ଭୁବନେଶ୍ୱର: ରାଜ୍ୟରେ ଅଗ୍ନି ସୁରକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ କରିବା ଲକ୍ଷ୍ୟରେ ସେପ୍ଟେମ୍ବର ୧୫ରୁ ଆରମ୍ଭ ହୋଇଥିବା ‘ସୁରକ୍ଷିତ ଓଡ଼ିଶା, ବିକଶିତ ଓଡ଼ିଶା’ ମାସବ୍ୟାପୀ ଅଭିଯାନ ଶେଷ ହୋଇଛି। ଏହି ଅଭିଯାନରେ ରାଜ୍ୟର ବିଭିନ୍ନ ହସ୍ପିଟାଲ, ଶିକ୍ଷାନୁଷ୍ଠାନ, ହୋଟେଲ, ବାଣିଜ୍ୟିକ ପ୍ରତିଷ୍ଠାନ ଓ ଶିଳ୍ପାଞ୍ଚଳରେ ଅଗ୍ନି ସୁରକ୍ଷା ବ୍ୟବସ୍ଥା ଯାଞ୍ଚ କରାଯାଇଥିଲା।

ଯାଞ୍ଚ ସମୟରେ ଅଗ୍ନି ସୁରକ୍ଷା ବ୍ୟବସ୍ଥାରେ ତ୍ରୁଟି ଏବଂ ଆବଶ୍ୟକ ଦସ୍ତାବିଜରେ ଅନିୟମିତତା ଚିହ୍ନଟ ହେବା ପରେ ୩,୪୦୪ଟି ପ୍ରତିଷ୍ଠାନକୁ ନୋଟିସ୍ ଜାରି କରାଯାଇଛି। ଏଥିସହ ଅନୁମୋଦିତ ବିଲ୍ଡିଂ ପ୍ଲାନ୍‌ରୁ ବିଚ୍ୟୁତି ଥିବା ପ୍ରାୟ ୨୦୦ଟି ପ୍ରତିଷ୍ଠାନକୁ ପୃଥକ ନୋଟିସ୍ ଦିଆଯାଇଛି।

ଅଗ୍ନି ସୁରକ୍ଷା ସେବାରେ ଡିଜିଟାଲ ପଦକ୍ଷେପ

ଅଗ୍ନି ସୁରକ୍ଷା ସେବାକୁ ଅଧିକ ସ୍ୱଚ୍ଛ ଓ ସହଜ କରିବା ପାଇଁ ବିଭାଗ ପକ୍ଷରୁ କିଛି ଡିଜିଟାଲ ପଦକ୍ଷେପ ମଧ୍ୟ ନିଆଯାଇଛି। ଏକ ମୋବାଇଲ୍ ଆପ୍‌ ମାଧ୍ୟମରେ ହୋଟେଲ, ହସ୍ପିଟାଲ ଓ ବଡ଼ କୋଠାବାଡ଼ି ପାଇଁ ଜାରି ହୋଇଥିବା ଅଗ୍ନି ସୁରକ୍ଷା ପ୍ରମାଣପତ୍ର ଯାଞ୍ଚ କରିହେବ।

ଏହା ସହ ଜରୁରୀକାଳୀନ ଉଦ୍ଧାର କାର୍ଯ୍ୟକୁ ସହଜ କରିବା ପାଇଁ ବିଲ୍ଡିଂଗୁଡ଼ିକର ୩ଡି ମ୍ୟାପିଂ କରାଯାଉଛି। ଏହି ମ୍ୟାପିଂରେ କୋଠାର ପ୍ରବେଶ ଓ ପ୍ରସ୍ଥାନ ପଥ, ଜଳ ଉତ୍ସ ଏବଂ ଅଗ୍ନି ନିର୍ବାପକ ଉପକରଣର ସ୍ଥାନ ଭଳି ତଥ୍ୟ ରହିବ। ଫଳରେ ଅଗ୍ନିକାଣ୍ଡ କିମ୍ବା ଅନ୍ୟ ଜରୁରୀ ପରିସ୍ଥିତିରେ ଉଦ୍ଧାରକାରୀ ଦଳକୁ ଆବଶ୍ୟକ ସୁବିଧା ଓ ରାସ୍ତା ସମ୍ପର୍କରେ ଶୀଘ୍ର ତଥ୍ୟ ମିଳିପାରିବ।

ଭୁବନେଶ୍ୱରରେ ୨୪ ଘଣ୍ଟିଆ କଣ୍ଟ୍ରୋଲ୍ ରୁମ୍

ଅଗ୍ନି ସୁରକ୍ଷା ପ୍ରମାଣପତ୍ର, ଏନ୍‌ଓସି (NOC) କିମ୍ବା ଅନ୍ୟାନ୍ୟ ଆବେଦନ ସମ୍ପର୍କିତ ସମସ୍ୟା ଥିଲେ ନାଗରିକ ଓ ବ୍ୟବସାୟୀମାନେ ହ୍ୱାଟ୍ସଆପ୍‌ ମାଧ୍ୟମରେ ବିଭାଗ ସହ ଯୋଗାଯୋଗ କରିପାରିବେ।

ଏଥିସହ ଭୁବନେଶ୍ୱରସ୍ଥିତ କମାଣ୍ଡ ସେଣ୍ଟରରେ ୨୪ ଘଣ୍ଟିଆ କଣ୍ଟ୍ରୋଲ୍ ରୁମ୍ କାର୍ଯ୍ୟକ୍ଷମ ହୋଇଛି। ଅଗ୍ନି ସୁରକ୍ଷା ସମ୍ପର୍କିତ ସମସ୍ୟାର ସମାଧାନ ଏବଂ ବିଭାଗୀୟ ସେବାକୁ ଅଧିକ ସୁଗମ କରିବାରେ ଏହା ସହାୟକ ହେବ।

ଫାୟାର ସର୍ଭିସେସ୍‌ର ଆଇଜି ଉମାଶଙ୍କର ଦାଶ କହିଛନ୍ତି ଯେ, ୨୦୩୬ ସୁଦ୍ଧା ବିକଶିତ ଓଡ଼ିଶା ଗଠନ ଲକ୍ଷ୍ୟରେ ଅଗ୍ନିଶମ ବିଭାଗର ଭୂମିକା ଗୁରୁତ୍ୱପୂର୍ଣ୍ଣ। ଆଗାମୀ ଦିନରେ ହସ୍ପିଟାଲ, ସହରୀକରଣ ଓ ପରିବହନ ବ୍ୟବସ୍ଥାର ବିସ୍ତାର ହେବା ସହ ଅଗ୍ନି ସୁରକ୍ଷାର ଆବଶ୍ୟକତା ମଧ୍ୟ ବଢ଼ିବ ବୋଲି ସେ କହିଛନ୍ତି।