ପଶ୍ଚିମ ଓଡ଼ିଶାର ପାଣିପାଗ ପୂର୍ବାନୁମାନ ବ୍ୟବସ୍ଥାକୁ ମିଳିଛି ନୂଆ ଶକ୍ତି। ସମ୍ବଲପୁର ଜମାଦାରପାଲି ରୋଡ୍‌ସ୍ଥିତ ମଧୁପୁରରେ ନିର୍ମାଣ ହୋଇଥିବା ନୂଆ ଡପଲର୍ ପାଣିପାଗ ରାଡାର୍ ଷ୍ଟେସନ୍‌ର ଶୁଭ ଉଦ୍‌ଘାଟନ ହୋଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ଆଧୁନିକ କେନ୍ଦ୍ରର ଉଦ୍‌ଘାଟନ କରିଛନ୍ତି।

ଭାରତୀୟ ପାଣିପାଗ ବିଭାଗ (IMD) ଏବଂ ଓଡ଼ିଶା ସରକାରଙ୍କ ରାଜସ୍ୱ ଓ ବିପର୍ଯ୍ୟୟ ପରିଚାଳନା ବିଭାଗ ଅଧୀନ ଓଏସ୍‌ଡିଏମ୍‌ଏର ମିଳିତ ସହଯୋଗରେ ସମ୍ବଲପୁରରେ ଏହି ଡପଲର୍ ରାଡାର୍ କେନ୍ଦ୍ର ସ୍ଥାପନ କରାଯାଇଛି। ଉଦ୍‌ଘାଟନୀ କାର୍ଯ୍ୟକ୍ରମରେ ଭିଡିଓ କନ୍‌ଫରେନ୍ସିଂ ଜରିଆରେ କେନ୍ଦ୍ର ରାଷ୍ଟ୍ରମନ୍ତ୍ରୀ ଡ. ଜିତେନ୍ଦ୍ର ସିଂହ ମଧ୍ୟ ଯୋଗ ଦେଇଥିଲେ।

ପାରାଦୀପ ଓ ଗୋପାଳପୁରରେ ଥିବା ରାଡାର୍‌ଗୁଡ଼ିକ ଉପକୂଳ ଅଞ୍ଚଳର ପାଣିପାଗ ନିରୀକ୍ଷଣରେ ସହାୟକ ହେଉଛି। ଏବେ ସମ୍ବଲପୁରରେ ନୂଆ ରାଡାର୍ ସ୍ଥାପନ ହେବା ଫଳରେ ପଶ୍ଚିମ ଓଡ଼ିଶା ସମେତ ଆଭ୍ୟନ୍ତରୀଣ ଜିଲ୍ଲାଗୁଡ଼ିକର ପାଣିପାଗ ଉପରେ ଅଧିକ ନଜର ରଖାଯାଇପାରିବ। ବର୍ଷା, ଝଡ଼ ଓ ଅନ୍ୟାନ୍ୟ ପାଣିପାଗଜନିତ ଘଟଣା ସମ୍ପର୍କରେ ପୂର୍ବ ସୂଚନା ଦେବାରେ ଏହା ଗୁରୁତ୍ୱପୂର୍ଣ୍ଣ ହେବ।

ସମ୍ବଲପୁରରେ ସ୍ଥାପିତ ଏହି ସି-ବ୍ୟାଣ୍ଡ ଡପଲର୍ ପାଣିପାଗ ରାଡାର୍‌ର ପ୍ରଭାବଶାଳୀ ରେଞ୍ଜ ପ୍ରାୟ ୧୫୦ କିଲୋମିଟର। ରେଡିଓ ତରଙ୍ଗର ବିଶ୍ଳେଷଣ ମାଧ୍ୟମରେ ମେଘର ଗତିବିଧି, ବର୍ଷାର ପରିମାଣ ଏବଂ ପାଣିପାଗର ପରିବର୍ତ୍ତନ ସମ୍ପର୍କରେ ସୂଚନା ମିଳିପାରିବ। ଏହା ଫଳରେ ବିପର୍ଯ୍ୟୟ ପୂର୍ବ ପ୍ରସ୍ତୁତି ଏବଂ ଧନଜୀବନର ସୁରକ୍ଷା ବ୍ୟବସ୍ଥାକୁ ଅଧିକ ସୁଦୃଢ଼ କରିବାରେ ସହାୟତା ମିଳିପାରେ।

ନୂଆଁଖାଇ ଅବସରରେ ସମ୍ବଲପୁରରେ ପ୍ରାୟ ୯୬୦ କୋଟି ଟଙ୍କାର ୫୦ଟି ପ୍ରକଳ୍ପର ଭିତ୍ତିପ୍ରସ୍ତର ସ୍ଥାପନ ଓ ଲୋକାର୍ପଣ ମଧ୍ୟ କରିଛନ୍ତି ମୁଖ୍ୟମନ୍ତ୍ରୀ ମୋହନ ଚରଣ ମାଝୀ। ସମ୍ବଲପୁର ସହରର ବିକାଶ ପାଇଁ ଚଳିତ ବର୍ଷ ପ୍ରାୟ ୨,୦୦୦ କୋଟି ଟଙ୍କାର ପ୍ରକଳ୍ପ ଦିଆଯାଇଥିବା ମୁଖ୍ୟମନ୍ତ୍ରୀ କହିଛନ୍ତି।

ନୂଆ ଡପଲର୍ ରାଡାର୍ ଯୋଗୁଁ ପଶ୍ଚିମ ଓଡ଼ିଶାର ପାଣିପାଗର ତାତ୍କାଳିକ ପରିବର୍ତ୍ତନ ସମ୍ପର୍କରେ ଅଧିକ ସୂଚନା ମିଳିବ। ବିଶେଷକରି ବର୍ଷା, ଝଡ଼ ଓ ଅନ୍ୟାନ୍ୟ ପାଣିପାଗଜନିତ ବିପଦ ସମ୍ପର୍କରେ ସମୟୋପଯୋଗୀ ସୂଚନା ମିଳିଲେ ବିପର୍ଯ୍ୟୟ ପରିଚାଳନା ଓ ପ୍ରସ୍ତୁତିରେ ଏହା ଉପଯୋଗୀ ହୋଇପାରେ।