ପୁରୀ ଜିଲ୍ଲା ଧରଣୀକୁଦି ଗାଁରେ ଜଙ୍ଗଲୀ ବାରହା ଆକ୍ରମଣରେ ୫ ଜଣ ଗ୍ରାମବାସୀ ଆହତ ହୋଇଛନ୍ତି। ହଠାତ୍ ଗାଁ ଭିତରକୁ ପଶି ଆସିଥିବା ଏକ ବାରହା ଲୋକଙ୍କ ଉପରେ ଅତର୍କିତ ଆକ୍ରମଣ କରିଥିବା ଜଣାପଡ଼ିଛି।

ସୂଚନା ଅନୁଯାୟୀ, ଗ୍ରାମର କିଛି ଲୋକ ନିଜ ଦୈନନ୍ଦିନ କାମ ଓ କୃଷିକାର୍ଯ୍ୟରେ ବ୍ୟସ୍ତ ଥିବା ସମୟରେ ହଠାତ୍ ଜଙ୍ଗଲୀ ବାରହାଟି ଗାଁ ଭିତରକୁ ପଶି ଆସିଥିଲା। କିଛି ବୁଝିବା ପୂର୍ବରୁ ଏହା ଲୋକଙ୍କ ଉପରେ ଆକ୍ରମଣ କରିଥିଲା।

ଏହି ଆକ୍ରମଣରେ୫ ଜଣ ଗ୍ରାମବାସୀ ଆହତହୋଇଛନ୍ତି। ଗ୍ରାମବାସୀମାନେ ତୁରନ୍ତ ଆହତଙ୍କୁ ଉଦ୍ଧାର କରି ସ୍ଥାନୀୟ ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରକୁ ନେଇଥିଲେ।

ପ୍ରାଥମିକ ଚିକିତ୍ସା ପରେ୨ ଜଣଙ୍କ ଅବସ୍ଥା ଗୁରୁତରଥିବାରୁ ସେମାନଙ୍କୁ ଅଧିକ ଚିକିତ୍ସା ପାଇଁ ନିକଟସ୍ଥ ବଡ଼ ଡାକ୍ତରଖାନାକୁ ସ୍ଥାନାନ୍ତର କରାଯାଇଛି।

ଗାଁରେ ବାରହା ଭୟ

ଘଟଣା ପରେ ଧରଣୀକୁଦି ଗାଁ ସମେତ ଆଖପାଖ ଅଞ୍ଚଳରେ ଭୟର ବାତାବରଣ ସୃଷ୍ଟି ହୋଇଛି। ବାରହା ଭୟରେ ଲୋକେ ଘରୁ ବାହାରିବାକୁ ମଧ୍ୟ ଭୟ କରୁଥିବା କୁହାଯାଇଛି।

ଖବର ପାଇ ବନ ବିଭାଗ ଘଟଣାସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛି ଏବଂ ଘଟଣା ସମ୍ପର୍କରେ ତଦନ୍ତ ଆରମ୍ଭ କରିଛି।

ସ୍ଥାନୀୟ ଲୋକଙ୍କ ସୁରକ୍ଷା ଦୃଷ୍ଟିରୁ ବନ ବିଭାଗ ତୁରନ୍ତ ପଦକ୍ଷେପ ନେଇ ବାରହାକୁ ନିୟନ୍ତ୍ରଣ କରିବାକୁ ଗ୍ରାମବାସୀମାନେ ଦାବି କରିଛନ୍ତି।