ବାଲେଶ୍ୱର ଜିଲ୍ଲାର ସୋରୋ ରେଳ ଷ୍ଟେସନରେ କୋଇଲା ବୋଝେଇ ମାଲବାହୀ ଟ୍ରେନ୍‌ରେ ଭୟାବହ ଅଗ୍ନିକାଣ୍ଡ ଘଟିଛି। ରବିବାର ଭୋର ସମୟରେ ଟ୍ରେନ୍‌ର ଏକ ବଗିରୁ ଧୂଆଁ ଓ ନିଆଁ ବାହାରୁଥିବା ଗାର୍ଡ ଦେଖିଥିଲେ। ଏନେଇ ସେ ତୁରନ୍ତ ସୋରୋ ଷ୍ଟେସନ୍ ମାଷ୍ଟରଙ୍କୁ ଜଣାଇଥିଲେ।

ସୂଚନା ପାଇବା ପରେ ମାଲବାହୀ ଟ୍ରେନ୍‌କୁ ସୋରୋ ଷ୍ଟେସନର ପ୍ଲାଟଫର୍ମ ନମ୍ବର-୧ରେ ଅଟକାଯାଇଥିଲା। ଏହାପରେ ଅଗ୍ନିଶମ ବାହିନୀକୁ ଖବର ଦିଆଯାଇଥିଲା। ନିଆଁ ଦ୍ରୁତଗତିରେ ଅନ୍ୟ ବଗିଗୁଡ଼ିକୁ ବ୍ୟାପିବାରୁ ମୋଟ ୭ଟି ବଗି ଏହାର ପ୍ରଭାବରେ ଆସିଥିଲା।

ଅଗ୍ନିଶମ ବାହିନୀର ଟିମ୍ ଘଟଣାସ୍ଥଳରେ ପହଞ୍ଚି ପ୍ରାୟ ୫ ଘଣ୍ଟା ଧରି ନିଆଁ ଲିଭାଇବାକୁ ଉଦ୍ୟମ କରିଥିଲେ। ରାତି ପ୍ରାୟ ୨ଟାରୁ ସକାଳ ୭ଟା ପର୍ଯ୍ୟନ୍ତ ଉଦ୍ୟମ ପରେ ନିଆଁ ସମ୍ପୂର୍ଣ୍ଣ ନିୟନ୍ତ୍ରଣକୁ ଆସିଥିଲା।

ସୂଚନା ଅନୁସାରେ, ଏହି ମାଲବାହୀ ଟ୍ରେନ୍‌ଟି ଧାମରାରୁ କୋଇଲା ନେଇ ଖଡ଼ଗପୁର ଦିଗକୁ ଯାଉଥିଲା। ରାଣୀତାଳ ନିକଟରେ ଟ୍ରେନ୍‌ର ଗାର୍ଡ ନିଆଁ ଓ ଧୂଆଁ ଦେଖିବା ପରେ ତୁରନ୍ତ ରେଳ କର୍ତ୍ତୃପକ୍ଷଙ୍କୁ ସତର୍କ କରିଥିଲେ।

ଅଗ୍ନିକାଣ୍ଡ ଯୋଗୁଁ କିଛି ସମୟ ପାଇଁ ରେଳ ଚଳାଚଳ ମଧ୍ୟ ପ୍ରଭାବିତ ହୋଇଥିଲା। ନିଆଁ ଲିଭିବା ପରେ ରେଳ ଅଧିକାରୀମାନେ ପରିସ୍ଥିତିର ସମୀକ୍ଷା କରି ଟ୍ରେନ୍‌କୁ ଗନ୍ତବ୍ୟସ୍ଥଳ ଅଭିମୁଖେ ପଠାଇଥିଲେ।

ଏହି ଅଗ୍ନିକାଣ୍ଡରେ କୌଣସି ଜୀବନହାନି ହୋଇନଥିବା ସୂଚନା ମିଳିଛି। ତେବେ ନିଆଁ ଲାଗିବାର ପ୍ରକୃତ କାରଣ କ’ଣ, ସେନେଇ ରେଳବାଇ ଓ ଅଗ୍ନିଶମ ବିଭାଗ ପକ୍ଷରୁ ଯାଞ୍ଚ ଚାଲିଛି।