କଟକ: ଓଡ଼ିଶାରେ ଦୁଇ ଉପମୁଖ୍ୟମନ୍ତ୍ରୀଙ୍କ ନିଯୁକ୍ତିର ସାମ୍ବିଧାନିକ ବୈଧତାକୁ ଚ୍ୟାଲେଞ୍ଜ କରି ଦାଏର ହୋଇଥିବା PILକୁ ଓଡ଼ିଶା ହାଇକୋର୍ଟ ଖାରଜ କରିଛନ୍ତି। ଗୁରୁବାର ଏହି ମାମଲାର ଶୁଣାଣି ପରେ କୋର୍ଟ ଆବେଦନକାରୀଙ୍କୁ ତୁଚ୍ଛ ମାମଲା ଦାଏର ନକରିବାକୁ ମଧ୍ୟ ସତର୍କ କରିଛନ୍ତି।

ଦୁଇ ଉପମୁଖ୍ୟମନ୍ତ୍ରୀଙ୍କ ନିଯୁକ୍ତି ସାମ୍ବିଧାନିକ ଦୃଷ୍ଟିରୁ ବୈଧ କି ନୁହେଁ, ଏହାକୁ ନେଇ ଏହି ଜନସ୍ୱାର୍ଥ ମାମଲା ଦାଏର ହୋଇଥିଲା। ମୁଖ୍ୟ ବିଚାରପତିଙ୍କ ନେତୃତ୍ୱାଧୀନ ଡିଭିଜନ ବେଞ୍ଚରେ ମାମଲାର ଶୁଣାଣି ହୋଇଥିଲା।

ଦୁଇ ଡେପୁଟି ସିଏମ୍‌ଙ୍କ ନିଯୁକ୍ତିକୁ ସରକାରଙ୍କ ସମର୍ଥନ

ଶୁଣାଣି ସମୟରେ ରାଜ୍ୟ ସରକାରଙ୍କ ପକ୍ଷରୁ ଆଡଭୋକେଟ୍ ଜେନେରାଲ୍ ପୀତାମ୍ବର ଆଚାର୍ଯ୍ୟ ଉପସ୍ଥିତ ହୋଇ ସରକାରଙ୍କ ପକ୍ଷ ରଖିଥିଲେ।

ସେ ଯୁକ୍ତି ଦେଇଥିଲେ ଯେ, ମନ୍ତ୍ରିପରିଷଦର ସଦସ୍ୟମାନଙ୍କ ମଧ୍ୟରେ ଦାୟିତ୍ୱ ବଣ୍ଟନ କରିବାର ଅଧିକାର ମୁଖ୍ୟମନ୍ତ୍ରୀଙ୍କର ରହିଛି। ଉପମୁଖ୍ୟମନ୍ତ୍ରୀ ନିଯୁକ୍ତି କୌଣସି ନୂଆ ପ୍ରଥା ନୁହେଁ ବୋଲି ମଧ୍ୟ ସେ ଦର୍ଶାଇଥିଲେ।

ଏହା ସପକ୍ଷରେ ବିଭିନ୍ନ ସୁପ୍ରିମକୋର୍ଟ ରାୟ ଏବଂ ଐତିହାସିକ ଉଦାହରଣ ମଧ୍ୟ ଆଡଭୋକେଟ୍ ଜେନେରାଲ୍ ଉପସ୍ଥାପନ କରିଥିଲେ।

ଓଡ଼ିଶାରେ ପୂର୍ବରୁ ମଧ୍ୟ ଥିଲେ ଦୁଇ ଡେପୁଟି ସିଏମ୍

ଶୁଣାଣି ସମୟରେ ରାଜ୍ୟର ରାଜନୈତିକ ଇତିହାସର ଉଦାହରଣ ମଧ୍ୟ ଦିଆଯାଇଥିଲା। ୧୯୯୫ ମସିହାରେ ଓଡ଼ିଶାରେ ଦୁଇ ଜଣ ଉପମୁଖ୍ୟମନ୍ତ୍ରୀ ଥିବା କଥା ଆଡଭୋକେଟ୍ ଜେନେରାଲ୍ କୋର୍ଟଙ୍କୁ ଅବଗତ କରାଇଥିଲେ।

ସରକାରଙ୍କ ପକ୍ଷରୁ ଏହି ଯୁକ୍ତି ମଧ୍ୟ ଦିଆଯାଇଥିଲା ଯେ, ପର୍ଯ୍ୟାପ୍ତ ଆଇନଗତ ଗବେଷଣା ବିନା ଏହି PIL ଦାଏର କରାଯାଇଛି। ତେଣୁ ଏହାକୁ ବିଚାରକୁ ନିଆଯିବା ଉଚିତ ନୁହେଁ ବୋଲି ସରକାରଙ୍କ ପକ୍ଷରୁ ଯୁକ୍ତି ରଖାଯାଇଥିଲା।

ଶେଷରେ ହାଇକୋର୍ଟ PILକୁ ଖାରଜ କରିବା ସହ ତୁଚ୍ଛ ମାମଲା ଦାଏର କରିବାରୁ ଆବେଦନକାରୀଙ୍କୁ ସତର୍କ କରିଛନ୍ତି।