ଭୁବନେଶ୍ୱର: ବନ୍ୟା ପରିସ୍ଥିତି ଯୋଗୁଁ OPSC ଓଡ଼ିଶା ସିଭିଲ୍ ସର୍ଭିସେସ୍ (OCS) ମୁଖ୍ୟ ଲିଖିତ ପରୀକ୍ଷା ଘୁଞ୍ଚାଇବାକୁ ପରୀକ୍ଷାର୍ଥୀମାନେ ଦାବି କରୁଥିବା ବେଳେ ଏନେଇ ବଡ଼ ବୟାନ ଦେଇଛନ୍ତି ରାଜସ୍ୱ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ। ତାଙ୍କ କହିବା ଅନୁଯାୟୀ, ପରୀକ୍ଷାକୁ ପୁଣି ଘୁଞ୍ଚାଇଲେ ପ୍ରାୟ ୬ ମାସ ପର୍ଯ୍ୟନ୍ତ ବିଳମ୍ବ ହୋଇପାରେ। ତେଣୁ ପରୀକ୍ଷାର୍ଥୀଙ୍କୁ ନିଜ ନିଜ ପରୀକ୍ଷା କେନ୍ଦ୍ରରେ ପହଞ୍ଚାଇବା ପାଇଁ ସରକାର ବ୍ୟବସ୍ଥା କରୁଥିବା ସେ କହିଛନ୍ତି।

ଗଞ୍ଜାମର ୩୨୫ ପରୀକ୍ଷାର୍ଥୀଙ୍କ ପାଇଁ ବ୍ୟବସ୍ଥା

ମନ୍ତ୍ରୀଙ୍କ ସୂଚନା ଅନୁସାରେ, ଗଞ୍ଜାମ ଜିଲ୍ଲାର ପ୍ରାୟ ୩୨୫ ଜଣ ପରୀକ୍ଷାର୍ଥୀ ଥିବା ବେଳେ ଅନ୍ୟ ପ୍ରଭାବିତ ଅଞ୍ଚଳରୁ ପ୍ରାୟ ୧୦୦ ଜଣ ପରୀକ୍ଷାର୍ଥୀ ଅଛନ୍ତି। ବନ୍ୟା ଯୋଗୁଁ ଯାତାୟାତରେ ସମସ୍ୟା ଦେଖାଦେଇଥିବାରୁ ସେମାନଙ୍କୁ ପରୀକ୍ଷା କେନ୍ଦ୍ରରେ ପହଞ୍ଚାଇବା ସରକାରଙ୍କ ଦାୟିତ୍ୱ ବୋଲି ସେ କହିଛନ୍ତି।

BDOମାନଙ୍କୁ ନିର୍ଦ୍ଦେଶ

ପ୍ରଭାବିତ ଅଞ୍ଚଳର ପରୀକ୍ଷାର୍ଥୀମାନେ ଯେପରି ପରୀକ୍ଷା ଦେବାରୁ ବଞ୍ଚିତ ନ ହୁଅନ୍ତି, ସେଥିପାଇଁ ସମ୍ପୃକ୍ତ ବ୍ଲକ୍‌ର ବିଡିଓମାନଙ୍କୁ ପରୀକ୍ଷାର୍ଥୀଙ୍କୁ ସେମାନଙ୍କ ପରୀକ୍ଷା କେନ୍ଦ୍ରକୁ ପହଞ୍ଚାଇବାକୁ ନିର୍ଦ୍ଦେଶ ଦିଆଯାଇଛି। ବନ୍ୟା ଯୋଗୁଁ ଯାତାୟାତ ବାଧାପ୍ରାପ୍ତ ହୋଇଥିବା ପରୀକ୍ଷାର୍ଥୀଙ୍କୁ ସହାୟତା ଯୋଗାଇବା ଉପରେ ସରକାର ଗୁରୁତ୍ୱ ଦେଉଛନ୍ତି।

OPSC ମୁଖ୍ୟ ପରୀକ୍ଷାର ସଂଶୋଧିତ ସୂଚୀ

ବାତ୍ୟା ‘ଅର୍ଣ୍ଣବ’କୁ ଦୃଷ୍ଟିରେ ରଖି OPSC ପୂର୍ବରୁ କିଛି ପରୀକ୍ଷାର ତାରିଖ ପରିବର୍ତ୍ତନ କରିଛି। ଓଡ଼ିଆ ଓ ଇଂରାଜୀ ଭାଷା ପେପର୍ ଅକ୍ଟୋବର ୩୧ରେ ହେବାକୁ ଥିବା ବେଳେ ନିବନ୍ଧ ପେପର୍ ନଭେମ୍ବର ୫କୁ ଘୁଞ୍ଚାଯାଇଛି। ସାଧାରଣ ଅଧ୍ୟୟନ ପେପର୍ ନଭେମ୍ବର ୨ ଓ ୪ରେ ଏବଂ ଇଚ୍ଛାଧୀନ ବିଷୟର ପେପର୍ ନଭେମ୍ବର ୭ରେ ହେବାକୁ ସୂଚୀ ରହିଛି।

ପରୀକ୍ଷାର୍ଥୀମାନେ ଯାତ୍ରା ଓ ପରୀକ୍ଷା କେନ୍ଦ୍ର ସମ୍ପର୍କିତ ନୂଆ ସୂଚନା ପାଇଁ OPSCର ଅଧିକାରିକ ୱେବସାଇଟ୍‌ରେ ପ୍ରକାଶିତ ବିଜ୍ଞପ୍ତି ଯାଞ୍ଚ କରନ୍ତୁ।