ଭାରତୀୟ ସିନେମାର ବହୁ ପ୍ରତୀକ୍ଷିତ ପୌରାଣିକ ଚଳଚ୍ଚିତ୍ର **'ରାମାୟଣ: ପାର୍ଟ-୧'**କୁ ନେଇ ଦର୍ଶକଙ୍କ ମଧ୍ୟରେ ଉତ୍ସାହ ଦିନକୁ ଦିନ ବଢ଼ୁଛି। ପ୍ରଯୋଜକ ନମିତ ମଲହୋତ୍ରାଙ୍କ ଏହି ବିଗ୍-ବଜେଟ୍ ପ୍ରକଳ୍ପର ଥିଏଟ୍ରିକାଲ୍ ଟ୍ରେଲର ଜୁଲାଇ ୧୮ରେ ମୁକ୍ତି ପାଇପାରେ ବୋଲି ଏକ ନୂଆ ରିପୋର୍ଟରେ ଦାବି କରାଯାଇଛି।

ସୂଚନା ଅନୁଯାୟୀ, ଫିଲ୍ମ ମୁକ୍ତିର ପ୍ରାୟ ସାଢ଼େ ତିନି ମାସ ପୂର୍ବରୁ ଟ୍ରେଲର ରିଲିଜ୍ କରିବାକୁ ନିର୍ମାତାମାନେ ଯୋଜନା କରିଛନ୍ତି। ସାଧାରଣତଃ ବର୍ତ୍ତମାନ ସିନେମା ମୁକ୍ତିର କିଛି ସପ୍ତାହ ପୂର୍ବରୁ ଟ୍ରେଲର ଆସୁଥିବା ବେଳେ, 'ରାମାୟଣ' ପାଇଁ ଏକ ଭିନ୍ନ ପ୍ରମୋସନାଲ୍ ରଣନୀତି ଗ୍ରହଣ କରାଯାଇଛି।

ରିପୋର୍ଟରେ କୁହାଯାଇଛି ଯେ, ଏହି ଫିଲ୍ମକୁ କେବଳ ଭାରତୀୟ ଦର୍ଶକ ନୁହେଁ ବରଂ ବିଶ୍ୱସ୍ତରର ଦର୍ଶକଙ୍କୁ ଧ୍ୟାନରେ ରଖି ପ୍ରଚାର କରାଯାଉଛି। ସେଥିପାଇଁ ଫିଲ୍ମର ପ୍ରଚାର ଅଭିଯାନ ବହୁ ପୂର୍ବରୁ ଆରମ୍ଭ ହୋଇଥିବା ବେଳେ ଟ୍ରେଲର ମଧ୍ୟ ଅଗ୍ରୀମ ଭାବେ ମୁକ୍ତି ପାଇବାକୁ ଯାଉଛି।

ନିର୍ଦ୍ଦେଶକ ନୀତେଶ ତିୱାରୀଙ୍କ ନିର୍ଦ୍ଦେଶିତ ଏହି ଚଳଚ୍ଚିତ୍ରରେ ରଣବୀର କପୁର ଭଗବାନ ଶ୍ରୀରାମ, ସାଇ ପଲ୍ଲବୀ ମାତା ସୀତା, ୟଶ ରାବଣ, ସନି ଦେଓଲ୍ ଭଗବାନ ହନୁମାନ ଏବଂ ରବି ଦୁବେ ଲକ୍ଷ୍ମଣ ଭୂମିକାରେ ନଜର ଆସିବେ। ଏହା ବ୍ୟତୀତ ଅରୁଣ ଗୋଭିଲ୍, ଲାରା ଦତ୍ତ, କାଜଲ ଅଗ୍ରୱାଲ, ରକୁଲ ପ୍ରୀତ ସିଂହ, ବିବେକ ଓବରୋୟ ଓ କୁନାଲ କପୁର ମଧ୍ୟ ଗୁରୁତ୍ୱପୂର୍ଣ୍ଣ ଚରିତ୍ରରେ ଅଭିନୟ କରୁଛନ୍ତି।

ଏହି ମହାକାବ୍ୟ ଦୁଇଟି ଭାଗରେ ମୁକ୍ତି ପାଇବ। 'ରାମାୟଣ: ପାର୍ଟ-୧' ଦୀପାବଳି ୨୦୨୬ରେ ଏବଂ 'ରାମାୟଣ: ପାର୍ଟ-୨' ଦୀପାବଳି ୨୦୨୭ରେ ପ୍ରେକ୍ଷାଳୟକୁ ଆସିବ।

ଅନ୍ୟପଟେ, ଫିଲ୍ମକୁ ନେଇ ଆଉ ଏକ ବଡ଼ ଖବର ସାମ୍ନାକୁ ଆସିଛି। ରିପୋର୍ଟ ଅନୁସାରେ, କରଣ ଜୋହର ପ୍ରାୟ ୩୫୦ କୋଟି ଟଙ୍କାରେ ଫିଲ୍ମର ହିନ୍ଦୀ ବିତରଣ ଅଧିକାର ହାସଲ କରିଛନ୍ତି। ଏହା ଭାରତୀୟ ସିନେମା ଇତିହାସର ସବୁଠାରୁ ବଡ଼ ଥିଏଟ୍ରିକାଲ୍ ଡିଷ୍ଟ୍ରିବ୍ୟୁସନ୍ ଡିଲ୍‌ ମଧ୍ୟରୁ ଗୋଟିଏ ବୋଲି କୁହାଯାଉଛି।

ତେବେ ଟ୍ରେଲର ମୁକ୍ତି ତାରିଖକୁ ନେଇ ନିର୍ମାତାଙ୍କ ପକ୍ଷରୁ ଏପର୍ଯ୍ୟନ୍ତ କୌଣସି ଔପଚାରିକ ଘୋଷଣା କରାଯାଇନାହିଁ।