ବଲିଉଡ୍ ଅଭିନେତ୍ରୀ ନୁସରତ ଭରୁଚାଙ୍କ ସ୍ୱାସ୍ଥ୍ୟକୁ ନେଇ ଚିନ୍ତିତ ଥିବା ପ୍ରଶଂସକଙ୍କ ପାଇଁ ଆସିଛି ଏକ ଭାବପ୍ରବଣ ଅପଡେଟ୍। ବାଲିରେ ଏକ ଦୁର୍ଘଟଣାରେ ମେରୁଦଣ୍ଡରେ ଆଘାତ ପାଇବା ପରେ ଅଭିନେତ୍ରୀ ମୁମ୍ବାଇ ଫେରି ଅସ୍ତ୍ରୋପଚାର କରାଇଥିଲେ। ଏବେ ସେ ସୋସିଆଲ ମିଡିଆରେ ଏକ ସନସେଟ୍ ଫଟୋ ସେୟାର କରି ନିଜ ମନର ଭାବନା ପ୍ରକାଶ କରିଛନ୍ତି।

ନୁସରତ ନିଜ ଇନଷ୍ଟାଗ୍ରାମ ଷ୍ଟୋରିରେ ଏକ ଫଟୋ ସେୟାର କରିଥିଲେ। ଫଟୋରେ ଝରକା ପାଖରେ ଏକ ରିକ୍ଲାଇନିଂ ହ୍ୱିଲଚେୟାର ଏବଂ ଦୂରରେ ସୂର୍ଯ୍ୟାସ୍ତର ଦୃଶ୍ୟ ଦେଖିବାକୁ ମିଳୁଛି। ଏହା ସହ ସେ ଲେଖିଥିଲେ, “Been chasing sunsets forever, and just like that my view changed. But, Picture abhi baaki hai mere dost.”

ଏହି ବାର୍ତ୍ତା ମାଧ୍ୟମରେ ନୁସରତ ଜଣାଇଛନ୍ତି ଯେ ଜୀବନର ପରିସ୍ଥିତି କେତେ ଶୀଘ୍ର ବଦଳିଯାଇପାରେ। ବର୍ତ୍ତମାନ ସେ ପୂର୍ବପରି ସୁସ୍ଥ ଅନୁଭବ କରୁନଥିଲେ ମଧ୍ୟ ଆଶା ହରାଇନାହାନ୍ତି। ଏହି କଠିନ ସମୟ ଅତିକ୍ରମ କରିବା ପରେ ପୁଣି ପୂର୍ଣ୍ଣ ଉତ୍ସାହରେ କାମକୁ ଫେରିବାକୁ ସେ ଚାହୁଁଛନ୍ତି।

ବାଲିରେ କେମିତି ହୋଇଥିଲା ଦୁର୍ଘଟଣା?

ରିପୋର୍ଟ ଅନୁସାରେ, କାମ ଓ ଛୁଟି କଟାଇବା ଉଦ୍ଦେଶ୍ୟରେ ନୁସରତ ବାଲି ଯାଇଥିଲେ। ସେଠାରେ ଏକ ଦୁର୍ଘଟଣାରେ ତାଙ୍କ ମେରୁଦଣ୍ଡରେ ଫ୍ରାକ୍ଚର୍ ହୋଇଥିଲା। ଏହା ପରେ ସେ ବାଲିରେ ଚିକିତ୍ସାଧୀନ ରହିଥିଲେ। ଡାକ୍ତରଙ୍କ ପରାମର୍ଶ ଓ ଆବଶ୍ୟକ ଚିକିତ୍ସା ପାଇଁ ତାଙ୍କୁ ଏୟାର ଆମ୍ବୁଲାନ୍ସ ଯୋଗେ ମୁମ୍ବାଇ ଅଣାଯାଇଥିଲା। ସେଠାରେ ତାଙ୍କର ମେରୁଦଣ୍ଡ ଅସ୍ତ୍ରୋପଚାର କରାଯାଇଥିଲା।

ଅଭିନେତ୍ରୀଙ୍କ ପ୍ରଚାରକ ପୂର୍ବରୁ ଏକ ବିବୃତି ଜାରି କରି ଦୁର୍ଘଟଣା ଓ ମେରୁଦଣ୍ଡରେ ଆଘାତ ଲାଗିଥିବା ନେଇ ସୂଚନା ଦେଇଥିଲେ। ଏହି ସମୟରେ ତାଙ୍କ ସ୍ୱାସ୍ଥ୍ୟ ଓ ଚିକିତ୍ସାକୁ ସର୍ବାଧିକ ଗୁରୁତ୍ୱ ଦିଆଯାଉଥିବା କୁହାଯାଇଥିଲା।

କିଛି ସମୟ ପାଇଁ କାମରୁ ଦୂରେଇ ରହିବେ

ମେରୁଦଣ୍ଡରେ ଆଘାତ ଓ ଅସ୍ତ୍ରୋପଚାର ଯୋଗୁଁ ନୁସରତଙ୍କୁ କିଛି ସମୟ ବିଶ୍ରାମ ନେବାକୁ ପଡ଼ିବ। ତାଙ୍କ ଆଗାମୀ କିଛି ସପ୍ତାହର ବୃତ୍ତିଗତ କାର୍ଯ୍ୟସୂଚୀ ମଧ୍ୟ ପ୍ରଭାବିତ ହେବାର ସମ୍ଭାବନା ରହିଛି। ତାଙ୍କ ଟିମ୍ ପ୍ରଶଂସକ ଓ ଗଣମାଧ୍ୟମକୁ ଏହି ସମୟରେ ତାଙ୍କ ବ୍ୟକ୍ତିଗତ ଗୋପନୀୟତାକୁ ସମ୍ମାନ ଦେବାକୁ ଅନୁରୋଧ କରିଛି।

‘ପିକ୍ଚର ଅଭି ବାକି ହୈ, ମେରେ ଦୋସ୍ତ’ ବାର୍ତ୍ତା ମାଧ୍ୟମରେ ନୁସରତ ନିଜର ଆଶା ଓ ଦୃଢ଼ ମନୋବଳ ପ୍ରକାଶ କରିଛନ୍ତି। ତାଙ୍କର ଏହି ପୋଷ୍ଟ ପରେ ପ୍ରଶଂସକମାନେ ଶୀଘ୍ର ସୁସ୍ଥ ହେବା ଓ ପୁଣି ପରଦାକୁ ଫେରିବା ପାଇଁ ଶୁଭକାମନା ଜଣାଉଛନ୍ତି।