ପଶ୍ଚିମବଙ୍ଗରେ ବିଜେପି ଓ ତୃଣମୂଳ କଂଗ୍ରେସ (ଟିଏମସି) ମଧ୍ୟରେ ବଢ଼ୁଥିବା ରାଜନୈତିକ ବିବାଦ ମଧ୍ୟରେ ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିଜେପି ବିରୋଧରେ କଡ଼ା ସ୍ୱର ଉଠାଇଛନ୍ତି।

ଏକ ଭିଡିଓ ସନ୍ଦେଶରେ ସେ କହିଛନ୍ତି,"ମତେ ଚୁପ୍ କରିବାକୁ ହେଲେ ମତେ ମାରିବାକୁ ପଡ଼ିବ।"ତାଙ୍କ ଅଭିଯୋଗ ଅନୁଯାୟୀ, ବିଜେପି ଟିଏମସିକୁ ଭୟଭୀତ କରିବା ଓ ଦମନ କରିବା ପାଇଁ ସମସ୍ତ ସୀମା ଅତିକ୍ରମ କରୁଛି।

ମମତା ବାନାର୍ଜୀ କହିଛନ୍ତି ଯେ, ଟିଏମସିର ବରିଷ୍ଠ ନେତା ମହୁଆ ମୈତ୍ରା, ଅଭିଷେକ ବାନାର୍ଜୀ ଓ କଲ୍ୟାଣ ବାନାର୍ଜୀଙ୍କୁ ଲକ୍ଷ୍ୟ କରି କ୍ରମାଗତ ଭାବେ ଆକ୍ରମଣ କରାଯାଉଛି। ସେମାନଙ୍କ ଘର ଉପରେ ମଧ୍ୟ ଆକ୍ରମଣ ହୋଇଥିବା ଅଭିଯୋଗ ସେ କରିଛନ୍ତି।

ସେ ଆହୁରି ଦାବି କରିଛନ୍ତି ଯେ, ପୋଲିସ ହେପାଜତରେ ଟିଏମସି ନେତାମାନଙ୍କ ସହ ଅମାନବୀୟ ବ୍ୟବହାର କରାଯାଉଛି। କେତେକଙ୍କୁ ଚଟାଣରେ ଶୁଆଇ ଦିଆଯାଉଛି, ହାତ-ଗୋଡ଼ରେ ବେଡ଼ି ପକାଯାଉଛି ଏବଂ ଅପମାନଜନକ ବ୍ୟବହାର କରାଯାଉଛି ବୋଲି ସେ କହିଛନ୍ତି।

ମମତା ବାନାର୍ଜୀ ସ୍ପଷ୍ଟ କରିଛନ୍ତି ଯେ, ଏଭଳି ପରିସ୍ଥିତି ସତ୍ତ୍ୱେ ଟିଏମସି ନିଜର ରାଜନୈତିକ ଲଢ଼େଇ ଜାରି ରଖିବ ଏବଂ କୌଣସି ଚାପ କିମ୍ବା ଧମକରେ ପଛକୁ ହଟିବ ନାହିଁ।

ଏହା ସହ ସେ ରାଜ୍ୟର କେତେକ ସରକାରୀ ବିଦ୍ୟାଳୟରେ ପାଇଲଟ୍ ପ୍ରକଳ୍ପ ଅଧୀନରେ ମଧ୍ୟାହ୍ନ ଭୋଜନରୁ ଅଣ୍ଡା ବାଦ ଦେଇ ନିରାମିଷ ଖାଦ୍ୟ ଦିଆଯାଉଥିବା ନିଷ୍ପତ୍ତିକୁ ମଧ୍ୟ ସମାଲୋଚନା କରିଛନ୍ତି। ଗରିବ ପିଲାଙ୍କ ପୋଷଣ ପ୍ରତି ସରକାର ଧ୍ୟାନ ଦେବା ପରିବର୍ତ୍ତେ ରାଜନୈତିକ ପ୍ରତିଶୋଧରେ ବ୍ୟସ୍ତ ଥିବା ଅଭିଯୋଗ ସେ କରିଛନ୍ତି।