ଜମ୍ମୁ-କଶ୍ମୀରର ଅଖନୁର ସେକ୍ଟର ଅଧୀନ ଅନ୍ତର୍ଜାତିକ ସୀମା ନିକଟରେ ସୀମା ସୁରକ୍ଷା ବଳ (BSF) ଜଣେ ପାକିସ୍ତାନୀ ନାଗରିକଙ୍କୁ ଗିରଫ କରିଛି। ପରଗୱାଲ ଅଞ୍ଚଳରେ ବିଳମ୍ବିତ ରାତିରେ ସନ୍ଦିଗ୍ଧ ଗତିବିଧି ଦେଖିବା ପରେ ବିଏସଏଫ ଯବାନମାନେ ତୁରନ୍ତ କାର୍ଯ୍ୟାନୁଷ୍ଠାନ କରି ଅନୁପ୍ରବେଶ ଉଦ୍ୟମକୁ ବିଫଳ କରିଥିଲେ।

ଗିରଫ ବ୍ୟକ୍ତିଙ୍କ ପରିଚୟ ପାକିସ୍ତାନର ମହମ୍ମଦ ରଫିକ୍ ଓରଫ କାଲା ବୋଲି ଜଣାପଡ଼ିଛି। ପ୍ରାଥମିକ ପଚରାଉଚରା ବେଳେ ସେ ଭୁଲବଶତଃ ଭାରତୀୟ ସୀମା ଭିତରକୁ ପ୍ରବେଶ କରିଥିବା ଦାବି କରିଛନ୍ତି। ତେବେ ସୁରକ୍ଷା ଏଜେନ୍ସି ତାଙ୍କ ବୟାନର ସତ୍ୟତା ଯାଞ୍ଚ କରୁଛି।

ଅଧିକାରୀଙ୍କ ସୂଚନା ଅନୁସାରେ, ପରଗୱାଲ ସୀମା ଆଉଟ୍ ପୋଷ୍ଟ (BOP)ରେ ମୁତୟନ ଯବାନମାନେ ସୀମା ନିକଟରେ ସନ୍ଦିଗ୍ଧ ଗତିବିଧି ଦେଖିଥିଲେ। ସନ୍ତରୀ ଅଟକିବାକୁ ଚେତାବନୀ ଦେଇଥିଲେ ମଧ୍ୟ ସେ ଆଗକୁ ବଢ଼ିବାରୁ ଯବାନମାନେ ତୁରନ୍ତ ତାଙ୍କୁ କାବୁ କରିଥିଲେ। ପରେ ପଚରାଉଚରା ପାଇଁ ତାଙ୍କୁ ବିଓପିକୁ ନିଆଯାଇଥିଲା।

ପଚରାଉଚରା ସମୟରେ ମହମ୍ମଦ ରଫିକ୍ ନିଜକୁ ପାକିସ୍ତାନର ପିଣ୍ଡି ଗାଁର ବାସିନ୍ଦା ବୋଲି କହିଥିଲେ। ସେ ଦାବି କରିଛନ୍ତି ଯେ, ନିଜ ଭଉଣୀଙ୍କୁ ଭେଟିବାକୁ ଯାଉଥିବା ବେଳେ ରାସ୍ତା ଭୁଲି ଅଜାଣତରେ ଭାରତୀୟ ସୀମାରେ ପ୍ରବେଶ କରିଥିଲେ। ତେବେ ସୁରକ୍ଷା ସଂସ୍ଥା ଏହି ଦାବିକୁ ଗୁରୁତ୍ୱର ସହ ଯାଞ୍ଚ କରୁଛି।

ତଲାସି ସମୟରେ ତାଙ୍କ ନିକଟରୁ ପାକିସ୍ତାନର ଜାତୀୟ ପରିଚୟପତ୍ର, ଚଷମା, ସିଗାରେଟ୍ ପ୍ୟାକେଟ୍, ଲାଇଟର, ତମାଖୁ, କେକ୍, ମ୍ୟାଙ୍ଗୋ ବିସ୍କୁଟ, ଚକୋଲେଟ୍, ନେଲ୍ କଟର ଏବଂ ଏକ ୱାଲେଟ୍ ଜବତ କରାଯାଇଛି। ଜବତ ସାମଗ୍ରୀଗୁଡ଼ିକର ମଧ୍ୟ ଯାଞ୍ଚ କରାଯାଉଛି।

ସେହିପରି ଗିରଫ ବ୍ୟକ୍ତିଙ୍କର ପାକିସ୍ତାନର ଗୁଇନ୍ଦା ସଂସ୍ଥା ଆଇଏସଆଇ ସହ କୌଣସି ସମ୍ପର୍କ ରହିଛି କି ନାହିଁ, ସେ ଦିଗରେ ମଧ୍ୟ ସୁରକ୍ଷା ଏଜେନ୍ସି ତଦନ୍ତ ଜାରି ରଖିଛି। ସୀମାପାରରୁ ଅନୁପ୍ରବେଶ ଘଟଣା ବୃଦ୍ଧି ପାଉଥିବାରୁ ସୁରକ୍ଷା ବ୍ୟବସ୍ଥାକୁ ଆହୁରି କଡ଼ା କରାଯାଇଛି।