ରାଷ୍ଟ୍ରପତି ଦ୍ରୌପଦୀ ମୁର୍ମୁ ଅକ୍ଟୋବର ୨୮ ଓ ୨୯ ତାରିଖରେ ଓଡ଼ିଶାର ମୟୂରଭଞ୍ଜ ଜିଲ୍ଲା ଗସ୍ତ କରିବେ। ତାଙ୍କର ଦୁଇଦିନିଆ ଗସ୍ତକୁ ନେଇ ରାଇରଙ୍ଗପୁର ଓ ଆଖପାଖ ଅଞ୍ଚଳରେ ପ୍ରଶାସନିକ ପ୍ରସ୍ତୁତି ଆରମ୍ଭ ହୋଇଛି। ବିଶେଷକରି ସୁରକ୍ଷା, ଯାତାୟାତ ଓ କାର୍ଯ୍ୟକ୍ରମସ୍ଥଳ ପ୍ରସ୍ତୁତି ଉପରେ ଗୁରୁତ୍ୱ ଦିଆଯାଉଛି। 

ଅକ୍ଟୋବର ୨୮ରେ ରାଷ୍ଟ୍ରପତି ଦାଣ୍ଡବୋଷ ବିମାନଘାଟିରେ ପହଞ୍ଚିବା ପରେ ବହଳଦାସ୍ଥିତ ମା’ କିଚକେଶ୍ୱରୀ ମନ୍ଦିର ଦର୍ଶନ କରିବା ସହ ରାଇରଙ୍ଗପୁରର ମହୁଲଡିହା ଲକ୍ଷ୍ମୀ ମଣ୍ଡପ ଓ ଅନ୍ୟାନ୍ୟ ସ୍ଥାନ ଗସ୍ତ କରିବାର କାର୍ଯ୍ୟକ୍ରମ ରହିଛି। ସେ ରାଇରଙ୍ଗପୁର ଉପଖଣ୍ଡ ଡାକ୍ତରଖାନା ଯାଇ ସ୍ୱାସ୍ଥ୍ୟ ଶିବିର ସହ ଜଡ଼ିତ ଅଧିକାରୀ, କର୍ମଚାରୀ ଓ ହିତାଧିକାରୀଙ୍କ ସହ ଆଲୋଚନା କରିବେ। 

ଏହା ସହ ରାଇରଙ୍ଗପୁରରେ ଏକ ସାଧାରଣ ସଭାରେ ଯୋଗଦେବା ଏବଂ ଇଣ୍ଡିଆନ୍ ଇନ୍‌ଷ୍ଟିଚ୍ୟୁଟ୍ ଅଫ୍ ଫରେଷ୍ଟ ମ୍ୟାନେଜମେଣ୍ଟର କ୍ୟାମ୍ପସ୍ ପାଇଁ ଭିତ୍ତିପ୍ରସ୍ତର ସ୍ଥାପନର କାର୍ଯ୍ୟକ୍ରମ ରହିଛି। ରାଇରଙ୍ଗପୁର ଓ ବାଦାମପାହାଡ଼ର ନବନିର୍ମିତ ଅମୃତ ଭାରତ ରେଳ ଷ୍ଟେସନ୍ ମଧ୍ୟ ଉଦ୍‌ଘାଟନ କରିବାର କାର୍ଯ୍ୟକ୍ରମ ସୂଚିତ ହୋଇଛି। 

ଅକ୍ଟୋବର ୨୯ରେ ରାଷ୍ଟ୍ରପତି ରାଇରଙ୍ଗପୁର ସ୍ପୋର୍ଟସ କମ୍ପ୍ଲେକ୍ସ, ମଲ୍ଟି-ସ୍କିଲ୍ ଡେଭଲପମେଣ୍ଟ ସେଣ୍ଟର ଓ ଗୋରୁମହିଷାଣୀ ଆଇରନ୍ କଲେଜ ଗସ୍ତ କରିବେ। ପରେ ରାଇରଙ୍ଗପୁର ଟାଉନ୍ ହଲ୍‌ରେ ସ୍ୱାସ୍ଥ୍ୟ ସମ୍ପର୍କିତ ଆଲୋଚନା ଓ ସଚେତନତା କାର୍ଯ୍ୟକ୍ରମରେ ଯୋଗଦେଇ ଓଡ଼ିଶା ଗସ୍ତ ଶେଷ କରିବେ। 

ରାଷ୍ଟ୍ରପତିଙ୍କ ଗସ୍ତ ପୂର୍ବରୁ ତାଙ୍କ କାରକେଡ୍‌ ଯାତାୟାତ କରିବାକୁ ଥିବା ବିଭିନ୍ନ ରୁଟ୍‌ର ଦୂରତା, ଯାତ୍ରା ସମୟ ଓ ରାସ୍ତାର ସ୍ଥିତି ଯାଞ୍ଚ କରାଯାଉଛି। ସୁରକ୍ଷା ଓ ସମନ୍ୱୟ ପାଇଁ ରାଜ୍ୟ ଗୃହ ବିଭାଗ ପକ୍ଷରୁ କଣ୍ଟ୍ରୋଲ୍ ରୁମ୍ ମଧ୍ୟ କାର୍ଯ୍ୟ କରିବ।