୨୦୨୩ ଛତିଶଗଡ଼ ବିଧାନସଭା ନିର୍ବାଚନର ପାଟନ ଆସନରୁ ଭୂପେଶ ବାଘେଲଙ୍କ ବିଜୟକୁ ଚ୍ୟାଲେଞ୍ଜ କରି ବିଜେପି ନେତା ବିଜୟ ବାଘେଲ ଦାଖଲ କରିଥିବା ନିର୍ବାଚନୀ ଆବେଦନ ଏବେ ଆଗକୁ ବଢ଼ିବ। ଏହି ଆବେଦନକୁ ଆରମ୍ଭରୁ ଖାରଜ କରିବା ପାଇଁ ଭୂପେଶ ବାଘେଲ କରିଥିବା ଆବେଦନରେ ସୁପ୍ରିମକୋର୍ଟ ହସ୍ତକ୍ଷେପ କରିନାହାନ୍ତି।

ପ୍ରଧାନ ବିଚାରପତି ସୂର୍ଯ୍ୟକାନ୍ତ, ବିଚାରପତି ଜୟମାଲ୍ୟ ବାଗଚୀ ଓ ଭି. ମୋହନାଙ୍କୁ ନେଇ ଗଠିତ ଖଣ୍ଡପୀଠ ମାମଲାରେ ଏହି ପର୍ଯ୍ୟାୟରେ ହସ୍ତକ୍ଷେପ କରିବାକୁ ମନା କରିଥିଲେ। ଭୂପେଶ ବାଘେଲଙ୍କୁ ତାଙ୍କର ଆଇନଗତ ଆପତ୍ତିଗୁଡ଼ିକୁ ହାଇକୋର୍ଟରେ ଉଠାଇବାର ସୁଯୋଗ ଦିଆଯାଇଛି।

ମାମଲା କ’ଣ?

ବିଜୟ ବାଘେଲଙ୍କ ନିର୍ବାଚନୀ ଆବେଦନରେ ଅଭିଯୋଗ ହୋଇଛି ଯେ, ନିର୍ବାଚନ ପୂର୍ବର ୪୮ ଘଣ୍ଟିଆ ନିରବତା ଅବଧି ମଧ୍ୟରେ ଭୂପେଶ ବାଘେଲ ଏକ ରୋଡ୍‌ଶୋ/ପ୍ରଚାର କାର୍ଯ୍ୟକ୍ରମରେ ଯୋଗଦେଇଥିଲେ। ଏହା Representation of the People Act, 1951ର Section 126 ଉଲ୍ଲଂଘନ କରିଥିବା ବିଜୟ ବାଘେଲଙ୍କ ପକ୍ଷରୁ ଦାବି କରାଯାଇଛି।

ଭୂପେଶ ବାଘେଲଙ୍କ ପକ୍ଷରୁ ବରିଷ୍ଠ ଆଇନଜୀବୀ କପିଲ ସିବଲ ଯୁକ୍ତି ଦେଇଥିଲେ ଯେ, ଅଭିଯୋଗକୁ ସତ୍ୟ ବୋଲି ଧରିନେଲେ ମଧ୍ୟ ଏହା ଏକ ନିର୍ବାଚନୀ ଅପରାଧ ହୋଇପାରେ, କିନ୍ତୁ ନିର୍ବାଚନ ବାତିଲ କରିବା ପାଇଁ ଆବଶ୍ୟକ ‘corrupt practice’ ଭାବେ ଏହାକୁ ଦେଖାଯାଇପାରିବ ନାହିଁ ବୋଲି ସେ ଯୁକ୍ତି ରଖିଥିଲେ।

ଭୂପେଶ ବାଘେଲଙ୍କ ପକ୍ଷରୁ ତାଙ୍କ ବିଜୟ ବ୍ୟବଧାନ ମଧ୍ୟ ଉଲ୍ଲେଖ କରାଯାଇଥିଲା। ୨୦୨୩ରେ ସେ ପାଟନ ଆସନରୁ ୧୯,୭୨୩ ଭୋଟରେ ବିଜୟୀ ହୋଇଥିଲେ। ତେବେ ସୁପ୍ରିମକୋର୍ଟ ଏହି ପର୍ଯ୍ୟାୟରେ ଅଭିଯୋଗର ଗୁଣଦୋଷ ଉପରେ ଚୂଡ଼ାନ୍ତ ମତ ଦେଇନାହାନ୍ତି।

ଏହା ପୂର୍ବରୁ ୨୦୨୫ ଜୁଲାଇରେ ସୁପ୍ରିମକୋର୍ଟ ଭୂପେଶ ବାଘେଲଙ୍କୁ ତାଙ୍କ ନିର୍ବାଚନ ବିରୋଧୀ ଆବେଦନର maintainability ସମ୍ପର୍କିତ ଆପତ୍ତିକୁ ହାଇକୋର୍ଟ-କମ୍-ଇଲେକ୍ସନ ଟ୍ରିବ୍ୟୁନାଲରେ ପ୍ରାରମ୍ଭିକ ପ୍ରଶ୍ନ ଭାବେ ଉଠାଇବାର ଅନୁମତି ଦେଇଥିଲେ। ପରେ ଛତିଶଗଡ଼ ହାଇକୋର୍ଟ ଆବେଦନକୁ ଆରମ୍ଭରୁ ଖାରଜ କରିବାକୁ ମନା କରିଥିଲେ।