ବିକେ ପାଣ୍ଡିଆନଙ୍କ ପତ୍ନୀ ଏବଂ ପୂର୍ବତନ ଆଇଏଏସ୍ ଅଧିକାରୀ ସୁଜାତା କାର୍ତ୍ତିକେୟନ ବିଜୁ ଜନତା ଦଳ (ବିଜେଡି)ରେ ଯୋଗଦେବା ସମ୍ଭାବନାକୁ ନେଇ ରାଜ୍ୟ ରାଜନୀତିରେ ନୂଆ ଚର୍ଚ୍ଚା ଆରମ୍ଭ ହୋଇଛି। ଦଳର ବରିଷ୍ଠ ନେତାମାନେ ଖୋଲାଖୋଲି ଭାବେ ତାଙ୍କ ପ୍ରବେଶକୁ ସମର୍ଥନ କରିବା ପରେ ଏହି ଚର୍ଚ୍ଚା ଆହୁରି ଜୋର ଧରିଛି।

ସୋମବାର ବିଜେଡି ନେତା ମନ୍ମଥ ରାଉତରାୟ କହିଥିଲେ ଯେ, ଦଳର କର୍ମୀ ଓ ନେତାମାନେ ସୁଜାତା କାର୍ତ୍ତିକେୟନଙ୍କୁ ବିଜେଡିରେ ଦେଖିବାକୁ ଉତ୍ସୁକ ଅଛନ୍ତି। ତାଙ୍କ ଅଭିଜ୍ଞତା ଓ ପ୍ରଶାସନିକ ଜ୍ଞାନ ଦଳକୁ ନୂଆ ଶକ୍ତି ଦେବ ବୋଲି ସେ ମତ ପ୍ରକାଶ କରିଥିଲେ। ଦଳ ତାଙ୍କୁ ସ୍ୱାଗତ କରିବା ପାଇଁ ପ୍ରସ୍ତୁତ ବୋଲି ମଧ୍ୟ ସେ କହିଥିଲେ।

ମନ୍ମଥ ରାଉତରାୟ କହିଥିଲେ ଯେ, ସୁଜାତା କାର୍ତ୍ତିକେୟନ କୌଣସି ସାଂଗଠନିକ ପଦବୀ ନେବେ ନାହିଁ କିମ୍ବା କାହାର ଉତ୍ତରାଧିକାରୀ ଭାବେ ପ୍ରକାଶ ପାଇବେ ନାହିଁ। ସେ ସାଧାରଣ କର୍ମୀ ଭାବେ ଓଡ଼ିଶାର ବିକାଶ ପାଇଁ କାମ କରିବେ। ଦଳର ଅଧିକାଂଶ ନେତା ଓ କର୍ମୀ ତାଙ୍କ ପ୍ରବେଶକୁ ସମର୍ଥନ କରୁଥିବା ସେ କହିଥିଲେ।

ଅନ୍ୟପକ୍ଷରେ ବିଜେଡି ନେତା ପ୍ରଶାନ୍ତ କୁମାର ମୁଦୁଲି ମଧ୍ୟ ସୁଜାତାଙ୍କ ସମ୍ଭାବ୍ୟ ପ୍ରବେଶକୁ ସ୍ୱାଗତ କରିଛନ୍ତି। ସେ କହିଥିଲେ ଯେ, ବିଜେଡି ସୁପ୍ରିମୋ ନବୀନ ପଟ୍ଟନାୟକ ଏପର୍ଯ୍ୟନ୍ତ ଏହି ପ୍ରସଙ୍ଗରେ କୌଣସି ମତାମତ ଦେଇନାହାନ୍ତି। ତେବେ ସୁଜାତା ଦଳରେ ଯୋଗଦେଲେ ସାଂଗଠନିକ ଭିତ୍ତି ଆହୁରି ମଜବୁତ ହେବ ଏବଂ ଦଳ ତାଙ୍କ ମାର୍ଗଦର୍ଶନରୁ ଲାଭବାନ ହେବ ବୋଲି ସେ କହିଥିଲେ।

ତେବେ ସୁଜାତା କାର୍ତ୍ତିକେୟନ ନିଜେ ଏପର୍ଯ୍ୟନ୍ତ ଏହି ପ୍ରସଙ୍ଗରେ କୌଣସି ସାର୍ବଜନିକ ପ୍ରତିକ୍ରିୟା ଦେଇନାହାନ୍ତି। ତାଙ୍କର ସମ୍ଭାବ୍ୟ ବିଜେଡି ପ୍ରବେଶକୁ ନେଇ ଚର୍ଚ୍ଚା ବଢ଼ୁଥିବା ବେଳେ ତାଙ୍କ ନିଷ୍ପତ୍ତି ଉପରେ ଏବେ ସମସ୍ତଙ୍କ ନଜର ରହିଛି।