ଜଗତସିଂହପୁର ଜିଲ୍ଲାର ଉପକୂଳ ଅଞ୍ଚଳରେ ପୁଣିଥରେ ବନ୍ଧ ଭାଙ୍ଗିବା ଘଟଣା ସ୍ଥାନୀୟ ଲୋକଙ୍କ ଚିନ୍ତା ବଢ଼ାଇଛି।ଏରସମା ବ୍ଲକ୍ ଅନ୍ତର୍ଗତ ରାମତରା ଗାଁ ନିକଟରେ ପ୍ରାୟ ୫୦ ଫୁଟ୍ ଚଉଡ଼ାର ଘାଇସୃଷ୍ଟି ହୋଇଛି। ଏହି ଅସ୍ଥାୟୀ ବନ୍ଧ ଦୁର୍ବଳ ହେବା ପରେ ସମୁଦ୍ର ଜଳ ନିକଟସ୍ଥ ଚାଷଜମି ଓ ଗାଁ ଅଞ୍ଚଳକୁ ପ୍ରବେଶ କରିବା ଆରମ୍ଭ କରିଛି।

ସୂଚନା ଅନୁସାରେ, ଗତ କିଛି ଦିନ ଧରି ଲଗାତାର ବର୍ଷା ସହିତ ସମୁଦ୍ରରେ ଜୁଆର ଓ ତୀବ୍ର ତରଙ୍ଗ ଦେଖାଦେଇଥିଲା। ଏହାର ପ୍ରଭାବରେ ରାମତରା ଅଞ୍ଚଳର ଅସ୍ଥାୟୀ ବାଲି ବନ୍ଧ ଉପରେ ଚାପ ବଢ଼ିଥିଲା। ପ୍ରଶାସନ ପୂର୍ବରୁ ବିପଦପ୍ରବଣ ଅଞ୍ଚଳରେବାଲିବସ୍ତା ପକାଇ ବନ୍ଧକୁ ମଜବୁତ କରିବାକୁଚେଷ୍ଟା କରିଥିଲେ ମଧ୍ୟ ଜୁଆର ଲହଡ଼ି ଏହି ଅସ୍ଥାୟୀ ସୁରକ୍ଷା ବ୍ୟବସ୍ଥାକୁ ଧୋଇ ନେଇଥିଲା।

ବନ୍ଧ ଭାଙ୍ଗିବା ପରେସିଆଳି, ରାମତରା, କାଳବେଦୀ ଓ ଅନ୍ୟ କିଛି ଗାଁଅଞ୍ଚଳକୁ ସମୁଦ୍ରର ଲୁଣିଆ ପାଣି ପଶିଥିବା ଜଣାପଡ଼ିଛି। ଏହାର ପ୍ରଭାବରେ ଚାଷଜମି, ଧାନ ଫସଲ ଏବଂ ମଧୁର ଜଳରେ ତିଆରି ହୋଇଥିବା ଚିଙ୍ଗୁଡ଼ି ଘେରି ପ୍ରଭାବିତ ହୋଇଛି।

ସ୍ଥାନୀୟ ଲୋକଙ୍କ କହିବା ଅନୁସାରେ, ଏହି ଅଞ୍ଚଳରେ ବନ୍ଧ ଭାଙ୍ଗିବା ନୂଆ ଘଟଣା ନୁହେଁ। ଗତବର୍ଷ ମଧ୍ୟ ରାମତରା ଅଞ୍ଚଳରେ ପ୍ରାୟ୧୦୦ ଫୁଟ୍ର ଘାଇସୃଷ୍ଟି ହୋଇଥିଲା। ପରେ ଜଳସମ୍ପଦ ବିଭାଗ ପକ୍ଷରୁ ବାଲିବସ୍ତା ପକାଇ ତାହାକୁ ଅସ୍ଥାୟୀ ଭାବେ ବନ୍ଦ କରାଯାଇଥିଲା। ଏଥର ପୁଣି ସେହି ଅଞ୍ଚଳରେ ପ୍ରାୟ ୫୦ ଫୁଟ୍ର ଘାଇ ହେବାରୁ ଲୋକଙ୍କ ଚିନ୍ତା ବଢ଼ିଛି।

ଏହାସହିତ ଗଡ଼ହରିଶପୁର ପଞ୍ଚାୟତ ଅଧୀନ ନୋଳିଆଶାଇ ନିକଟରେ ମଧ୍ୟ ପୂର୍ବରୁ ପ୍ରାୟ ୫୦ ଫୁଟ୍ର ଅନ୍ୟ ଏକ ଘାଇ ସୃଷ୍ଟି ହୋଇଥିବା ସୂଚନା ମିଳିଛି। ଉପକୂଳ ଅଞ୍ଚଳରେ ବର୍ଷା, ସମୁଦ୍ରର ଉଚ୍ଚ ଜୁଆର ଓ ତୀବ୍ର ତରଙ୍ଗ ସମୟରେ ଏଭଳି ଘାଇ ଆହୁରି ବଡ଼ ହେବା ଆଶଙ୍କା ରହୁଛି।

ସ୍ଥାନୀୟ ସରପଞ୍ଚଙ୍କ ଅଭିଯୋଗ ଅନୁସାରେ, ବିପଦପ୍ରବଣ ଉପକୂଳ ଅଞ୍ଚଳରେପଥର ପ୍ୟାକିଂ ସହ ସ୍ଥାୟୀ ଲୁଣିଆ ବନ୍ଧନିର୍ମାଣ ପାଇଁ ବାରମ୍ବାର ଦାବି କରାଯାଇଥିଲେ ମଧ୍ୟ ତାହା ହୋଇନାହିଁ। ଫଳରେ ପ୍ରତିବର୍ଷ ବର୍ଷା ଓ ସମୁଦ୍ରର ଉଚ୍ଚ ଜୁଆର ସମୟରେ ବନ୍ଧ ଭାଙ୍ଗିବା ଆଶଙ୍କା ରହୁଛି।

ଏରସମା ତହସିଲଦାରଙ୍କ ସୂଚନା ଅନୁସାରେ, ଘାଇ ସ୍ଥାନରେ ପୂର୍ବରୁ ବାଲିବସ୍ତା ପକାଯାଇଥିଲା। କିନ୍ତୁ ଜୁଆର ଲହଡ଼ି ଅସ୍ଥାୟୀ ବାଲିବନ୍ଧକୁ ଧୋଇ ନେଇଥିଲା। ଏବେ ଉପକୂଳବର୍ତ୍ତୀ ଗାଁଗୁଡ଼ିକର ସୁରକ୍ଷା ପାଇଁ ପ୍ରଶାସନ ପକ୍ଷରୁ ଆବଶ୍ୟକ ବ୍ୟବସ୍ଥା କରାଯାଉଛି।

ଏହି ଘଟଣା ପରେ ଉପକୂଳ ଅଞ୍ଚଳର ଲୋକଙ୍କ ମଧ୍ୟରେ ପୁଣିଥରେ ଆଶଙ୍କା ବଢ଼ିଛି। ବିଶେଷକରି ଆଗକୁ ଅଧିକ ଜୁଆର କିମ୍ବା ଖରାପ ପାଣିପାଗ ହେଲେ ଘାଇ ଆହୁରି ବଡ଼ ହୋଇପାରେ ବୋଲି ସ୍ଥାନୀୟ ଲୋକେ ଚିନ୍ତା ପ୍ରକାଶ କରିଛନ୍ତି।