ଓଡ଼ିଶାର ପରବର୍ତ୍ତୀ ପୋଲିସ ମହାନିର୍ଦ୍ଦେଶକ (DGP) ନିଯୁକ୍ତିକୁ ନେଇ ଚାଲିଥିବା ମାମଲାରେ ଆଜି ସୁପ୍ରିମକୋର୍ଟରେ ପୁଣି ଶୁଣାଣି ହେବ। DGP ଚୟନ ପ୍ରକ୍ରିୟାରେ ବରିଷ୍ଠ IPS ଅଧିକାରୀ ସୁଶାନ୍ତ କୁମାର ନାଥଙ୍କୁ ବାଦ ଦେବା ଏବଂ ରାଜ୍ୟ ସରକାରଙ୍କ ପକ୍ଷରୁ UPSCକୁ ପଠାଯାଇଥିବା ସଂଶୋଧିତ ତାଲିକାକୁ ନେଇ ମାମଲା ଗୁରୁତ୍ୱ ନେଇଛି।

ସୁଶାନ୍ତ କୁମାର ନାଥ 1993 ବ୍ୟାଚ୍‌ର ଓଡ଼ିଶା କ୍ୟାଡରର ବରିଷ୍ଠ IPS ଅଧିକାରୀ। ତାଙ୍କ Integrity Certificate ପ୍ରତ୍ୟାହାର କରାଯିବା ଘଟଣାକୁ ନେଇ ସୁପ୍ରିମକୋର୍ଟ ପୂର୍ବ ଶୁଣାଣିରେ ପ୍ରଶ୍ନ ଉଠାଇଥିଲେ। ନାଥଙ୍କ ପକ୍ଷରୁ ଦାଖଲ ହୋଇଥିବା ଆଫିଡେଭିଟ୍‌ରେ କୁହାଯାଇଛି ଯେ, CBIର ଏକ ଚିଠିରେ ତାଙ୍କୁ ଆଗାମୀ ସମୟରେ ଆବଶ୍ୟକ ହେଲେ ପଚରାଉଚରା କରାଯାଇପାରେ ବୋଲି ଉଲ୍ଲେଖ ଥିଲା; ଏହାକୁ ଆଧାର କରି ତାଙ୍କ Integrity Certificate ପ୍ରତ୍ୟାହାର କରାଯାଇଥିବା ନେଇ ସେ ପ୍ରଶ୍ନ ଉଠାଇଛନ୍ତି।

ରାଜ୍ୟ ସରକାରଙ୍କ ପକ୍ଷରୁ କୁହାଯାଇଛି ଯେ, ପୋଲିସ Sub-Inspector ନିଯୁକ୍ତି ମାମଲାର ତଦନ୍ତ ସମୟରେ CBI ତାଙ୍କୁ ପଚରାଉଚରା କରିପାରେ ବୋଲି ଜଣାଇଥିଲା। ଏହା ପରେ ନାଥଙ୍କ ନାମ ବାଦ ଦେଇ 10 ଜଣ ଅଧିକାରୀଙ୍କ Integrity Certificate ସହିତ ସଂଶୋଧିତ ପ୍ରସ୍ତାବ UPSCକୁ ପଠାଯାଇଥିଲା।

ମାମଲାରେ DGP ଚୟନ ପାଇଁ ଅଧିକାରୀଙ୍କ empanelment, eligibility list ଏବଂ ପରବର୍ତ୍ତୀ ସମୟରେ ତାଲିକାରେ କରାଯାଇଥିବା ପରିବର୍ତ୍ତନକୁ ନେଇ ମଧ୍ୟ ପ୍ରଶ୍ନ ଉଠିଛି। ଏହି ପ୍ରକ୍ରିୟା ସୁପ୍ରିମକୋର୍ଟଙ୍କ Prakash Singh ମାମଲାରେ ଦିଆଯାଇଥିବା DGP ନିଯୁକ୍ତି ସମ୍ପର୍କିତ ନିର୍ଦ୍ଦେଶ ସହ ସମନ୍ୱିତ କି ନୁହେଁ, ତାହା ମଧ୍ୟ ଆଲୋଚନାରେ ରହିଛି।

ଏହି ମାମଲାରେ ସୁପ୍ରିମକୋର୍ଟର ପରବର୍ତ୍ତୀ ନିର୍ଦ୍ଦେଶ ଓଡ଼ିଶାର DGP ନିଯୁକ୍ତି ପ୍ରକ୍ରିୟାର ଆଗାମୀ ଦିଗ ନିର୍ଦ୍ଧାରଣ କରିପାରେ। ତେବେ ଶେଷ ନିଷ୍ପତ୍ତି ସୁପ୍ରିମକୋର୍ଟଙ୍କ ଆଦେଶ ଉପରେ ନିର୍ଭର କରିବ।