ଦେଶରେ ବକେୟା ଟ୍ରାଫିକ୍ ଚାଲାଣ ଆଦାୟକୁ ନେଇ ସୁପ୍ରିମକୋର୍ଟ କଡ଼ା ମତ ପ୍ରକାଶ କରିଛନ୍ତି। କେବଳ ହଜାର ହଜାର କିମ୍ବା ଲକ୍ଷାଧିକ e-Challan ଜାରି କରିବା ଯଥେଷ୍ଟ ନୁହେଁ, ଜରିମାନା କିପରି ଆଦାୟ ହେବ ତାହା ମଧ୍ୟ ନିଶ୍ଚିତ କରିବାକୁ ପଡ଼ିବ ବୋଲି କୋର୍ଟ କହିଛନ୍ତି।

ଶୁଣାଣି ସମୟରେ ଜଷ୍ଟିସ୍ ଜେ.ବି. ପାର୍ଦିୱାଲା କହିଥିଲେ ଯେ, ଯଦି ଲୋକେ ଟ୍ରାଫିକ୍ ଚାଲାଣ ଦେଉନାହାନ୍ତି, ତେବେ ଅନ୍ୟ ସରକାରୀ ଦେୟ ସହ ଏହାକୁ ଯୋଡ଼ି ଆଦାୟ କରିବାର ଉପାୟ ଖୋଜାଯାଇପାରେ। ଏହି ପରିପ୍ରେକ୍ଷୀରେ ବକେୟା ଚାଲାଣକୁ ବିଜୁଳି ବିଲ୍‌ ସହ ଯୋଡ଼ିବାର ସମ୍ଭାବନା ନେଇ ସେ ମତ ରଖିଥିଲେ।

ତେବେ ଏହାକୁ ନେଇ ଏକ ଗୁରୁତ୍ୱପୂର୍ଣ୍ଣ କଥା ହେଉଛି—ବିଜୁଳି ବିଲ୍‌ରେ ଚାଲାଣ ଯୋଡ଼ିବାକୁ ସୁପ୍ରିମକୋର୍ଟ କୌଣସି ଚୂଡ଼ାନ୍ତ ନିର୍ଦ୍ଦେଶ ଦେଇନାହାନ୍ତି। ଶୁଣାଣି ସମୟରେ ଏହା ଏକ ସମ୍ଭାବ୍ୟ ଆଦାୟ ପଦ୍ଧତି ଭାବେ ଉଠିଥିଲା।

₹୪୫,୦୦୦ କୋଟିରୁ ଅଧିକ ବକେୟା

କୋର୍ଟଙ୍କୁ ଜଣାଇଯାଇଥିଲା ଯେ, ବିଭିନ୍ନ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ପ୍ରାୟ ₹୪୫,୦୦୦ କୋଟିର e-Challan ବକେୟା ରହିଛି। ଏଥିରୁ ପ୍ରାୟ ₹୨୫,୦୦୦ କୋଟି ଆଦାୟ ହୋଇସାରିଛି ବୋଲି ଶୁଣାଣିରେ ସୂଚନା ଦିଆଯାଇଥିଲା।

ଜଷ୍ଟିସ୍ ପାର୍ଦିୱାଲା କହିଥିଲେ ଯେ, ବାସ୍ତବ ପରିସ୍ଥିତିକୁ ଧ୍ୟାନରେ ରଖି ଏପରି ବ୍ୟବସ୍ଥା ଖୋଜିବାକୁ ପଡ଼ିବ, ଯାହା ଦ୍ୱାରା ଚାଲାଣ ଜାରି କରିବା ସହ ତାହାର ଆଦାୟ ମଧ୍ୟ ନିଶ୍ଚିତ ହୋଇପାରିବ।

ଆଉ କେଉଁ ପଦକ୍ଷେପ ଉପରେ ଚର୍ଚ୍ଚା?

ବକେୟା ଚାଲାଣ ଥିବା ଗାଡ଼ିଗୁଡ଼ିକ ବିରୋଧରେ ଅନେକ ପ୍ରକାର ପଦକ୍ଷେପ ବିଚାର କରାଯାଇପାରେ ବୋଲି କୋର୍ଟ ମତ ରଖିଛନ୍ତି। ଏଥିରେ—

• ବକେୟା ଚାଲାଣ ଥିଲେ Registration Certificate (RC) ନବୀକରଣ ବନ୍ଦ କରିବା।
• ଡୁପ୍ଲିକେଟ୍ RC ଜାରି ନକରିବା।
• ଗାଡ଼ିର ମାଲିକାନା ହସ୍ତାନ୍ତରଣ ଉପରେ ରୋକ୍ ଲଗାଇବା।
• ବକେୟା ଚାଲାଣ ଥିଲେ Fitness Certificate ନଦେବା।
• Parivahan ପୋର୍ଟାଲରେ ଏପରି ଗାଡ଼ିକୁ blacklist କରିବାର ସମ୍ଭାବନା ଖୋଜିବା।
• ବକେୟା ଚାଲାଣ ସହ ଜଡ଼ିତ Driving Licence ନବୀକରଣ ବନ୍ଦ କରିବା।
• ଆବଶ୍ୟକ ହେଲେ ପୂର୍ବରୁ ଜାରି ହୋଇଥିବା ଡ୍ରାଇଭିଂ ଲାଇସେନ୍ସକୁ suspend କରିବା।
• ବକେୟା ଚାଲାଣ ଥିବା ଗାଡ଼ିକୁ PUC Certificate ନଦେବା।
• ଗାଡ଼ିଗୁଡ଼ିକର random checking କରିବା।
• ଆବଶ୍ୟକ ପଡ଼ିଲେ ବକେୟା e-Challan ଥିବା ଗାଡ଼ିକୁ ଜବତ କରିବା ନେଇ ପଦକ୍ଷେପ ନେବା।

ଏହି ପଦକ୍ଷେପଗୁଡ଼ିକ ଉପରେ ଶୁଣାଣି ସମୟରେ ଆଲୋଚନା ହୋଇଥିଲା।

କୋର୍ଟଙ୍କ ମତ ଅନୁସାରେ, ଦେଶରେ e-Challan ବ୍ୟବସ୍ଥାକୁ ପ୍ରଭାବଶାଳୀ କରିବା ପାଇଁ କେବଳ ଚାଲାଣ ଜାରି କରିବା ନୁହେଁ, ବରଂ ବକେୟା ଜରିମାନା ଆଦାୟ ପାଇଁ ବ୍ୟବହାରିକ ଓ ଭୂମିସ୍ତରୀୟ ସମାଧାନ ଆବଶ୍ୟକ।