ପୁରୀ ଜିଲ୍ଲା ସତ୍ୟବାଦୀ ବ୍ଲକ୍‌ର ବଳାପୁର ପଞ୍ଚାୟତରେ ବୁଲା ଷଣ୍ଢଙ୍କ ଉପଦ୍ରବକୁ ନେଇ ଚାଷୀଙ୍କ ଅଭିନବ ପ୍ରତିବାଦ ଦେଖିବାକୁ ମିଳିଛି। ଫସଲ ନଷ୍ଟ ହେଉଥିବା ଅଭିଯୋଗ କରି ଶତାଧିକ ଚାଷୀ ମଙ୍ଗଳବାର ସତ୍ୟବାଦୀ ଥାନାରେ ପହଞ୍ଚି ଷଣ୍ଢଙ୍କ ନାଁରେ ଅଭିଯୋଗ କରିଛନ୍ତି।

ଚାଷୀମାନଙ୍କ କହିବା ଅନୁସାରେ, ଗାଁ ଓ ଚାଷ ଜମିରେ ବୁଲା ଗୋରୁ ଓ ଷଣ୍ଢଙ୍କ ସଂଖ୍ୟା ବଢ଼ିବାରୁ ଫସଲ ସୁରକ୍ଷା କରିବା କଷ୍ଟକର ହୋଇପଡ଼ିଛି। ଏହି ପଶୁମାନେ ବିରି, ମୁଗ ଭଳି ରବି ଫସଲ ସହ ଧାନ ଫସଲ ମଧ୍ୟ ନଷ୍ଟ କରୁଥିବା ଚାଷୀମାନେ ଅଭିଯୋଗ କରିଛନ୍ତି।

🌾 ଫସଲ ନଷ୍ଟକୁ ନେଇ ଅସନ୍ତୋଷ

ଚାଷୀମାନେ ଅଭିଯୋଗ କରିଛନ୍ତି ଯେ, ଏନେଇ ବାରମ୍ବାର ପ୍ରଶାସନ ଓ ପଞ୍ଚାୟତକୁ ଅବଗତ କରାଯାଇଥିଲେ ମଧ୍ୟ ସମସ୍ୟାର ସ୍ଥାୟୀ ସମାଧାନ ହୋଇନାହିଁ। ଫଳରେ ଚାଷ ଜମିକୁ ବୁଲା ଷଣ୍ଢଙ୍କଠାରୁ ରକ୍ଷା କରିବା ପାଇଁ ଚାଷୀମାନଙ୍କୁ ଦିନରାତି ଜଗିବାକୁ ପଡ଼ୁଥିବା ସେମାନେ କହିଛନ୍ତି।

ବୁଲା ଷଣ୍ଢଙ୍କ ଦ୍ୱାରା ହେଉଥିବା କ୍ଷତିରେ ଅତିଷ୍ଠ ହୋଇ ଚାଷୀମାନେ ପ୍ରତିବାଦ ସ୍ୱରୂପ ଷଣ୍ଢଙ୍କ ନାଁରେ ଥାନାରେ ଅଭିଯୋଗ କରିଥିଲେ।

👮 ସମାଧାନର ଆଶ୍ୱାସନ ଦେଲା ପୋଲିସ

ଚାଷୀମାନେ ଏହି ସମସ୍ୟାର ସ୍ଥାୟୀ ସମାଧାନ ଦାବି କରି ଥାନାରେ ରହିଥିଲେ। ଘଟଣା ନେଇ ସତ୍ୟବାଦୀ ଥାନା ଅଧିକାରୀମାନେ ଚାଷୀଙ୍କ ସହ ଆଲୋଚନା କରିବା ସହ ସ୍ଥାନୀୟ ପ୍ରଶାସନ, ବ୍ଲକ୍‌ କର୍ତ୍ତୃପକ୍ଷ ଓ ସରପଞ୍ଚଙ୍କ ସହଯୋଗରେ ବିକଳ୍ପ ସମାଧାନ ବାହାର କରାଯିବ ବୋଲି ଆଶ୍ୱାସନ ଦେଇଥିଲେ। ଏହାପରେ ଚାଷୀମାନେ ପ୍ରତିବାଦ ପ୍ରତ୍ୟାହାର କରି ଫେରିଥିଲେ।

ସତ୍ୟବାଦୀ ଥାନା IIC ସୌମ୍ୟ ରଞ୍ଜନ ମହାକୁଡ଼ କହିଛନ୍ତି ଯେ, ବଳାପୁର ଗାଁରେ ପ୍ରାୟ ୧୫୦ରୁ ୨୦୦ ଷଣ୍ଢ ଥିବା ଗ୍ରାମବାସୀମାନେ ଜଣାଇଛନ୍ତି। ଦିନବେଳେ ଚାଷୀମାନେ କ୍ଷେତ ଜଗୁଥିବା ବେଳେ ରାତିରେ ଏତେ ସଂଖ୍ୟକ ଷଣ୍ଢ ଯୋଗୁଁ ସେମାନେ ବହୁ ସମସ୍ୟାର ସମ୍ମୁଖୀନ ହେଉଥିବା ସେ କହିଛନ୍ତି। ତେଣୁ ଚାଷୀମାନେ ଏହି ସମସ୍ୟାର ଏକ ସ୍ଥାୟୀ ସମାଧାନ ଦାବି କରୁଥିବା IIC କହିଛନ୍ତି।