ଉତ୍ତରାଖଣ୍ଡର କେଦାରନାଥ ଯାତ୍ରାପଥର ଚିରବାସା ଅଞ୍ଚଳରେ ଭୂସ୍ଖଳନ ପରେ ଫସିଥିବା ପ୍ରାୟ ୧୫୦୦ ତୀର୍ଥଯାତ୍ରୀଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ସୋମବାର ଅଧିକାରୀମାନେ ଏହି ସୂଚନା ଦେଇଛନ୍ତି।

ରବିବାର ବିଳମ୍ବିତ ରାତିରେ ଚିରବାସା ଅଞ୍ଚଳରେ ଅନେକ ତୀର୍ଥଯାତ୍ରୀ ଭୂସ୍ଖଳନ ଯୋଗୁଁ ଯାତ୍ରାପଥର ଅନ୍ୟ ପାର୍ଶ୍ୱରେ ଫସି ରହିଥିଲେ। ଚିରବାସା ଅଞ୍ଚଳ ଗୌରୀକୁଣ୍ଡଠାରୁ ପ୍ରାୟ ୩ କିଲୋମିଟର ଆଗକୁ ଅବସ୍ଥିତ।

ସୂଚନା ପାଇବା ପରେ ସୋନପ୍ରୟାଗରୁ ସବ୍-ଇନ୍ସପେକ୍ଟର ଆଶିଷ ଡିମ୍ରିଙ୍କ ନେତୃତ୍ୱରେ SDRF ଟିମ୍ ଘଟଣାସ୍ଥଳରେ ପହଞ୍ଚିଥିଲା। ଚିରବାସା ହେଲିପ୍ୟାଡ୍ ନିକଟରେ ଭୂସ୍ଖଳନ ଯୋଗୁଁ ରାସ୍ତାରେ ବହୁ ପରିମାଣର ମାଟି ଓ ପଥର ଜମିଥିବା ଦେଖାଯାଇଥିଲା।

ଏହା ସହିତ ପାହାଡ଼ରୁ ଲଗାତାର ପଥର ଖସୁଥିବାରୁ ଯାତ୍ରୀମାନଙ୍କ ଗତିବିଧି ବିପଦପୂର୍ଣ୍ଣ ହୋଇପଡ଼ିଥିଲା। ପରିସ୍ଥିତିର ଗୁରୁତ୍ୱକୁ ଦେଖି SDRF, NDRF ଓ DDRFର ଟିମ୍‌ ମିଳିତ ଭାବେ ଉଦ୍ଧାର ଅଭିଯାନ ଆରମ୍ଭ କରିଥିଲେ।

ଉଦ୍ଧାରକାରୀ ଦଳ ଅତ୍ୟନ୍ତ ସାବଧାନତାର ସହ ତୀର୍ଥଯାତ୍ରୀମାନଙ୍କୁ ଭୂସ୍ଖଳନ ଅଞ୍ଚଳ ପାର କରାଇଥିଲେ। ପରେ ସେମାନଙ୍କୁ ସୁରକ୍ଷିତ ଭାବେ ଗୌରୀକୁଣ୍ଡକୁ ପଠାଯାଇଥିଲା।

🌧️ ଲଗାଣ ବର୍ଷା ଯୋଗୁଁ ଚାରଧାମ ଯାତ୍ରା ସ୍ଥଗିତ

ଉତ୍ତରାଖଣ୍ଡରେ ଲଗାଣ ବର୍ଷା ଜାରି ରହିଥିବାରୁ ଚାରଧାମ ଯାତ୍ରା କ୍ରମାଗତ ଦ୍ୱିତୀୟ ଦିନ ପାଇଁ ସ୍ଥଗିତ ରହିଥିଲା। ଭାରୀ ବର୍ଷା ସହ ପାହାଡ଼ିଆ ଅଞ୍ଚଳରେ ଭୂସ୍ଖଳନ ଓ ପଥର ଖସିବା ଆଶଙ୍କା ଯାତ୍ରୀଙ୍କ ସୁରକ୍ଷା ପାଇଁ ଚିନ୍ତା ବଢ଼ାଇଛି।