ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଶନିବାର ଆମେରିକାର ଉପରାଷ୍ଟ୍ରପତି ଜେଡି ଭାନ୍ସଙ୍କ ସହ ଫୋନ୍ରେ କଥା ହୋଇଛନ୍ତି। ଉଭୟ ନେତାଭାରତ-ଆମେରିକା ବ୍ୟାପକ ବୈଶ୍ୱିକ ରଣନୀତିକ ସହଭାଗିତାକୁ ବିଭିନ୍ନ ପ୍ରମୁଖ କ୍ଷେତ୍ରରେ ଆହୁରି ଗଭୀର କରିବା ଉପାୟ ନେଇ ଆଲୋଚନା କରିଥିବା ମୋଦୀ ଜଣାଇଛନ୍ତି।

ଫୋନ୍ ଆଲୋଚନା ପରେ ପ୍ରଧାନମନ୍ତ୍ରୀ ଏହି କଥା ସୋସିଆଲ ମିଡିଆରେ ଜଣାଇଥିଲେ। ଦ୍ୱିପାକ୍ଷିକ ସମ୍ପର୍କରେ ବାଣିଜ୍ୟ, ପ୍ରତିରକ୍ଷା, ଉଦୀୟମାନ ପ୍ରଯୁକ୍ତି, ଶକ୍ତି ସୁରକ୍ଷା ଓ ଗୁରୁତ୍ୱପୂର୍ଣ୍ଣ ଖଣିଜ ଭଳି କ୍ଷେତ୍ରରେ ସହଯୋଗ ବଢ଼ାଇବା ଉପରେ ଗୁରୁତ୍ୱ ରହିଥିବା ରିପୋର୍ଟରେ ଉଲ୍ଲେଖ ହୋଇଛି।

ଏହି ଅବସରରେ ମୋଦୀ ଜେଡି ଭାନ୍ସ ଓ ତାଙ୍କ ପତ୍ନୀ ଉଷା ଭାନ୍ସଙ୍କ ପୁଅ ଜନ୍ମ ନେଇଥିବାରୁ ଅଭିନନ୍ଦନ ଜଣାଇବା ସହ ସମଗ୍ର ପରିବାରକୁ ଶୁଭେଚ୍ଛା ଜଣାଇଥିଲେ।

ଏହି ଆଲୋଚନା ଏଭଳି ସମୟରେ ହୋଇଛି, ଯେତେବେଳେ ଭାରତ-ଆମେରିକା ସମ୍ପର୍କରେ ବାଣିଜ୍ୟ ଓ ଶକ୍ତି ନୀତି ସମେତ ବିଭିନ୍ନ ପ୍ରସଙ୍ଗ ଚର୍ଚ୍ଚାରେ ରହିଛି।

ସେପଟେ, ଷ୍ଟ୍ରେଟ୍ ଅଫ୍ ହର୍ମୁଜ୍ ଦେଇ ବାଣିଜ୍ୟିକ ଜାହାଜ ଚଳାଚଳକୁ ସୁରକ୍ଷିତ କରିବା ପାଇଁ ଆମେରିକା ପକ୍ଷରୁ ରାସ୍ତା ଖୋଜାଯାଉଥିବା ଜେଡି ଭାନ୍ସ କହିଥିବା ରିପୋର୍ଟ ଆସିଛି। ଏହି ଅଞ୍ଚଳର ଅସ୍ଥିରତା ବିଶ୍ୱ ଶକ୍ତି ବଜାର ଉପରେ ମଧ୍ୟ ପ୍ରଭାବ ପକାଇପାରେ।

ଏହା ସହିତ ରୁଷିଆରୁ ତେଲ ଓ ଗ୍ୟାସ୍ ଆମଦାନି କରୁଥିବା ଦେଶଗୁଡ଼ିକ ଉପରେ ଅଧିକ ଆର୍ଥିକ ଚାପ ପକାଇବା ସମ୍ପର୍କିତ ଆମେରିକୀୟ ସିନେଟ୍ର ଏକ ବିଲ୍ ମଧ୍ୟ ଚର୍ଚ୍ଚାରେ ରହିଛି। ଏହାର ପ୍ରସ୍ତାବିତ ବ୍ୟବସ୍ଥା ଅନୁସାରେ ରୁଷିଆର ଶକ୍ତି କିଣୁଥିବା କିଛି ଦେଶର ସାମଗ୍ରୀ ଉପରେ ଉଚ୍ଚ ଶୁଳ୍କ ଲାଗୁ କରିବାର କ୍ଷମତା ଆମେରିକୀୟ ରାଷ୍ଟ୍ରପତିଙ୍କୁ ଦେବାର ପ୍ରସ୍ତାବ ରହିଛି।

ଭାରତ ତା’ର ଶକ୍ତି ଆମଦାନି ନୀତିଜାତୀୟ ସ୍ୱାର୍ଥ, ଶକ୍ତି ସୁରକ୍ଷା ଓ ଦେଶବାସୀଙ୍କୁ ସୁଲଭ ଏବଂ ନିରନ୍ତର ଶକ୍ତି ଯୋଗାଣକୁ ଆଧାର କରି ନିର୍ଦ୍ଧାରଣ କରୁଥିବା କହିଆସିଛି।