ଚେନ୍ନାଇ: ରଜନୀକାନ୍ତଙ୍କ ‘ଜେଲର୍ ୨’କୁ ନେଇ ସାରା ବିଶ୍ୱରେ ପ୍ରଶଂସକଙ୍କ ଉତ୍ସାହ।ଅକ୍ଟୋବର ୧୫ରେ ସିନେମା ହଲ୍କୁ ଆସିଥିବା ଏହି ଆକ୍ସନ୍ ଡ୍ରାମାକୁ ସ୍ୱାଗତ କରିବା ପାଇଁ ଅନେକ ସ୍ଥାନରେ ପ୍ରଶଂସକମାନେ ସକାଳୁ ସକାଳୁ ଥିଏଟରରେ ଭିଡ଼ ଜମାଇଥିଲେ। ଢୋଲର ତାଳ, ନାଚ, ବାଣ ଫୁଟାଇବା ଓ ରଜନୀକାନ୍ତଙ୍କ ବିଶାଳ କଟ୍ଆଉଟ୍ରେ ଫୁଲମାଳ ପକାଇବା ଭଳି ଦୃଶ୍ୟ ଅନେକ ସ୍ଥାନରେ ଦେଖିବାକୁ ମିଳିଛି।

ଭାରତର ଚେନ୍ନାଇ ଓ ବେଙ୍ଗାଲୁରୁ ସମେତ ଦୁବାଇ, ସିଙ୍ଗାପୁର, କାନାଡା ଓ ଆମେରିକାରେ ମଧ୍ୟ ପ୍ରଶଂସକମାନେ ଫିଲ୍ମର ପ୍ରଥମ ଦିନର ଶୋ’କୁ ଉତ୍ସବ ଭଳି ପାଳନ କରିଥିବା ରିପୋର୍ଟରେ କୁହାଯାଇଛି। ଦୁବାଇର ଡେଇରା ସିଟି ସେଣ୍ଟରରେ ଭୋର୍ ସମୟର ଶୋ’ ପାଇଁ ଦର୍ଶକଙ୍କ ଭିଡ଼ ଜମିଥିବା ବେଳେ ସିଙ୍ଗାପୁରରେ ପ୍ରଶଂସକମାନେ ମୋବାଇଲ୍ ଫ୍ଲାଶ୍ଲାଇଟ୍ ଜଳାଇ ଉତ୍ସାହ ପ୍ରକାଶ କରିଥିଲେ।

ଚେନ୍ନାଇର କାସି ଥିଏଟରରେ ରଜନୀକାନ୍ତଙ୍କ ଝିଅ ସୌନ୍ଦର୍ଯ୍ୟା ମଧ୍ୟ ପହଞ୍ଚିଥିଲେ। ସେଠାରେ ସେ ପ୍ରଶଂସକଙ୍କ ସହ ଢୋଲର ତାଳେ ତାଳେ ନାଚିଥିବା ଜଣାପଡ଼ିଛି। ଅନ୍ୟପଟେ ବେଙ୍ଗାଲୁରୁରେ ସକାଳର ଶୋ’ ପୂର୍ବରୁ ବାଣ ଫୁଟାଇବା, ପୂଜାର୍ଚ୍ଚନା ଓ ନଡ଼ିଆ ଭାଙ୍ଗିବା ଭଳି କାର୍ଯ୍ୟକ୍ରମ ହୋଇଥିଲା।

ଏଥର ‘ଜେଲର୍ ୨’ର ଏକ ବିଶେଷ ଦିଗ ହେଉଛି, ରିପୋର୍ଟ ଅନୁସାରେ ରଜନୀକାନ୍ତଙ୍କ କୌଣସି ଫିଲ୍ମ ପ୍ରଥମ ଥର ପାଇଁ ଭାରତ ଓ ଜାପାନରେ ଏକାସାଙ୍ଗରେ ରିଲିଜ୍ ହୋଇଛି। ଏହା ଜାପାନରେ ଥିବା ରଜନୀକାନ୍ତଙ୍କ ପ୍ରଶଂସକଙ୍କ ମଧ୍ୟରେ ମଧ୍ୟ ଉତ୍ସାହ ବଢ଼ାଇଛି।

ନେଲସନ୍ ଦିଲୀପକୁମାରଙ୍କ ନିର୍ଦ୍ଦେଶିତ ଏହି ସିକ୍ୱେଲ୍ରେ ରଜନୀକାନ୍ତ ପୁଣିଥରେ ଅବସରପ୍ରାପ୍ତ ଜେଲ୍ ଅଧିକାରୀ ମୁଥୁଭେଲ୍ ପାଣ୍ଡିଆନ୍ଙ୍କ ଭୂମିକାରେ ଫେରିଛନ୍ତି। ମୋହନଲାଲ୍, ଶିବ ରାଜକୁମାର, ଏସ୍.ଜେ. ସୂର୍ଯ୍ୟା ଓ ବିଦ୍ୟା ବାଲାନ୍ଙ୍କ ଭଳି କଳାକାର ମଧ୍ୟ ଏହି ଫିଲ୍ମରେ ଅଭିନୟ କରିଛନ୍ତି।

ରଜନୀକାନ୍ତଙ୍କ ଦୀର୍ଘ ଦିନର ଷ୍ଟାରଡମ୍ ଓ ପ୍ରଶଂସକଙ୍କ ଭଲପାଇବା ପୁଣିଥରେ ‘ଜେଲର୍ ୨’ର ରିଲିଜ୍ ଉତ୍ସବ ମାଧ୍ୟମରେ ସାମ୍ନାକୁ ଆସିଛି।