ଦେହରାଦୁନସ୍ଥିତ ଇଣ୍ଡିଆନ୍ ମିଲିଟାରୀ ଏକାଡେମୀ (IMA)ର ୧୫୮ତମ ରେଗୁଲାର କୋର୍ସ ଓ ୧୪୧ତମ ଟେକ୍ନିକାଲ୍ ଗ୍ରାଜୁଏଟ୍ କୋର୍ସର ପାସିଂ ଆଉଟ୍ ପରେଡ୍ରେ ଯୋଗଦେଇ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମହିଳା କ୍ୟାଡେଟମାନଙ୍କ ଅଂଶଗ୍ରହଣକୁ ନେଇ ଗର୍ବ ପ୍ରକାଶ କରିଛନ୍ତି। ପ୍ରଥମ ଥର ପାଇଁ IMAରୁ ୯ ଜଣ ମହିଳା କ୍ୟାଡେଟ ପ୍ରଶିକ୍ଷଣ ସମ୍ପୂର୍ଣ୍ଣ କରି ଭାରତୀୟ ସେନାରେ ଅଫିସର ଭାବେ ଯୋଗଦେବାକୁ ଯାଉଛନ୍ତି।

ରାଷ୍ଟ୍ରପତି କହିଥିଲେ ଯେ, “୯ ଜଣ ମହିଳା କ୍ୟାଡେଟଙ୍କୁ ଏଠାରେ ଦେଖି ମୁଁ ବିଶେଷ ଭାବେ ଆନନ୍ଦିତ। ଏହା IMAର ଇତିହାସରେ ଏକ ଯୁଗାନ୍ତକାରୀ ମୁହୂର୍ତ୍ତ। ଏହା କେବଳ ଭାରତୀୟ ପ୍ରତିରକ୍ଷା ବାହିନୀର ଇତିହାସରେ ନୁହେଁ, ବରଂ ମହିଳା ନେତୃତ୍ୱାଧୀନ ବିକାଶର ଏକ ପ୍ରେରଣାଦାୟକ ଉଦାହରଣ।”

ସେ ଆଶା ପ୍ରକାଶ କରିଥିଲେ ଯେ ଆଗାମୀ ଦିନରେ ଆହୁରି ଅଧିକ ସଂଖ୍ୟାରେ ମହିଳା କ୍ୟାଡେଟ IMAରେ ଯୋଗଦେବେ ଏବଂ ଭାରତୀୟ ସେନାର ନେତୃତ୍ୱରେ ନିଜର ଯୋଗଦାନ ରଖିବେ।

ରାଷ୍ଟ୍ରପତି IMAର ଗୌରବମୟ ଐତିହ୍ୟର ପ୍ରଶଂସା କରି କହିଥିଲେ ଯେ ଏହି ଏକାଡେମୀ ସମ୍ମାନ, ସାହସ ଓ ନିଷ୍ଠାପୂର୍ଣ୍ଣ ଜାତିସେବାର ପ୍ରତୀକ। ଦେଶର ସୀମା ସୁରକ୍ଷା କରିଥିବା ଅନେକ ବୀର ସାମରିକ ନେତା ଏହି ପ୍ରତିଷ୍ଠିତ ଅନୁଷ୍ଠାନରୁ ପ୍ରଶିକ୍ଷଣ ନେଇ ବାହାରିଛନ୍ତି।

ଏହି ପାସିଂ ଆଉଟ୍ ପରେଡ୍ରେ ମୋଟ ୫୧୫ ଜଣ ଜେଣ୍ଟଲମ୍ୟାନ୍ ଓ ଲେଡି କ୍ୟାଡେଟ ଭାରତୀୟ ସେନାରେ କମିଶନ୍ ପାଇଛନ୍ତି। ସେମାନଙ୍କ ମଧ୍ୟରେ ୯ ଜଣ ମହିଳା କ୍ୟାଡେଟ ରହିଛନ୍ତି। ଏଥିସହ ୧୬ଟି ବନ୍ଧୁ ଦେଶର ୩୪ ଜଣ ବିଦେଶୀ କ୍ୟାଡେଟ ମଧ୍ୟ ନିଜ ନିଜ ଦେଶର ସେନାରେ ଯୋଗଦେବେ।

ଚଳିତ ବର୍ଷର ପାସିଂ ଆଉଟ୍ ପରେଡ୍ IMAର ୯୪ ବର୍ଷର ଇତିହାସରେ ଏକ ବିଶେଷ ସ୍ଥାନ ଅଧିକାର କରିଛି। ୨୦୨୫ ଜୁଲାଇରେ ଏକାଡେମୀରେ ଯୋଗଦେଇଥିବା ଏହି ୯ ଜଣ ମହିଳା କ୍ୟାଡେଟ ସଫଳତାର ସହ ପ୍ରଶିକ୍ଷଣ ସମାପ୍ତ କରି ପୁରୁଷ କ୍ୟାଡେଟଙ୍କ ସହ ପାଦ ମିଳାଇ ପରେଡ୍ରେ ଅଂଶଗ୍ରହଣ କରିଛନ୍ତି।

ଏହା ଭାରତୀୟ ସଶସ୍ତ୍ର ବାହିନୀରେ ମହିଳାଙ୍କ ବଢ଼ୁଥିବା ଭୂମିକା ଓ ସାମରିକ ନେତୃତ୍ୱରେ ସମାନ ସୁଯୋଗର ଆଉ ଏକ ମାଇଲଖୁଣ୍ଟ ବୋଲି ବିବେଚନା କରାଯାଉଛି।

୧୯୩୨ ମସିହାରେ ସ୍ଥାପିତ IMA ଏପର୍ଯ୍ୟନ୍ତ ୬୫ ହଜାରରୁ ଅଧିକ କ୍ୟାଡେଟଙ୍କୁ ପ୍ରଶିକ୍ଷଣ ଦେଇଛି। ଏଥିରେ ୩୪ଟି ବନ୍ଧୁ ରାଷ୍ଟ୍ରର କ୍ୟାଡେଟମାନେ ମଧ୍ୟ ସାମିଲ ରହିଛନ୍ତି। ମହିଳା କ୍ୟାଡେଟଙ୍କ ଏହି ପ୍ରଥମ ବ୍ୟାଚ୍ର ସଫଳତା IMAର ଇତିହାସରେ ଏକ ନୂଆ ଅଧ୍ୟାୟ ଯୋଡ଼ିଛି।