ଗଜପତି ଜିଲ୍ଲାର ମୋହନା ବ୍ଲକ୍ ଅନ୍ତର୍ଗତ ଅଡବା ପଞ୍ଚାୟତର କୋଇଲିଗୁଡ଼ା ଗାଁର ଜଣେ ଅନାଥ ନାବାଳିକା ନିୟମିତ ପାଠପଢ଼ା ଜାରି ରଖିବା ପାଇଁ ସଂଘର୍ଷ କରୁଛନ୍ତି। ସରକାରୀ ହଷ୍ଟେଲରୁ ଘରକୁ ଫେରିବା ପରେ ତାଙ୍କ ଶିକ୍ଷା ଏକପ୍ରକାର ଠପ୍ ହୋଇଯାଇଛି।

ମନୀଷା ମଲ୍ଲିକ ଛୋଟବେଳେ ନିଜ ବାପାଙ୍କୁ ହରାଇଥିଲେ। ପରେ ତାଙ୍କ ମାଆ ଅନ୍ୟତ୍ର ବିବାହ କରିଥିବାରୁ ମନୀଷାଙ୍କ ଲାଳନପାଳନ ତାଙ୍କ ବଡ଼ ମାଆ କରୁଥିଲେ। ତେବେ ମାମୁଙ୍କ ମୃତ୍ୟୁ ପରେ ଚାରିଜଣ ପିଲାଙ୍କ ଦାୟିତ୍ୱ ନେବା ତାଙ୍କ ବଡ଼ ମାଆଙ୍କ ପାଇଁ କଷ୍ଟକର ହୋଇପଡ଼ିଥିଲା। ଏହାପରେ ପ୍ରାୟ ଦେଢ଼ ବର୍ଷ ପୂର୍ବେ ମନୀଷାଙ୍କୁ ପାରଳାଖେମୁଣ୍ଡିସ୍ଥିତସରକାରୀ ଉତ୍କଳ ବାଳାଶ୍ରମରେ ରଖାଯାଇଥିଲା।

ସରକାରୀ ନିୟମ ଅନୁଯାୟୀ, ପରେ ଅଧିକାରୀମାନେ ମନୀଷାଙ୍କୁ ପୋଷ୍ୟ ସନ୍ତାନ ଭାବେ ଦେବା ସମ୍ପର୍କରେ ତାଙ୍କ ବଡ଼ ମାଆଙ୍କ ସହ ଆଲୋଚନା କରିଥିଲେ। ତେବେ ସେ ଏଥିରେ ରାଜି ହୋଇନଥିଲେ। ଏହାପରେ ମନୀଷାଙ୍କୁ ହଷ୍ଟେଲରୁ ଘରକୁ ପଠାଇ ଦିଆଯାଇଥିଲା।

ସେତେବେଳେ ମନୀଷା ସପ୍ତମ ଶ୍ରେଣୀରେ ପଢ଼ୁଥିଲେ। ଶିକ୍ଷାବର୍ଷ ଅଧାରେ ଘରକୁ ଫେରିବା ପରେ ତାଙ୍କ ପାଠପଢ଼ା ଆଉ ଆଗକୁ ବଢ଼ିପାରିନାହିଁ। ବର୍ତ୍ତମାନ ସେ ଘର କାମରେ ସହଯୋଗ କରୁଥିବା ବେଳେ ପୁଣି କେଉଁଠାରେ ନାମ ଲେଖାଇ ପାଠପଢ଼ା ଆରମ୍ଭ କରିବେ, ସେନେଇ ଚିନ୍ତାରେ ଅଛନ୍ତି।

ଏନେଇ ଜିଲ୍ଲା ଶିଶୁ ସୁରକ୍ଷା ଅଧିକାରୀ କହିଛନ୍ତି ଯେ, ଜିଲ୍ଲା ଶିଶୁ କଲ୍ୟାଣ କମିଟିଙ୍କ ନିର୍ଦ୍ଦେଶ ଅନୁସାରେ ମନୀଷାଙ୍କୁ ତାଙ୍କ ବଡ଼ ମାଆଙ୍କ ହେପାଜତରେ ଘରକୁ ପଠାଯାଇଥିଲା। ଯଦି ମନୀଷା ପାଠପଢ଼ା ଜାରି ରଖିବାରେ ସମସ୍ୟାର ସମ୍ମୁଖୀନ ହେଉଛନ୍ତି, ତେବେ ତାଙ୍କ ଶିକ୍ଷା ଶୀଘ୍ର ଆରମ୍ଭ କରିବା ପାଇଁ ସରକାରଙ୍କ ପକ୍ଷରୁ ଆବଶ୍ୟକ ପଦକ୍ଷେପ ନିଆଯିବ।