ଭୁବନେଶ୍ୱର: ଚଳିତ ଖରିଫ ଋତୁରେ ଧାନ ସଂଗ୍ରହ ପାଇଁ ମଣ୍ଡି ଖୋଲିବା ତାରିଖକୁ ନେଇ ଚାଷୀଙ୍କ ମଧ୍ୟରେ ଚିନ୍ତା ବଢ଼ିଛି। ଧାନ ଅମଳରେ ବିଳମ୍ବ ହେବାରୁ ମଣ୍ଡି ଖୋଲିବାରେ ମଧ୍ୟ ସାମାନ୍ୟ ବିଳମ୍ବ ହୋଇଥିବା କହିଛନ୍ତି ସମବାୟ ମନ୍ତ୍ରୀ ପ୍ରଦୀପ ବଳ ସାମନ୍ତ।
ତେବେ ଚାଷୀମାନେ ଆତଙ୍କିତ ହେବାର ଆବଶ୍ୟକତା ନାହିଁ। ପୂର୍ବରୁ ଯେଉଁ ବ୍ୟବସ୍ଥାରେ ଧାନ ସଂଗ୍ରହ ହେଉଥିଲା, ସେହି ବ୍ୟବସ୍ଥା ଅନୁସାରେ ଚଳିତ ବର୍ଷ ମଧ୍ୟ ଧାନ କିଣାଯିବ ଏବଂ ପ୍ରକ୍ରିୟାକୁ ସୁରୁଖୁରୁରେ ପରିଚାଳନା କରାଯିବ ବୋଲି ମନ୍ତ୍ରୀ ସୂଚନା ଦେଇଛନ୍ତି।
କେଉଁ ଜିଲ୍ଲାରେ କେବେ ଖୋଲିବ ମଣ୍ଡି?
ଜିଲ୍ଲାସ୍ତରୀୟ ଧାନ ସଂଗ୍ରହ କମିଟି (DLPC) ବୈଠକରେ ନିଆଯାଇଥିବା ନିଷ୍ପତ୍ତି ଅନୁସାରେ ତିନୋଟି ଜିଲ୍ଲାରେ ମଣ୍ଡି ଖୋଲିବା ତାରିଖ ଧାର୍ଯ୍ୟ ହୋଇଛି।
କଳାହାଣ୍ଡି: ଡିସେମ୍ବର ୫ରୁ ଧାନ ସଂଗ୍ରହ ଆରମ୍ଭ।
ସୁବର୍ଣ୍ଣପୁର: ଡିସେମ୍ବର ୧୧ରୁ ମଣ୍ଡି ଖୋଲିବ।
ବଲାଙ୍ଗୀର: ଡିସେମ୍ବର ୧୪ରୁ ଧାନ କିଣା ଆରମ୍ଭ ହେବ।
ଏହି ତିନୋଟି ଜିଲ୍ଲାରେ ଧାର୍ଯ୍ୟ ତାରିଖ ଅନୁସାରେ ଧାନ ସଂଗ୍ରହ ପ୍ରକ୍ରିୟା ଆରମ୍ଭ ହେବ ବୋଲି ମନ୍ତ୍ରୀ କହିଛନ୍ତି।
ଚଳିତ ବର୍ଷ ଲଗାତାର ବର୍ଷା ହେବା ସହ ଖରାର ପରିମାଣ କମ୍ ରହିଥିବାରୁ ଧାନ ଠିକ୍ ସମୟରେ ପାଚିପାରିନାହିଁ। ଫଳରେ ଧାନ ଅମଳ କାର୍ଯ୍ୟ ମଧ୍ୟ ବିଳମ୍ବିତ ହୋଇଛି।
ଧାନ ଭଲ ଭାବେ ପାଚିବା ପରେ ହିଁ ଅମଳ କରାଯାଇପାରିବ। ଆଗାମୀ ୧୫ରୁ ୨୦ ଦିନ ମଧ୍ୟରେ ଧାନ ପାଚି ଅମଳ ହେବ ବୋଲି ଆଶା ରହିଛି। ଏହି କାରଣରୁ ମଣ୍ଡି ଖୋଲିବା ତାରିଖ ଧାର୍ଯ୍ୟ କରିବାରେ ବିଳମ୍ବ ହୋଇଥିବା ମନ୍ତ୍ରୀ ସ୍ପଷ୍ଟ କରିଛନ୍ତି।
ମନ୍ତ୍ରୀଙ୍କ ସୂଚନା ଅନୁସାରେ, ଗତବର୍ଷ ଡିସେମ୍ବର ୧୫ ସୁଦ୍ଧା ମଣ୍ଡି ଖୋଲିଥିବାବେଳେ ଚଳିତ ବର୍ଷ ଡିସେମ୍ବର ୫ରୁ ମଣ୍ଡି ଖୋଲିବାକୁ ଯାଉଛି। ଅର୍ଥାତ୍ ଗତବର୍ଷ ତୁଳନାରେ ଚଳିତ ବର୍ଷ ଧାନ ସଂଗ୍ରହ ପ୍ରକ୍ରିୟା ଆଗୁଆ ଆରମ୍ଭ ହେବ।
ଧାନ ସଂଗ୍ରହ ପାଇଁ ପୂର୍ବରୁ ରହିଥିବା ବ୍ୟବସ୍ଥା ହିଁ ବଳବତ୍ତର ରହିବ। ତେଣୁ ଚାଷୀଙ୍କ ଧାନ କିଣା ପ୍ରକ୍ରିୟାରେ କୌଣସି ନୂଆ ବ୍ୟବସ୍ଥା ଲାଗୁ ହେବ ନାହିଁ ବୋଲି ମନ୍ତ୍ରୀ କହିଛନ୍ତି।
ଅନ୍ୟପଟେ, ଆଗକୁ ବଡ଼ ବର୍ଷା ହେବାର ଆଶଙ୍କା ମଧ୍ୟ ରହିଛି। ଧାନ ଅମଳ ଓ ମଣ୍ଡିରେ ବିକ୍ରି ପ୍ରକ୍ରିୟା ମଧ୍ୟରେ ପାଣିପାଗର ପରିବର୍ତ୍ତନ ଚାଷୀଙ୍କ ଚିନ୍ତା ବଢ଼ାଇଛି।
ଧାନ ପାଚିବା, ଅମଳ କରିବା ଓ ମଣ୍ଡିରେ ବିକ୍ରି କରିବା ପାଇଁ ଚାଷୀଙ୍କୁ ଆହୁରି କିଛି ଦିନ ଅପେକ୍ଷା କରିବାକୁ ପଡ଼ିପାରେ। ତେବେ ଧାର୍ଯ୍ୟ ତାରିଖରେ ମଣ୍ଡି ଖୋଲି ଧାନ ସଂଗ୍ରହ ସୁରୁଖୁରୁରେ କରାଯିବ ବୋଲି ସରକାରଙ୍କ ପକ୍ଷରୁ ଆଶ୍ୱାସନା ଦିଆଯାଇଛି।
ମୁମ୍ବାଇ: ଭାରତୀୟ ସିନେମାର ଅନ୍ୟତମ ଚର୍ଚ୍ଚିତ ନିର୍ଦ୍ଦେଶକ...
ପ୍ରତ୍ୟେକ ରୋଗୀଙ୍କ ପାଇଁ ଅଲଗା କ୍ୟାନସର ଟିକା! ନୂଆଦିଲ...
ନୂଆଦିଲ୍ଲୀ: କ୍ଷୀର, ଦହି ଓ ପନିର୍‌ କିଣୁଥିବା ଗ୍ରାହ...
ମୁମ୍ବାଇ: ବଲିଉଡ୍‌ରେ ମାନବିକତାର ଏକ ସୁନ୍ଦର ଉଦାହରଣ...
ନୂଆଦିଲ୍ଲୀ: ବାୟୁ ପ୍ରଦୂଷଣ କେବଳ ଫୁସ୍‌ଫୁସ୍‌...
କେଶ ଓ ତ୍ୱଚା ପାଇଁ ବିପଦ ସାଜୁଛି ବାୟୁ ପ୍ରଦୂଷଣ ନୂଆଦି...
ମୁମ୍ବାଇ: ବିଶ୍ୱ ସିନେମା ବଜାରରେ ଭାରତୀୟ ଫିଲ୍ମ ‘ର...
ମୁମ୍ବାଇ: ବକ୍ସ ଅଫିସ୍‌ରେ ରେକର୍ଡ ପରେ ରେକର୍ଡ କରୁଥ...