ମେଡିକାଲ୍ ଶିକ୍ଷା କ୍ଷେତ୍ରରେ ନ୍ୟାସନାଲ୍ ମେଡିକାଲ୍ କମିଶନ୍‌ (NMC) ଏକ ବଡ଼ ନିଷ୍ପତ୍ତି ନେଇଛି। କମିଶନ୍‌ ପକ୍ଷରୁ Maintenance of Standards of Medical Education Regulations, 2023କୁ ତୁରନ୍ତ ପ୍ରତ୍ୟାହାର କରାଯାଇଛି। ଅକ୍ଟୋବର ୧୪, ୨୦୨୬ର ନୋଟିଫିକେସନ୍‌ ପରେ ଏହା ଗେଜେଟ୍‌ରେ ପ୍ରକାଶ ପାଇଛି।

ତେବେ ୨୦୨୩ର ନିୟମ ପ୍ରତ୍ୟାହାର ହେଲେ ମଧ୍ୟ ମେଡିକାଲ୍ କଲେଜ ଓ ଅନ୍ୟ ମେଡିକାଲ୍ ଶିକ୍ଷାନୁଷ୍ଠାନ ପାଇଁ Annual Disclosure Report (ADR) ଦାଖଲ କରିବାର ନିୟମ ହଟିନାହିଁ। NMC Act, 2019ର ଧାରା ୨୪(i) ଓ ୨୫(h) ଅନୁସାରେ ADR ଦାଖଲ କରିବାର ବାଧ୍ୟତା ଜାରି ରହିବ। 

NMCର ନୋଟିଫିକେସନ୍‌ ଅନୁସାରେ, ୨୦୨୩ର ନିୟମ ଲାଗୁ ଥିବା ସମୟରେ ଦିଆଯାଇଥିବା ଅନୁମୋଦନ, ନବୀକରଣ, ଆଦେଶ, ନିଷ୍ପତ୍ତି ଓ ନିର୍ଦ୍ଦେଶ ଏହି ପ୍ରତ୍ୟାହାର ଯୋଗୁଁ ଅବୈଧ ହେବ ନାହିଁ। ପୂର୍ବରୁ ଅର୍ଜିତ ଅଧିକାର, ସୁବିଧା, ଦାୟିତ୍ୱ ଓ ଆଇନଗତ ବାଧ୍ୟତା ମଧ୍ୟ ପ୍ରଭାବିତ ହେବ ନାହିଁ।

ଏହାସହିତ, ପ୍ରତ୍ୟାହାର ପୂର୍ବରୁ ଚାଲୁଥିବା ଆବେଦନ, ଅପିଲ୍‌, ତଦନ୍ତ ଓ ଅନ୍ୟାନ୍ୟ ମାମଲା ନିର୍ଦ୍ଦିଷ୍ଟ ସର୍ତ୍ତ ଅନୁସାରେ ୨୦୨୩ର ନିୟମ ଅଧୀନରେ ଜାରି ରହିପାରିବ। ପ୍ରତ୍ୟାହାର ପରେ ଉତ୍ପନ୍ନ ନୂଆ ମାମଲାଗୁଡ଼ିକ NMC Act, 2019 ଏବଂ ସେତେବେଳେ ପ୍ରଚଳିତ ଆଇନ ଓ ନିୟମ ଅନୁସାରେ ପରିଚାଳିତ ହେବ।