ଭାରତୀୟ ଲେଗ୍-ସ୍ପିନର କର୍ଣ୍ଣ ଶର୍ମା ଅନ୍ତର୍ଜାତୀୟ ଓ ଭାରତୀୟ ଘରୋଇ କ୍ରିକେଟରୁ ଅବସର ଘୋଷଣା କରିଛନ୍ତି। ୩୮ ବର୍ଷୀୟ କର୍ଣ୍ଣ ଶନିବାର ରାତିରେ ୟୁପି ଟି-୨୦ ଲିଗ୍‌ରେ କାନପୁର ସୁପରଷ୍ଟାର୍ସ ଓ ମେରଠ ମାଭେରିକ୍ସ ମଧ୍ୟରେ ମ୍ୟାଚ୍ ପରେ ଏହି ଘୋଷଣା କରିଥିଲେ। ଲକ୍ଷ୍ନୌ ଲେଗ୍‌ରେ ଅଗଷ୍ଟ ୨୫ରେ ନିଜ ଦଳର ଶେଷ ମ୍ୟାଚ୍ ଖେଳି ସେ କ୍ରିକେଟରେ ଖେଳାଳି ଭାବେ ନିଜ ଯାତ୍ରା ଶେଷ କରିବେ।

କର୍ଣ୍ଣ କହିଛନ୍ତି, “ମୁଁ ଏବେ ଅବସର ନେବାକୁ ଚାହୁଁଛି। ଏହି ଯାତ୍ରାରେ ମୋ ପରିବାର, ବିସିସିଆଇ, ରେଲୱେ, ୟୁପିସିଏ, ଆନ୍ଧ୍ର, ବିଦର୍ଭ କ୍ରିକେଟ ଆସୋସିଏସନ୍ ଏବଂ ମୋତେ ସମର୍ଥନ କରିଥିବା ସମସ୍ତଙ୍କ ପାଇଁ ମୁଁ ଅତ୍ୟନ୍ତ କୃତଜ୍ଞ।” ଏହା ପରେ ସେ କୋଚିଂ ଓ କ୍ରିକେଟ ସହ ଜଡ଼ିତ ଅନ୍ୟ ଦାୟିତ୍ୱ ନେବାକୁ ଉପଲବ୍ଧ ରହିବେ ବୋଲି କହିଛନ୍ତି।

କର୍ଣ୍ଣ ୨୦୦୭-୦୮ ଘରୋଇ ସିଜନରେ ପ୍ରଥମ ଶ୍ରେଣୀ, ଲିଷ୍ଟ-ଏ ଓ ଟି-୨୦ କ୍ରିକେଟରେ ପଦାର୍ପଣ କରିଥିଲେ। ଆରମ୍ଭରେ ସେ ଜଣେ ଅଲରାଉଣ୍ଡର ଭାବେ ଖେଳୁଥିଲେ। ରଣଜୀ ଟ୍ରଫିରେ ଶତକ ସହ ଡେବ୍ୟୁ କରିଥିବା କର୍ଣ୍ଣଙ୍କ ପାଇଁ ୨୦୧୨-୧୩ ସିଜନ୍ ବଡ଼ ମୋଡ଼ ଆଣିଥିଲା। ସେହି ସିଜନରେ ମାତ୍ର ୩ଟି ରଣଜୀ ମ୍ୟାଚରେ ୧୯.୦୪ ହାରରେ ୨୧ଟି ୱିକେଟ୍ ନେଇ ସେ ବିସିସିଆଇର ବେଷ୍ଟ ଅଣ୍ଡର-୨୫ କ୍ରିକେଟର ପୁରସ୍କାର ପାଇଥିଲେ।

୨୦୧୪ ଆଇପିଏଲ୍ ନିଲାମରେ ସନରାଇଜର୍ସ ହାଇଦ୍ରାବାଦ ତାଙ୍କୁ ୩.୭୫ କୋଟି ଟଙ୍କାରେ କିଣିଥିଲା। ସେତେବେଳେ ସେ ସବୁଠାରୁ ମହଙ୍ଗା ଅନକ୍ୟାପ୍ଡ ଭାରତୀୟ ଖେଳାଳି ହୋଇଥିଲେ।

ଏହା ପରେ କର୍ଣ୍ଣ ଭାରତୀୟ ଦଳରେ ସୁଯୋଗ ପାଇଥିଲେ। ୨୦୧୪ରେ ଇଂଲଣ୍ଡ ଗସ୍ତରେ ସେ ଟି-୨୦ ଅନ୍ତର୍ଜାତୀୟ ଡେବ୍ୟୁ କରିଥିଲେ ଏବଂ ଜୋ ରୁଟଙ୍କୁ ଆଉଟ୍ କରି ଭାରତ ପାଇଁ ନିଜର ଏକମାତ୍ର ଟି-୨୦ ୱିକେଟ୍ ନେଇଥିଲେ। ପରେ ଶ୍ରୀଲଙ୍କା ବିପକ୍ଷ ଦିନିକିଆରେ ଡେବ୍ୟୁ କରିଥିଲେ। ସେହି ସିରିଜର ଦୁଇଟି ମ୍ୟାଚ୍‌ରେ ସେ ୱିକେଟ୍ ନେଇପାରିନଥିଲେ।

ସେହି ବର୍ଷ ଆଡିଲେଡ୍‌ରେ ଅଷ୍ଟ୍ରେଲିଆ ବିପକ୍ଷରେ କର୍ଣ୍ଣ ଟେଷ୍ଟ ଡେବ୍ୟୁ କରିଥିଲେ। ଉଭୟ ଇନିଂସରେ ୨ଟି ଲେଖାଏଁ ୱିକେଟ୍ ନେଇ ମୋଟ ୪ଟି ୱିକେଟ୍ ହାସଲ କରିଥିଲେ। ଏହା ତାଙ୍କର ଏକମାତ୍ର ଟେଷ୍ଟ ମ୍ୟାଚ୍ ହୋଇ ରହିଗଲା।

ଆଇପିଏଲରେ ଐତିହାସିକ ସଫଳତା

କର୍ଣ୍ଣ ଶର୍ମାଙ୍କ ଅନ୍ତର୍ଜାତୀୟ କ୍ୟାରିୟର ସୀମିତ ଥିଲେ ମଧ୍ୟ ଆଇପିଏଲରେ ତାଙ୍କର ସଫଳତା ଉଲ୍ଲେଖନୀୟ। ସେ ତିନୋଟି ଭିନ୍ନ ଦଳ ସହ ଲଗାତାର ତିନିଟି ଆଇପିଏଲ୍ ଟାଇଟଲ୍ ଜିତିଥିବା ପ୍ରଥମ ଖେଳାଳି ହୋଇଥିଲେ।

୨୦୧୬ରେ ସନରାଇଜର୍ସ ହାଇଦ୍ରାବାଦ, ୨୦୧୭ରେ ମୁମ୍ବାଇ ଇଣ୍ଡିଆନ୍ସ ଏବଂ ୨୦୧୮ରେ ଚେନ୍ନାଇ ସୁପର କିଙ୍ଗ୍ସ ସହ ସେ ଆଇପିଏଲ୍ ଟ୍ରଫି ଜିତିଥିଲେ।

ଘରୋଇ କ୍ରିକେଟରେ କର୍ଣ୍ଣ ବିଦର୍ଭ ଓ ଆନ୍ଧ୍ର ପାଇଁ ମଧ୍ୟ ଖେଳିଥିଲେ ଏବଂ ପରେ ପୁଣି ରେଲୱେସ୍‌କୁ ଫେରିଥିଲେ। ତାଙ୍କର ଶେଷ ଆଇପିଏଲ୍ ମ୍ୟାଚ୍ ୨୦୨୫ରେ ମୁମ୍ବାଇ ଇଣ୍ଡିଆନ୍ସ ପାଇଁ ଥିଲା।

୯୭ଟି ପ୍ରଥମ ଶ୍ରେଣୀ ମ୍ୟାଚରେ କର୍ଣ୍ଣ ୨୭୦ ୱିକେଟ୍ ନେଇଛନ୍ତି। ଲିଷ୍ଟ-ଏରେ ୧୨୩ଟି ମ୍ୟାଚ୍‌ରୁ ୧୫୩ ୱିକେଟ୍ ଏବଂ ଟି-୨୦ରେ ୧୯୧ଟି ମ୍ୟାଚ୍‌ରୁ ୧୬୮ ୱିକେଟ୍ ତାଙ୍କ ନାମରେ ରହିଛି। ଏଥିରେ ଆଇପିଏଲରେ ୯୦ଟି ମ୍ୟାଚ୍‌ରୁ ୮୩ ୱିକେଟ୍ ସାମିଲ।

ପ୍ରାୟ ଦୁଇ ଦଶନ୍ଧିର କ୍ରିକେଟ ଯାତ୍ରା ପରେ କର୍ଣ୍ଣ ଶର୍ମା ଏବେ ଖେଳାଳି ଭାବେ ଅଧ୍ୟାୟ ଶେଷ କରି କୋଚିଂ ଏବଂ କ୍ରିକେଟ ସହ ଜଡ଼ିତ ଅନ୍ୟ ଦାୟିତ୍ୱ ଦିଗରେ ଆଗକୁ ବଢ଼ିବେ।