ମୟୂରଭଞ୍ଜ:ଓଡ଼ିଶାର ମୟୂରଭଞ୍ଜ ଜିଲ୍ଲାରେ ଏକ ରୟାଲ ବେଙ୍ଗଲ ଟାଇଗର ଛୁଆକୁ ବନ ବିଭାଗ ଉଦ୍ଧାର କରିଛି। ପ୍ରବଳ ବର୍ଷା ପରେ ଜଙ୍ଗଲରୁ ବାହାରି ଆସିଥିବା ଏହି ବାଘ ଛୁଆ ଖାପରଖିଆ ଗାଁ ନିକଟରେ ଘୁରୁଥିବା ବେଳେ ଲୋକଙ୍କ ନଜରକୁ ଆସିଥିଲା। ଏହି ଅଞ୍ଚଳ ଠାକୁରମୁଣ୍ଡା ଫରେଷ୍ଟ ରେଞ୍ଜ ଏବଂ ସିମିଳିପାଳ ଟାଇଗର ରିଜର୍ଭ ସଂଲଗ୍ନ ଅଞ୍ଚଳରେ ରହିଛି।

ବନ ବିଭାଗର ସୂଚନା ଅନୁସାରେ, ବାଘ ଛୁଆଟିର ବୟସ ପ୍ରାୟ୭ରୁ ୮ ମାସ। ଗୁରୁବାର ରାତିରେ ଜଣେ ଗ୍ରାମବାସୀ ନିଜ ଘର ନିକଟରେ ଛୁଆଟିକୁ ଦେଖିଥିଲେ। ପରେ ଗ୍ରାମବାସୀ ବନ ବିଭାଗକୁ ଖବର ଦେଇଥିଲେ।

ଛୁଆଟି ପ୍ରଥମେ ଜଙ୍ଗଲ ଆଡ଼କୁ ଯାଇଥିଲେ ମଧ୍ୟ ପ୍ରବଳ ବର୍ଷା ଯୋଗୁଁ ପୁଣି ଜନବସତି ଆଡ଼କୁ ଫେରିଆସିଥିଲା। ଶେଷରେ ଏକ ଖାଲି ପ୍ରଧାନମନ୍ତ୍ରୀ ଆବାସ ଯୋଜନା ଘର ଭିତରେ ଏହା ଆଶ୍ରୟ ନେଇଥିଲା। ସୁରକ୍ଷା ଦୃଷ୍ଟିରୁ ଗ୍ରାମବାସୀ ଘରର କବାଟ ବାହାର ପଟୁ ବନ୍ଦ କରି ବନ ବିଭାଗକୁ ସୂଚନା ଦେଇଥିଲେ।

ପରେ ବନ ବିଭାଗର ଏକ ସ୍ୱତନ୍ତ୍ର ଟିମ୍ ଘଟଣାସ୍ଥଳରେ ପହଞ୍ଚି ଜାଲ ଓ ସ୍ୱତନ୍ତ୍ର ପରିବହନ କେଜ୍ର ସହାୟତାରେ ବାଘ ଛୁଆଟିକୁ ସୁରକ୍ଷିତ ଭାବେ ଉଦ୍ଧାର କରିଥିଲେ। ଉଦ୍ଧାର ସମୟରେ ଛୁଆଟି ଅସୁସ୍ଥ ଦେଖାଯାଉଥିବାରୁ ତାକୁ ଠାକୁରମୁଣ୍ଡା ଫରେଷ୍ଟ ରେଞ୍ଜ ଅଫିସକୁ ନିଆଯାଇଥିଲା।

ବର୍ତ୍ତମାନ ପଶୁ ଚିକିତ୍ସକମାନେ ବାଘ ଛୁଆଟିର ସ୍ୱାସ୍ଥ୍ୟ ଓ ବ୍ୟବହାର ଉପରେ ନଜର ରଖିଛନ୍ତି। ନିକଟରେ ଏହା ପ୍ରାୟ୨.୫ କିଲୋଗ୍ରାମ ମାଂସଔଷଧ ସହିତ ଖାଇଥିବା ଏବଂ ଧୀରେ ଧୀରେ ଶକ୍ତି ଫେରାଇଥିବା ବନ ବିଭାଗ ପକ୍ଷରୁ କୁହାଯାଇଛି।

ସ୍ୱାସ୍ଥ୍ୟ ପରୀକ୍ଷା ଓ ପୁନର୍ବାସ ପ୍ରକ୍ରିୟା ସମ୍ପୂର୍ଣ୍ଣ ହେବା ପରେ ବାଘ ଛୁଆଟିକୁ ସିମିଳିପାଳ ଟାଇଗର ରିଜର୍ଭର ଏକ ସୁରକ୍ଷିତ ଏନକ୍ଲୋଜରକୁ ସ୍ଥାନାନ୍ତର କରାଯିବା ଯୋଜନା ରହିଛି। ଜଙ୍ଗଲରେ ସ୍ୱାଧୀନ ଭାବେ ବଞ୍ଚିବା ପାଇଁ ଆବଶ୍ୟକ ଶିକାର କୌଶଳ ବିକଶିତ ହେବା ପର୍ଯ୍ୟନ୍ତ ଏହାକୁ ନଜରରେ ରଖାଯିବ।