ଶିଶୁମାନଙ୍କ ସୋସିଆଲ ମିଡିଆ ବ୍ୟବହାର ଓ ଅନଲାଇନ୍ ସୁରକ୍ଷାକୁ ନେଇ ସୁପ୍ରିମକୋର୍ଟରେ ଗୁରୁତ୍ୱପୂର୍ଣ୍ଣ ମାମଲା ସାମ୍ନାକୁ ଆସିଛି। ଶିଶୁମାନଙ୍କୁ ସୋସିଆଲ ମିଡିଆ ସହ ଜଡ଼ିତ ବିଭିନ୍ନ ବିପଦରୁ ସୁରକ୍ଷା ଦେବା ପାଇଁ ଏକ ବ୍ୟାପକ ଓ କାର୍ଯ୍ୟକାରୀ ଜାତୀୟ ନିୟମାବଳୀ ପ୍ରସ୍ତୁତ କରିବାକୁ ଦାବି ହୋଇଥିବା ଏକ ଜନସ୍ୱାର୍ଥ ମାମଲାରେ କୋର୍ଟ କେନ୍ଦ୍ର ସରକାର ଓ NCPCRର ଜବାବ ମାଗିଛନ୍ତି। 

ଏହି ମାମଲା ଇନ୍ଦୋରସ୍ଥିତ Emerald Heights International School ଏବଂ ଏହାର ଏକାଡେମିକ୍ସ ନିର୍ଦ୍ଦେଶକ ସିଦ୍ଧାର୍ଥ ସିଂହ ଗିରନାରଙ୍କ ପକ୍ଷରୁ ଦାଖଲ ହୋଇଛି। ମାମଲାରେ ଶିଶୁମାନଙ୍କ ପାଇଁ ଅନଲାଇନ୍ ସୁରକ୍ଷାକୁ ନେଇ ବାଧ୍ୟତାମୂଳକ ନିୟମ ପ୍ରଣୟନ କରିବାକୁ ଦାବି କରାଯାଇଛି। 

ଆବେଦନରେ ବୟସ ଯାଞ୍ଚ (Age Verification), ବୟସ ଅନୁଯାୟୀ ସୋସିଆଲ ମିଡିଆ ଆକ୍ସେସ୍ ଏବଂ ଯାଞ୍ଚଯୋଗ୍ୟ ଅଭିଭାବକଙ୍କ ସମ୍ମତି (Parental Consent) ବ୍ୟବସ୍ଥା ଲାଗୁ କରିବାକୁ ଦାବି ହୋଇଛି। ଏଥିସହ ସାଇବର ବୁଲିଂ, ଯୌନ ଶୋଷଣ, କ୍ଷତିକାରକ ବା ବୟସ ଅନୁପଯୁକ୍ତ କଣ୍ଟେଣ୍ଟ ଏବଂ ସୋସିଆଲ ମିଡିଆର ଅତ୍ୟଧିକ ବ୍ୟବହାରରୁ ଶିଶୁଙ୍କୁ ସୁରକ୍ଷା ଦେବା ଉପରେ ଜୋର ଦିଆଯାଇଛି। 

ଶିଶୁମାନେ ଅନଲାଇନ୍‌ରେ ଅଜଣା ବ୍ୟକ୍ତିଙ୍କ ସମ୍ପର୍କରେ ଆସିବା, ସାଇବର ବୁଲିଂ ଓ ହାରାସମେଣ୍ଟର ଶିକାର ହେବା ଭଳି ଘଟଣା ନେଇ ମଧ୍ୟ ଆବେଦନରେ ଚିନ୍ତା ପ୍ରକାଶ କରାଯାଇଛି। ଦୀର୍ଘ ସମୟ ମୋବାଇଲ୍ ଓ ସୋସିଆଲ ମିଡିଆ ବ୍ୟବହାର ଯୋଗୁଁ ନିଦ୍ରା ଅଭାବ, ଏକାଗ୍ରତା ହ୍ରାସ, ଅନଲାଇନ୍ ଲୋକପ୍ରିୟତାକୁ ନେଇ ଚାପ, ବଡି-ଇମେଜ୍ ସମସ୍ୟା ଓ ପାଠପଢ଼ା ପ୍ରତି ଆଗ୍ରହ କମିବା ଭଳି ବିଷୟ ମଧ୍ୟ ଉଠାଯାଇଛି। 

ମାମଲା ଶୁଣାଣି ସମୟରେ ଚିଫ୍ ଜଷ୍ଟିସ୍ ସୂର୍ଯ୍ୟକାନ୍ତ ଓ ଜଷ୍ଟିସ୍ ଜୟମାଲ୍ୟ ବାଗଚୀଙ୍କ ଖଣ୍ଡପୀଠ କେନ୍ଦ୍ରର ମହିଳା ଓ ଶିଶୁ ବିକାଶ ମନ୍ତ୍ରଣାଳୟ, ଆଇନ ଓ ନ୍ୟାୟ ମନ୍ତ୍ରଣାଳୟ ଏବଂ NCPCRକୁ ନୋଟିସ୍ ଜାରି କରିଛନ୍ତି। ମାମଲାଟି ଅନ୍ୟ ଏକ ଲମ୍ବିତ ଆବେଦନ ସହ ଯୋଡ଼ାଯାଇଛି ଏବଂ ପରବର୍ତ୍ତୀ ଶୁଣାଣି ଡିସେମ୍ବର ୭ରେ ହେବ। 

ଆବେଦନରେ ଶିଶୁମାନଙ୍କ ପାଇଁ ଏକ ନିର୍ଦ୍ଦିଷ୍ଟ ବୟସ ସୀମା ତଳେ ସୋସିଆଲ ମିଡିଆ ବ୍ୟବହାରକୁ ରୋକିବା ଏବଂ ତା’ଠାରୁ ଅଧିକ ବୟସର ଶିଶୁଙ୍କ ବ୍ୟବହାରକୁ ଉପଯୁକ୍ତ ନିୟମ ମାଧ୍ୟମରେ ନିୟନ୍ତ୍ରଣ କରିବାକୁ ମଧ୍ୟ ଦାବି ହୋଇଛି। ସେହିପରି ଶିଶୁଙ୍କ ଦ୍ୱାରା ସୋସିଆଲ ମିଡିଆ ଆକାଉଣ୍ଟ ତିଆରି ଓ ବ୍ୟବହାର ପାଇଁ ବୟସ ଆଧାରିତ ନିୟମ ଲାଗୁ କରିବାକୁ ମଧ୍ୟ ଆବେଦନରେ କୁହାଯାଇଛି।

ତେବେ ଏହି ଶୁଣାଣିର ଅର୍ଥ ଭାରତରେ ଏବେଠାରୁ ଶିଶୁଙ୍କ ସୋସିଆଲ ମିଡିଆ ବ୍ୟବହାର ଉପରେ କୌଣସି ନୂଆ ବ୍ୟାନ୍ ଲାଗୁ ହୋଇଗଲା ନୁହେଁ। ବର୍ତ୍ତମାନ ସୁପ୍ରିମକୋର୍ଟ କେନ୍ଦ୍ର ଓ ଶିଶୁ ଅଧିକାର ସଂସ୍ଥାର ପକ୍ଷ ଜାଣିଛନ୍ତି ଏବଂ ଏକ ନିୟମାବଳୀର ଆବଶ୍ୟକତା ସମ୍ପର୍କିତ ଆବେଦନ ଉପରେ ବିଚାର କରୁଛନ୍ତି।