ଭୁବନେଶ୍ୱର: ପୁରୀରେ ପର୍ଯ୍ୟଟନ, ଭିତ୍ତିଭୂମି ଓ ଐତିହ୍ୟର ବିକାଶକୁ ତ୍ୱରାନ୍ୱିତ କରିବା ପାଇଁ ବଡ଼ ପଦକ୍ଷେପ। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ପୁରୀ ଜିଲ୍ଲାର ବିଭିନ୍ନ ଉନ୍ନୟନ ଓ ଭିତ୍ତିଭୂମି ପ୍ରକଳ୍ପର ଅଗ୍ରଗତି ସମୀକ୍ଷା କରି ଅଧିକାରୀମାନଙ୍କୁ କାମ ଶୀଘ୍ର ଆଗେଇ ନେବାକୁ ନିର୍ଦ୍ଦେଶ ଦେଇଛନ୍ତି।

ଲୋକସେବା ଭବନରେ ଅନୁଷ୍ଠିତ ଉଚ୍ଚସ୍ତରୀୟ ବୈଠକରେ ପୁରୀକୁ ଏକ ବିଶ୍ୱସ୍ତରୀୟ ଐତିହ୍ୟ ଓ ପର୍ଯ୍ୟଟନ କେନ୍ଦ୍ର ଭାବେ ଗଢ଼ିତୋଳିବା ସହ ସ୍ଥାନୀୟ ବାସିନ୍ଦା, ବ୍ୟବସାୟୀ ଓ ଶ୍ରୀମନ୍ଦିର ସେବାୟତଙ୍କ ସ୍ୱାର୍ଥ ସୁରକ୍ଷା ଉପରେ ଗୁରୁତ୍ୱ ଦିଆଯାଇଛି।

ଶ୍ରୀଜଗନ୍ନାଥ ଅନ୍ତର୍ଜାତୀୟ ବିମାନବନ୍ଦର ଓ ରଘୁନନ୍ଦନ ଲାଇବ୍ରେରୀ ଉପରେ ଗୁରୁତ୍ୱ

ବୈଠକରେ ପ୍ରସ୍ତାବିତ ଶ୍ରୀଜଗନ୍ନାଥ ଅନ୍ତର୍ଜାତୀୟ ବିମାନବନ୍ଦର, ରଘୁନନ୍ଦନ ଲାଇବ୍ରେରୀର ପୁନଃନିର୍ମାଣ ଏବଂ ଶ୍ରୀଜଗନ୍ନାଥ ଇଣ୍ଟରପ୍ରିଟେସନ୍ ସେଣ୍ଟର୍‌ର ବିକାଶ ନେଇ ଆଲୋଚନା ହୋଇଥିଲା। ଏହି ପ୍ରକଳ୍ପଗୁଡ଼ିକର କାମ ତ୍ୱରାନ୍ୱିତ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି।

ଏହା ସହ ଗୁଣ୍ଡିଚା ମନ୍ଦିରର ସାମଗ୍ରିକ ବିକାଶ, ମହାପ୍ରସାଦ ପ୍ରସ୍ତୁତି ପାଇଁ ନୂତନ ରୋଷଘର, ପର୍ଯ୍ୟଟକଙ୍କ ଆକର୍ଷଣ ପାଇଁ ମନୋରଞ୍ଜନ ପାର୍କ, ପୁରୀ ସମୁଦ୍ରକୂଳର ସୌନ୍ଦର୍ଯ୍ୟକରଣ ଏବଂ ସ୍ୱର୍ଗଦ୍ୱାରର ଉନ୍ନତିକରଣ ଭଳି ପ୍ରସ୍ତାବ ମଧ୍ୟ ସମୀକ୍ଷା ହୋଇଥିଲା।

ଐତିହ୍ୟ ସ୍ଥଳ ଓ ରାସ୍ତାଘାଟର ବିକାଶ

ପୁରୀର ଅଠରନଳା ଐତିହ୍ୟ ସେତୁର ପୁନଃନିର୍ମାଣ, ଅନ୍ନପୂର୍ଣ୍ଣା ଥିଏଟରର ପୁନର୍ବିକାଶ ଏବଂ ବିଭିନ୍ନ ଧାର୍ମିକ ଓ ଐତିହ୍ୟସମ୍ପନ୍ନ ସ୍ଥାନର ସୌନ୍ଦର୍ଯ୍ୟକରଣ ଉପରେ ମଧ୍ୟ ଗୁରୁତ୍ୱ ଦିଆଯାଇଛି।

ସତ୍ୟବାଦୀର ଐତିହାସିକ ବନ ବିଦ୍ୟାଳୟକୁ ପାରମ୍ପରିକ ଗୁରୁକୁଳ ଢାଞ୍ଚାରେ ପୁନରୁଦ୍ଧାର, ବକୁଳବନର ବିକାଶ, ସାକ୍ଷୀଗୋପାଳର ଗୋପାଳଜୀଉ ମନ୍ଦିର, ସାତଲହଡ଼ି ମଠ ଓ କାକଟପୁରର ମା’ ମଙ୍ଗଳା ମନ୍ଦିରର ବିକାଶ ନେଇ ମଧ୍ୟ ଆଲୋଚନା ହୋଇଛି।

ପୁରୀରୁ ବ୍ରହ୍ମଗିରି, କୋଣାର୍କ ଓ ଭୁବନେଶ୍ୱରକୁ ସଂଯୋଗ କରୁଥିବା ରାସ୍ତାର ଉନ୍ନତିକରଣ ସହ ଅନ୍ୟାନ୍ୟ ପ୍ରମୁଖ ଯୋଗାଯୋଗ ପ୍ରକଳ୍ପର ଅଗ୍ରଗତି ମଧ୍ୟ ସମୀକ୍ଷା କରାଯାଇଛି।

ବଡ଼ଦାଣ୍ଡର ଉଠାଦୋକାନୀଙ୍କ ଥଇଥାନ

ଶ୍ରୀମନ୍ଦିର ସମ୍ମୁଖ ବଡ଼ଦାଣ୍ଡରୁ ହଟାଯାଇଥିବା ଉଠାଦୋକାନୀ ଓ ଅସ୍ଥାୟୀ ଦୋକାନୀଙ୍କୁ ଶ୍ରୀସେତୁ ନିକଟରେ ନିର୍ଦ୍ଦିଷ୍ଟ ସ୍ଥାନରେ ଥଇଥାନ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ଏହାଦ୍ୱାରା ପ୍ରଭାବିତ ବ୍ୟବସାୟୀମାନେ ପୁନର୍ବାର ଜୀବିକା ଆରମ୍ଭ କରିପାରିବେ ବୋଲି ଆଶା କରାଯାଉଛି।

ସେବାୟତଙ୍କ କଲ୍ୟାଣକୁ ପ୍ରାଥମିକତା

ଶ୍ରୀଜଗନ୍ନାଥଙ୍କ ନୀତିକାନ୍ତି ସୁଚାରୁ ଭାବେ ସମ୍ପନ୍ନ କରିବା ସହ ସେବାୟତ ଓ ସେମାନଙ୍କ ପରିବାରର କଲ୍ୟାଣ ଉପରେ ଧ୍ୟାନ ଦେବାକୁ ମୁଖ୍ୟମନ୍ତ୍ରୀ ଅଧିକାରୀମାନଙ୍କୁ କହିଛନ୍ତି।

ଆଇନ ମନ୍ତ୍ରୀ ପୃଥ୍ୱୀରାଜ ହରିଚନ୍ଦନଙ୍କ ଅନୁସାରେ, ସେବାୟତଙ୍କ ପରବର୍ତ୍ତୀ ପିଢ଼ି ଯେପରି ମନ୍ଦିରର ପାରମ୍ପରିକ ସେବା ଓ ରୀତିନୀତିକୁ ଆଗକୁ ନେଇପାରିବେ, ସେଥିପାଇଁ ସହାୟତା ଦିଆଯିବ। ସେବାୟତ ଓ ସେମାନଙ୍କ ପରିବାରର ସୁରକ୍ଷିତ ଜୀବନଯାପନ ପାଇଁ ମନ୍ଦିର ପ୍ରଶାସନ ଦାୟିତ୍ୱ ନେବ ବୋଲି ସେ କହିଛନ୍ତି।

ନିର୍ଦ୍ଧାରିତ ସମୟରେ ପ୍ରକଳ୍ପ ସମ୍ପୂର୍ଣ୍ଣ କରିବାକୁ ନିର୍ଦ୍ଦେଶ

ସମସ୍ତ ପ୍ରକଳ୍ପର ଅଗ୍ରଗତିକୁ କ୍ଷେତ୍ରସ୍ତରରେ ନିରୀକ୍ଷଣ କରି ନିର୍ଦ୍ଧାରିତ ସମୟସୀମା ମଧ୍ୟରେ କାମ ଶେଷ କରିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। କାର୍ଯ୍ୟାନ୍ୱୟନରେ ବିଳମ୍ବ, ଅବହେଳା କିମ୍ବା ଅନିୟମିତତାକୁ ବରଦାସ୍ତ କରାଯିବ ନାହିଁ ବୋଲି ସେ ସତର୍କ କରିଛନ୍ତି।

ପୁରୀର ପର୍ଯ୍ୟଟନ ଓ ଐତିହ୍ୟର ବିକାଶ ସହ ସ୍ଥାନୀୟ ଲୋକଙ୍କ ଜୀବିକା, ସେବାୟତଙ୍କ କଲ୍ୟାଣ ଏବଂ ମହାପ୍ରଭୁଙ୍କ ପରମ୍ପରାର ସୁରକ୍ଷାକୁ ଏହି ଯୋଜନାରେ ଗୁରୁତ୍ୱ ଦିଆଯାଇଛି।