାଉଥିବା ସେ ଅଭିଯୋଗ କରିଛନ୍ତି।

ଘଟଣାକୁ ନେଇ ଅଧିକାରୀମାନେ ହସ୍ତକ୍ଷେପ କରି ଅନିଥାଙ୍କୁ ସୁରକ୍ଷିତ ଭାବେ ଭାରତ ଫେରାଇ ଆଣିବାକୁ ପରିବାର ପକ୍ଷରୁ ଦାବି କରାଯାଇଛି।