କୋରାପୁଟ:କୋରାପୁଟ ଜିଲ୍ଲାରେ ଏକ କୁଖ୍ୟାତ ଡକାୟତ ଗ୍ୟାଙ୍ଗକୁ ଧରିବାରେ ବୋରିଗୁମ୍ମା ପୁଲିସ ସଫଳ ହୋଇଛି। ପୁଲିସ ଉପରେ ଗୁଳି ଚଳାଇ ଫେରାର ହୋଇଥିବା ଡକାୟତ ଟୁନା ହରିଜନ ଓରଫ ସିମନ ନାଗଙ୍କ ସମେତ ମୋଟ ୯ ଜଣଙ୍କୁ ଗିରଫ କରାଯାଇଛି। ୭ ଦିନିଆ ପୁଲିସ ରିମାଣ୍ଡ ଶେଷ ହେବା ପରେ ଅଭିଯୁକ୍ତମାନଙ୍କୁ କୋର୍ଟରେ ହାଜର କରାଯାଇଥିଲା। ପରେ ସେମାନଙ୍କୁ ନ୍ୟାୟିକ ହାଜତକୁ ପଠାଯାଇଛି।

ପୁଲିସ ଉପରେ ଚଳାଇଥିଲା ଗୁଳି

ପୁଲିସ ସୂଚନା ଅନୁସାରେ, ଟୁନା ହରିଜନ ନିକଟରେ ଜେଲରୁ ମୁକ୍ତ ହୋଇଥିଲା। ଜେଲରୁ ବାହାରିବା ପରେ ସେ ପୁଣି ଏକ ନୂଆ ଗ୍ୟାଙ୍ଗ ଗଠନ କରି ଅବିଭକ୍ତ କୋରାପୁଟ ଜିଲ୍ଲାର ବିଭିନ୍ନ ଅଞ୍ଚଳରେ ଅପରାଧିକ କାର୍ଯ୍ୟକଳାପ ଚଳାଇଥିବା ଅଭିଯୋଗ ରହିଛି।

ଗତଅଗଷ୍ଟ ୨୫ ତାରିଖ ରାତିରେ ପାର୍ଲି-ଦାବୁଗୁଡ଼ା ରାସ୍ତାରେପୁଲିସ ପାଟ୍ରୋଲିଂ ଟିମ୍ ଉପରେ ସେ ସିଧାସଳଖ ଗୁଳି ଚଳାଇଥିବା ପୁଲିସ କହିଛି। ଏହା ପରେ ସେ ଘଟଣାସ୍ଥଳରୁ ଫେରାର ହୋଇଯାଇଥିଲା।

ଜଗଦଲପୁରରୁ ଧରାପଡ଼ିଲା

ଘଟଣା ପରେ ଏକ ସ୍ୱତନ୍ତ୍ର ପୁଲିସ ଟିମ୍ ତଦନ୍ତ ଆରମ୍ଭ କରିଥିଲା। ଶେଷରେ ସେପ୍ଟେମ୍ବର ୩ ତାରିଖରେ ଛତିଶଗଡ଼ରଜଗଦଲପୁରରୁ ଟୁନାକୁ ଧରାଯାଇଥିଲା।

ପଚରାଉଚରା ସମୟରେ ସେ କମାରା ମନ୍ଦିର, ଭୈରବ ମନ୍ଦିର ଓ ବିଜାପୁର ମନ୍ଦିରରେ ଚୋରି ସହ ଭାନସୁଲି ଡକାୟତି ଏବଂ ବାଦିଗାଁରେ ଚୋରି ଭଳି ଅନେକ ଅପରାଧରେ ନିଜର ସମ୍ପୃକ୍ତି ସ୍ୱୀକାର କରିଥିବା ପୁଲିସ କହିଛି।

୪୦ରୁ ଅଧିକ ମାମଲା

ପୁଲିସର ସୂଚନା ଅନୁସାରେ, ଟୁନା ହରିଜନଙ୍କ ବିରୋଧରେ ବିଭିନ୍ନ ଜିଲ୍ଲାରେ୪୦ରୁ ଅଧିକ ମାମଲାରହିଛି। ଏହା ବ୍ୟତୀତ ଛତିଶଗଡ଼ରେ ମଧ୍ୟ ତାଙ୍କ ବିରୋଧରେ ୧୦ଟି ମାମଲା ରହିଥିବା ପୁଲିସ କହିଛି।

୫୦ ଲକ୍ଷର ଅଳଙ୍କାର ଜବତ

ଗିରଫ ଗ୍ୟାଙ୍ଗଠାରୁ ପୁଲିସପ୍ରାୟ ୫୦ ଲକ୍ଷ ଟଙ୍କାର ସୁନା ଓ ରୁପା ଅଳଙ୍କାର, ଗୋଟିଏ ବନ୍ଧୁକ, ୨୦ ରାଉଣ୍ଡ ଜୀବନ୍ତ ଗୁଳି, ୫୦ ହଜାର ଟଙ୍କା ନଗଦ ଏବଂ ବୋଲେରୋ ସମେତ ୪ଟି ଗାଡ଼ି ଜବତ କରିଛି।

ପୁଲିସର ଏହି କାର୍ଯ୍ୟାନୁଷ୍ଠାନ ପରେ କୋରାପୁଟ ଓ ଆଖପାଖ ଅଞ୍ଚଳରେ ସକ୍ରିୟ ଥିବା ଏହି ଅପରାଧିକ ଗ୍ୟାଙ୍ଗର ନେଟୱର୍କ ନେଇ ଅଧିକ ତଦନ୍ତ ଜାରି ରହିଛି।