ପେନ୍‌ସନ୍‌ ଯୋଜନାକୁ ନେଇ କେନ୍ଦ୍ର ସରକାର ଏକ ବଡ଼ ନିଷ୍ପତ୍ତି ନେଇଛନ୍ତି। ଜାତୀୟ ସାମାଜିକ ସହାୟତା କାର୍ଯ୍ୟକ୍ରମ (NSAP)କୁ ୨୦୨୬-୨୭ରୁ ୨୦୩୦-୩୧ ପର୍ଯ୍ୟନ୍ତ ଆଉ ପାଞ୍ଚ ବର୍ଷ ଜାରି ରଖିବାକୁ କେନ୍ଦ୍ର କ୍ୟାବିନେଟ୍‌ ଅନୁମୋଦନ ଦେଇଛି। ଏଥିପାଇଁ ମୋଟ ୫୩,୪୨୮ କୋଟି ଟଙ୍କାର ବ୍ୟୟବରାଦ କରାଯାଇଛି।

ଦିବ୍ୟାଙ୍ଗ ପେନ୍‌ସନ୍‌ ନିୟମରେ ବଡ଼ ପରିବର୍ତ୍ତନ

ଏହି ନିଷ୍ପତ୍ତିରେ ଦିବ୍ୟାଙ୍ଗ ପେନ୍‌ସନ୍‌ ପାଇବା ପାଇଁ ଆବଶ୍ୟକ ଦିବ୍ୟାଙ୍ଗତାର ମାନଦଣ୍ଡକୁ ୮୦%ରୁ ୪୦%କୁ କମାଇବାକୁ ଅନୁମୋଦନ ମିଳିଛି। ଅର୍ଥାତ୍‌, ଯୋଜନାର ଅନ୍ୟାନ୍ୟ ଯୋଗ୍ୟତା ସର୍ତ୍ତ ପୂରଣ କରୁଥିବା ୪୦% ଦିବ୍ୟାଙ୍ଗତା ଥିବା ବ୍ୟକ୍ତିମାନେ ମଧ୍ୟ ପେନ୍‌ସନ୍‌ ପାଇଁ ଯୋଗ୍ୟ ହୋଇପାରିବେ। ଏହା ସହ ପେନ୍‌ସନ୍‌ ପାଇଁ ସର୍ବନିମ୍ନ ବୟସ ସର୍ତ୍ତ ହଟାଯାଇ ଜନ୍ମରୁ ଯୋଗ୍ୟତାର ବ୍ୟବସ୍ଥାକୁ ଅନୁମୋଦନ କରାଯାଇଛି।

କେତେ ମିଳିବ ମାସିକ ସହାୟତା?

ସରକାରୀ ସୂଚନା ଅନୁଯାୟୀ, ଦିବ୍ୟାଙ୍ଗ ପେନ୍‌ସନ୍‌ ଯୋଜନାରେ ୦ରୁ ୭୯ ବର୍ଷ ବୟସର ଯୋଗ୍ୟ ହିତାଧିକାରୀଙ୍କୁ ମାସିକ ୩୭୫ ଟଙ୍କା ଏବଂ ୮୦ ବର୍ଷ କିମ୍ବା ତା’ଠାରୁ ଅଧିକ ବୟସର ହିତାଧିକାରୀଙ୍କୁ ମାସିକ ୬୨୫ ଟଙ୍କା ସହାୟତା ଦେବାର ବ୍ୟବସ୍ଥା ରହିଛି।

ଯୋଜନାର ନାମ ବଦଳିବ

ଜାତୀୟ ସାମାଜିକ ସହାୟତା କାର୍ଯ୍ୟକ୍ରମର ନାମ ବଦଳାଇ ‘ପ୍ରଧାନମନ୍ତ୍ରୀ ସାମାଜିକ ସହାୟତା ଯୋଜନା’ କରିବାକୁ ମଧ୍ୟ ଅନୁମୋଦନ ମିଳିଛି। ତେବେ ବୃଦ୍ଧାବସ୍ଥା ପେନ୍‌ସନ୍‌, ବିଧବା ପେନ୍‌ସନ୍‌ ଓ ଜାତୀୟ ପରିବାର ସହାୟତା ଯୋଜନା ପୂର୍ବବତ୍‌ ଜାରି ରହିବ।

କେବେ ଲାଗୁ ହେବ ନୂଆ ନିୟମ?

ଦିବ୍ୟାଙ୍ଗ ପେନ୍‌ସନ୍‌ର ନୂଆ ଯୋଗ୍ୟତା, ହିତାଧିକାରୀଙ୍କ ସଂଖ୍ୟା ଓ ସହାୟତା ରାଶି ସମ୍ପର୍କିତ ବିସ୍ତୃତ ନିର୍ଦ୍ଦେଶାବଳୀ ତିନି ମାସ ମଧ୍ୟରେ ଜାରି କରିବାକୁ ସରକାର ଲକ୍ଷ୍ୟ ରଖିଛନ୍ତି। ତେଣୁ ଯୋଗ୍ୟ ବ୍ୟକ୍ତିମାନେ ନିଜ ରାଜ୍ୟର ସରକାରୀ ନିର୍ଦ୍ଦେଶାବଳୀ ଓ ଆବେଦନ ପ୍ରକ୍ରିୟା ସମ୍ପର୍କରେ ଅଧିକାରିକ ସୂଚନା ଯାଞ୍ଚ କରିବା ଉଚିତ।

ସରକାରଙ୍କ ଅନୁମୋଦନ ଅନୁଯାୟୀ, ଦେଶର ୩୬ଟି ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ପ୍ରାୟ ୩.୨୦ କୋଟି ହିତାଧିକାରୀ ଏହି ପରିବର୍ତ୍ତନରୁ ଉପକୃତ ହେବେ।