ଭାରତ-ଆମେରିକା ସମ୍ପର୍କକୁ ନେଇ ଆମେରିକୀୟ ରାଷ୍ଟ୍ରଦୂତ ସର୍ଜିଓ ଗୋର୍ ବଡ଼ ମନ୍ତବ୍ୟ ଦେଇଛନ୍ତି। ତାଙ୍କ କହିବା ଅନୁଯାୟୀ, ଡିସେମ୍ବରରେ ଫ୍ଲୋରିଡାରେ ହେବାକୁ ଥିବା G20 ସମ୍ମିଳନୀରେ ଆମେରିକୀୟ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଯେଉଁ ବିଶ୍ୱ ନେତାମାନଙ୍କୁ ଭେଟିବାକୁ ଚାହିଁବେ, ସେହି ତାଲିକାରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶୀର୍ଷରେ ରହିବେ।

ଗୋର୍ କହିଛନ୍ତି ଯେ ଟ୍ରମ୍ପ ଓ ମୋଦୀଙ୍କ ମଧ୍ୟରେ ବ୍ୟକ୍ତିଗତ ସମ୍ପର୍କ ଭଲ ରହିଛି। ତେଣୁ G20ର ବହୁପକ୍ଷୀୟ ବୈଠକ ବ୍ୟତୀତ ଦୁଇ ନେତାଙ୍କ ମଧ୍ୟରେ ଅଲଗା ଆଲୋଚନା ହେବାର ସମ୍ଭାବନା ଥାଇପାରେ ବୋଲି ସେ ଆଶା ପ୍ରକାଶ କରିଛନ୍ତି। ତେବେ ଏପର୍ଯ୍ୟନ୍ତ କୌଣସି ଦ୍ୱିପାକ୍ଷିକ ବୈଠକ ଆଧିକାରିକ ଭାବେ ଘୋଷଣା ହୋଇନାହିଁ।

ଆମେରିକୀୟ ରାଷ୍ଟ୍ରଦୂତ ଟ୍ରମ୍ପଙ୍କ ଭାରତ ପ୍ରତି ଆଗ୍ରହର ମଧ୍ୟ ଉଲ୍ଲେଖ କରିଛନ୍ତି। ୨୦୨୦ରେ ତାଙ୍କ ଭାରତ ଗସ୍ତକୁ ଟ୍ରମ୍ପ ଭଲ ଭାବେ ମନେ ପକାନ୍ତି ଏବଂ ଭବିଷ୍ୟତରେ ସେ ଭାରତ ଗସ୍ତ କରିପାରନ୍ତି ବୋଲି ଗୋର୍ ସଙ୍କେତ ଦେଇଛନ୍ତି।

ଭାରତ-ଆମେରିକା ବାଣିଜ୍ୟ ଚୁକ୍ତି ଉପରେ ଆଶା

ପ୍ରସ୍ତାବିତ ଭାରତ-ଆମେରିକା ବାଣିଜ୍ୟ ଚୁକ୍ତି ଉପରେ ମଧ୍ୟ ଗୋର୍ ସକାରାତ୍ମକ ମତ ଦେଇଛନ୍ତି। ଆମେରିକୀୟ ସୁପ୍ରିମକୋର୍ଟଙ୍କ ଏକ ରାୟ ପରେ ଆଲୋଚନାକୁ ପୁନଃସଜାଯାଉଥିଲେ ମଧ୍ୟ ଉଭୟ ପକ୍ଷ ଚୁକ୍ତିର ଅତି ନିକଟରେ ପହଞ୍ଚିଛନ୍ତି ବୋଲି ସେ କହିଛନ୍ତି। ଆଗାମୀ କିଛି ମାସ ମଧ୍ୟରେ ଚୁକ୍ତି ଚୂଡ଼ାନ୍ତ ହୋଇପାରେ ବୋଲି ସେ ଆଶା ରଖିଛନ୍ତି।

ବର୍ତ୍ତମାନ ଭାରତ-ଆମେରିକା ଦ୍ୱିପାକ୍ଷିକ ବାଣିଜ୍ୟ ପ୍ରାୟ୨୪୦ ବିଲିୟନ ଡଲାରଥିବା ବେଳେ ଏହାକୁ ଆଗାମୀ କିଛି ବର୍ଷରେ୫୦୦ ବିଲିୟନ ଡଲାରକୁ ବଢ଼ାଇବାର ଲକ୍ଷ୍ୟ ରହିଛି।

‘ଭାରତ ଏକ ବିଶ୍ୱସ୍ତ ପ୍ରତିରକ୍ଷା ସହଯୋଗୀ’

ଗୋର୍ ଭାରତକୁ ଆମେରିକାର ଜଣେ ବିଶ୍ୱସ୍ତ ପ୍ରତିରକ୍ଷା ସହଯୋଗୀ ବୋଲି ବର୍ଣ୍ଣନା କରିଛନ୍ତି। ଭାରତ-ଆମେରିକା ପ୍ରତିରକ୍ଷା ସମ୍ପର୍କ କେବଳ ଅସ୍ତ୍ର ବିକ୍ରି ମଧ୍ୟରେ ସୀମିତ ନୁହେଁ, ବରଂ ପରସ୍ପର ବିଶ୍ୱାସ ଉପରେ ଆଧାରିତ ବୋଲି ସେ କହିଛନ୍ତି। ଜାଭେଲିନ୍ କ୍ଷେପଣାସ୍ତ୍ର ପ୍ରକଳ୍ପ, ଆପାଚି ହେଲିକପ୍ଟର ଯୋଗାଣ ଓ ଅନ୍ୟାନ୍ୟ ପ୍ରତିରକ୍ଷା ଉପକରଣ ନେଇ ଆଲୋଚନାକୁ ସେ ସହଯୋଗର ଉଦାହରଣ ଭାବେ ଦର୍ଶାଇଛନ୍ତି।

ଭାରତ ଆମେରିକା ସହ ଅନ୍ୟ ଯେକୌଣସି ଦେଶ ତୁଳନାରେ ଅଧିକ ସଂଖ୍ୟକ ମିଳିତ ସାମରିକ ଅଭ୍ୟାସ କରୁଥିବା ବୋଲି ମଧ୍ୟ ଗୋର୍ କହିଛନ୍ତି।

ଆହୁରି ଅଧିକ ଉଚ୍ଚସ୍ତରୀୟ ଗସ୍ତ

ଭାରତ-ଆମେରିକା ସମ୍ପର୍କକୁ ଆହୁରି ନିକଟତର କରିବା ପାଇଁ ଆମେରିକାର ଶୀର୍ଷ ଅଧିକାରୀମାନଙ୍କ ଭାରତ ଗସ୍ତ ବଢ଼ିବ ବୋଲି ଗୋର୍ କହିଛନ୍ତି। ଆମେରିକୀୟ ବିଦେଶ ସଚିବ ମାର୍କୋ ରୁବିଓ ଅକ୍ଟୋବରରେ ପୁଣି ଭାରତ ଆସିବେ ବୋଲି ସେ ନିଶ୍ଚିତ କରିଛନ୍ତି। ଏହାଛଡ଼ା ଅନ୍ୟ କିଛି ଆମେରିକୀୟ କ୍ୟାବିନେଟ୍ ସଦସ୍ୟ ଏବଂ ତିନିଟି ବଡ଼ ଆମେରିକୀୟ ରାଜ୍ୟର ଗଭର୍ଣ୍ଣର ମଧ୍ୟ ଭାରତ ଆସିବାର ଯୋଜନା ରହିଛି।

ସେହିପରି ଭାରତ, ଆମେରିକା, ଜାପାନ ଓ ଅଷ୍ଟ୍ରେଲିଆକୁ ନେଇ ଗଠିତQUADକୁ ମଧ୍ୟ ଗୋର୍ ଗୁରୁତ୍ୱପୂର୍ଣ୍ଣ ସହଯୋଗ ମଞ୍ଚ ବୋଲି କହିଛନ୍ତି। ଚାରି ଦେଶ ମାନବୀୟ ସହାୟତା, ବିପର୍ଯ୍ୟୟ ପରିଚାଳନା, ସାମରିକ ସମନ୍ୱୟ, AI, ଡାଟା ସେଣ୍ଟର ଓ ଗୁରୁତ୍ୱପୂର୍ଣ୍ଣ ଖଣିଜ କ୍ଷେତ୍ରରେ ସହଯୋଗ କରୁଛନ୍ତି।