ପେଟିଏମ୍ ପେମେଣ୍ଟ୍ସ ବ୍ୟାଙ୍କ ଲିମିଟେଡ୍‌କୁ ନେଇ ବଡ଼ ନିଷ୍ପତ୍ତି ନେଇଛନ୍ତି ଦିଲ୍ଲୀ ହାଇକୋର୍ଟ। ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆ (RBI)ର ବ୍ୟାଙ୍କିଙ୍ଗ ଲାଇସେନ୍ସ ବାତିଲ ପରେ ଏବେ କୋର୍ଟ ବ୍ୟାଙ୍କକୁ ବନ୍ଦ କରିବା ପାଇଁ ନିର୍ଦ୍ଦେଶ ଜାରି କରିଛନ୍ତି। ଏହି ନିଷ୍ପତ୍ତି ବ୍ୟାଙ୍କିଙ୍ଗ ରେଗୁଲେସନ୍ ଆକ୍ଟ, ୧୯୪୯ ଏବଂ କମ୍ପାନିଜ୍ ଆକ୍ଟ, ୨୦୧୩ ଅନୁଯାୟୀ ନିଆଯାଇଛି।

ଆରବିଆଇ ପକ୍ଷରୁ ଜାରି ବିଜ୍ଞପ୍ତି ଅନୁସାରେ, ଦିଲ୍ଲୀ ହାଇକୋର୍ଟ ୮ ଜୁଲାଇ ଏବଂ ୨୨ ଜୁଲାଇ ୨୦୨୬ର ଆଦେଶ ଆଧାରରେ ପେଟିଏମ୍ ପେମେଣ୍ଟ୍ସ ବ୍ୟାଙ୍କକୁ ବନ୍ଦ କରିବା ପ୍ରକ୍ରିୟାକୁ ଅନୁମୋଦନ କରିଛନ୍ତି। କୋର୍ଟ ଭାରତୀୟ ଷ୍ଟେଟ୍ ବ୍ୟାଙ୍କର ପୂର୍ବତନ ଚିଫ୍ ଜେନେରାଲ୍ ମ୍ୟାନେଜର ଗିରିକୁମାର ଏମ୍. ନାୟରଙ୍କୁ ଅଫିସିଆଲ୍ ଲିକ୍ୱିଡେଟର ଭାବେ ନିଯୁକ୍ତ କରିଛନ୍ତି। ସେ ବ୍ୟାଙ୍କର ବୋର୍ଡର ସମସ୍ତ କ୍ଷମତା ବ୍ୟବହାର କରି ବନ୍ଦ ପ୍ରକ୍ରିୟା ସମ୍ପନ୍ନ କରିବେ।

ଉଲ୍ଲେଖଯୋଗ୍ୟ ଯେ, ଆରବିଆଇ ଏପ୍ରିଲ୍ ୨୦୨୬ରେ ନିୟମର ବାରମ୍ବାର ଉଲ୍ଲଂଘନ ଏବଂ ଗ୍ରାହକଙ୍କ ସ୍ୱାର୍ଥ ବିରୋଧୀ କାର୍ଯ୍ୟକଳାପ ଅଭିଯୋଗରେ ପେଟିଏମ୍ ପେମେଣ୍ଟ୍ସ ବ୍ୟାଙ୍କର ବ୍ୟାଙ୍କିଙ୍ଗ ଲାଇସେନ୍ସ ବାତିଲ କରିଥିଲା। ଏହାପରେ ବ୍ୟାଙ୍କକୁ ବନ୍ଦ କରିବା ପାଇଁ ଦିଲ୍ଲୀ ହାଇକୋର୍ଟରେ ଆବେଦନ କରାଯାଇଥିଲା।

ଏହାପୂର୍ବରୁ ମାର୍ଚ୍ଚ ୨୦୨୨ରେ ଆରବିଆଇ ବ୍ୟାଙ୍କରେ ନୂଆ ଗ୍ରାହକ ଯୋଡ଼ିବା ଉପରେ ରୋକ୍ ଲଗାଇଥିଲା। ପରେ ୨୦୨୪ରେ ବ୍ୟାଙ୍କ ଉପରେ ଆହୁରି କଟକଣା ଲଗାଯାଇ ନୂଆ ଜମା ଗ୍ରହଣ, ୱାଲେଟ୍ ଟପ୍-ଅପ୍, ପ୍ରିପେଡ୍ ଇନଷ୍ଟ୍ରୁମେଣ୍ଟ ଏବଂ ଅନ୍ୟାନ୍ୟ ବ୍ୟାଙ୍କିଙ୍ଗ ସେବା ଉପରେ ପ୍ରତିବନ୍ଧକ ଲଗାଯାଇଥିଲା।

ଆରବିଆଇର କହିବା ଅନୁଯାୟୀ, ବ୍ୟାଙ୍କର ପରିଚାଳନା କେବଳ ନିୟମ ଉଲ୍ଲଂଘନ କରିନଥିଲା, ବରଂ ଜମାକାରୀଙ୍କ ସ୍ୱାର୍ଥକୁ ମଧ୍ୟ ବିପଦରେ ପକାଉଥିଲା। ଏହି କାରଣରୁ ଶେଷରେ ବ୍ୟାଙ୍କିଙ୍ଗ ଲାଇସେନ୍ସ ବାତିଲ ସହ ବ୍ୟାଙ୍କକୁ ବନ୍ଦ କରିବାର ନିଷ୍ପତ୍ତି ନିଆଯାଇଛି।