ଭାରତରେ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଜୁନ୍ ୪ ତାରିଖରେ ପ୍ରବେଶ କରିଥିଲେ ମଧ୍ୟ ଏହାର ଅଗ୍ରଗତି ଆଶାନୁରୂପ ହୋଇନାହିଁ। ଦେଶର ଅନେକ ଅଞ୍ଚଳ ଏପର୍ଯ୍ୟନ୍ତ ମୌସୁମୀ ବର୍ଷାର ଅପେକ୍ଷାରେ ରହିଥିବା ବେଳେ ବର୍ଷା ଅଭାବ ଯୋଗୁଁ ଚାଷୀଙ୍କ ଚିନ୍ତା ବଢ଼ିଯାଇଛି।

ପାଣିପାଗ ବିଜ୍ଞାନୀମାନଙ୍କ ମତରେ, ଏହି ଅସ୍ୱାଭାବିକ ବିଳମ୍ବ ପଛରେ କେବଳ ଏଲ୍ ନିନୋ ଦାୟୀ ନୁହେଁ। ବରଂ ବିଭିନ୍ନ ପାଣିପାଗ ପ୍ରଣାଳୀର ଜଟିଳ ପାରସ୍ପରିକ ପ୍ରଭାବ ମୌସୁମୀ ବାୟୁର ଅଗ୍ରଗତିକୁ ପ୍ରଭାବିତ କରିଛି।

ବିଶେଷଜ୍ଞମାନେ କହିଛନ୍ତି ଯେ, ପ୍ରଶାନ୍ତ ମହାସାଗରର ଅସ୍ଥିରତା, ବାରମ୍ବାର ପଶ୍ଚିମା ଝଡ଼ର ପ୍ରଭାବ, ଦୁର୍ବଳ ନିମ୍ନ ଚାପରେଖା ଗଠନ, ମ୍ୟାଡେନ୍-ଜୁଲିଆନ୍ ଓସିଲେସନ୍ (MJO)ର ସମର୍ଥନ ଅଭାବ ଏବଂ ଏଲ୍ ନିନୋର ପ୍ରଭାବ ମିଶି ଏହି ପରିସ୍ଥିତି ସୃଷ୍ଟି କରିଛି।

ଜୁନ୍ ମାସ ଆରମ୍ଭରେ ଭାରତ ମହାସାଗର ଉପରେ ଏକ ମୌସୁମୀ ବାୟୁ ଲହରୀ ସୃଷ୍ଟି ହୋଇଥିଲା। କିନ୍ତୁ ଏହା ପଶ୍ଚିମ-ଉତ୍ତର ପ୍ରଶାନ୍ତ ମହାସାଗରରେ ଫିଲିପାଇନ୍ସ ସାଗର ଅଞ୍ଚଳରେ ଶକ୍ତିଶାଳୀ ହୋଇ ଟାଇଫୁନ୍ ‘ଜାଗମି’ରେ ପରିଣତ ହୋଇଥିଲା। ଏହାର ପରିଣାମସ୍ୱରୂପ ବଙ୍ଗୋପସାଗରରେ ଆବଶ୍ୟକ ନିମ୍ନଚାପ ପ୍ରଣାଳୀ ଗଠନ ହୋଇପାରିନଥିଲା, ଯାହା ସାଧାରଣତଃ ମୌସୁମୀ ବାୟୁକୁ ସାରା ଦେଶରେ ଆଗକୁ ବଢ଼ିବାରେ ସହାୟକ ହୋଇଥାଏ।

ଅନ୍ୟପଟେ, ଉତ୍ତର ଭାରତରେ ବାରମ୍ବାର ପଶ୍ଚିମା ଝଡ଼ ସକ୍ରିୟ ରହିବା ଯୋଗୁଁ ଶୁଷ୍କ ଉତ୍ତର-ପଶ୍ଚିମ ପବନ ପ୍ରବାହିତ ହୋଇଥିଲା। ଏହା ମେଘ ଗଠନ ଏବଂ ବ୍ୟାପକ ବର୍ଷା ପାଇଁ ଅନୁକୂଳ ପରିବେଶ ସୃଷ୍ଟି କରିପାରିନଥିଲା।

ଏଥିସହିତ ମୌସୁମୀ ଟ୍ରଫ୍ ବା ନିମ୍ନ ଚାପରେଖା ମଧ୍ୟ ସାଧାରଣ ସ୍ଥିତିରେ ନଥିଲା। ଏଲ୍ ନିନୋ ପ୍ରଭାବ ବାୟୁମଣ୍ଡଳୀୟ ପରିସ୍ଥିତିକୁ ଆହୁରି ଦୁର୍ବଳ କରିଥିବା ବେଳେ, ମ୍ୟାଡେନ୍-ଜୁଲିଆନ୍ ଓସିଲେସନ୍ ମଧ୍ୟ ଭାରତ ମହାସାଗର ଉପରେ ମେଘ ଗଠନ ପାଇଁ ସକାରାତ୍ମକ ସହଯୋଗ କରିନଥିଲା।

ପାଣିପାଗ ବିଶେଷଜ୍ଞମାନେ ଆଶା ପ୍ରକାଶ କରିଛନ୍ତି ଯେ ଆଗାମୀ ଦିନଗୁଡ଼ିକରେ ମୌସୁମୀ ବାୟୁ ପୁଣି ସକ୍ରିୟ ହୋଇ ଦେଶର ଅନ୍ୟାନ୍ୟ ଅଞ୍ଚଳକୁ ଅଗ୍ରସର ହେବ ଏବଂ ବର୍ଷାର ପରିମାଣ ବୃଦ୍ଧି ପାଇବ।