ଇଟାଲୀର ପ୍ରଧାନମନ୍ତ୍ରୀ ଜିଓର୍ଜିଆ ମେଲୋନି ଭାରତରେ ଲୋକପ୍ରିୟ ହୋଇଥିଲେ ମଧ୍ୟ ନିଜ ଦେଶରେ ଯୁବପିଢ଼ିଙ୍କ ମଧ୍ୟରେ ତାଙ୍କ ସରକାର ପ୍ରତି ସମର୍ଥନ କମୁଥିବା ଏକ ନୂଆ ସର୍ଭେରୁ ଜଣାପଡ଼ିଛି। ଆସନ୍ତା ବର୍ଷ ଇଟାଲୀରେ ଜାତୀୟ ନିର୍ବାଚନ ହେବାକୁ ଥିବାରୁ ଏହି ପରିବର୍ତ୍ତନ ମେଲୋନିଙ୍କ ପାଇଁ ରାଜନୈତିକ ଚ୍ୟାଲେଞ୍ଜ ହୋଇପାରେ।

ଯୁବ ଭୋଟରଙ୍କ ପସନ୍ଦ ବଦଳୁଛି

ୟୁଟ୍ରେଣ୍ଡ ପୋଲିଂ ଏଜେନ୍ସିର ତଥ୍ୟ ଅନୁସାରେ, ୩୫ ବର୍ଷରୁ କମ୍ ବୟସର ଭୋଟରଙ୍କ ମଧ୍ୟରେ ମେଲୋନିଙ୍କ ମେଣ୍ଟକୁ ୩୦%ରୁ କମ୍ ସମର୍ଥନ ମିଳୁଛି।

ମେଲୋନିଙ୍କ Brothers of Italy, ମାଟେଓ ସାଲଭିନିଙ୍କ League ଏବଂ ଆଣ୍ଟୋନିଓ ତାଜାନିଙ୍କ Forza Italia ମିଶି ତାଙ୍କ ଶାସକ ମେଣ୍ଟ ଗଠନ କରିଛନ୍ତି।

ଅନ୍ୟପକ୍ଷରେ, Democratic Party, Five Star Movement ଏବଂ Left-Green Alliance ସମର୍ଥିତ ବିରୋଧୀ ମେଣ୍ଟକୁ ସମାନ ବୟସ ବର୍ଗର ପ୍ରାୟ ୫୦% ଯୁବ ଭୋଟର ସମର୍ଥନ କରୁଥିବା ଦାବି କରାଯାଇଛି।

ପୁରୁଷ ରାଇଟ୍‌ୱିଙ୍ଗ୍‌ରେ, ମହିଳା ଲେଫ୍ଟ୍‌ୱିଙ୍ଗ୍‌ରେ

ଇଟାଲୀର ଯୁବପିଢ଼ିଙ୍କ ରାଜନୈତିକ ପସନ୍ଦରେ ଲିଙ୍ଗଗତ ପାର୍ଥକ୍ୟ ମଧ୍ୟ ଦେଖାଯାଉଛି। ଉପଲବ୍ଧ ଅଧ୍ୟୟନ ଅନୁସାରେ, ଯୁବ ପୁରୁଷମାନେ ତୁଳନାମୂଳକ ଭାବେ ରାଇଟ୍‌ୱିଙ୍ଗ୍ ଦଳକୁ ଅଧିକ ପସନ୍ଦ କରୁଥିବାବେଳେ ଯୁବ ମହିଳାମାନଙ୍କ ମଧ୍ୟରେ ଲେଫ୍ଟ୍‌ୱିଙ୍ଗ୍ ଦଳ ପ୍ରତି ସମର୍ଥନ ଅଧିକ ରହିଛି।

୧୮ରୁ ୨୯ ବର୍ଷ ବୟସର ପୁରୁଷଙ୍କ ମଧ୍ୟରେ ମେଲୋନିଙ୍କ ଦଳ FDIକୁ ପ୍ରାୟ ୧୫% ସମର୍ଥନ ମିଳୁଥିବାବେଳେ ମହିଳାଙ୍କ ମଧ୍ୟରେ ଏହା ପ୍ରାୟ ୪.୨% ରହିଛି। ଅନ୍ୟପକ୍ଷରେ, ୩୦ ବର୍ଷରୁ କମ୍ ବୟସର ମହିଳାଙ୍କ ମଧ୍ୟରେ Five Star Movement ପ୍ରତି ପ୍ରାୟ ୧୮% ସମର୍ଥନ ଥିବାବେଳେ ପୁରୁଷଙ୍କ ମଧ୍ୟରେ ଏହା ପ୍ରାୟ ୫.୧% ବୋଲି ଅଧ୍ୟୟନରେ ଦର୍ଶାଯାଇଛି।

ରୋଜଗାର ଓ ଅର୍ଥନୀତି ନେଇ ଅସନ୍ତୋଷ

ଯୁବପିଢ଼ିଙ୍କ ମଧ୍ୟରେ ମେଲୋନି ସରକାର ପ୍ରତି ଅସନ୍ତୋଷର ଏକ ବଡ଼ କାରଣ ଭାବେ ଆର୍ଥିକ ନୀତି ଓ ରୋଜଗାର ସୁଯୋଗକୁ ଦର୍ଶାଯାଉଛି।

ରୋମ୍‌ର ଲୁଇସ୍ ୟୁନିଭର୍ସିଟିର ରାଜନୀତି ବିଜ୍ଞାନ ପ୍ରଫେସର ଲୋରେଞ୍ଜୋ ଡି ସିଓଙ୍କ ମତରେ, ମେଲୋନି ସରକାର ବଡ଼ ଆର୍ଥିକ ସଂସ୍କାର କରିବାରେ ଧୀମା ରହିଛି।

ବ୍ୟାଙ୍କ ଅଫ୍ ଇଟାଲୀର ତଥ୍ୟ ଅନୁସାରେ, ଜର୍ମାନୀର ଜଣେ ଯୁବ ଗ୍ରାଜୁଏଟ୍ ତାଙ୍କ ଇଟାଲୀୟ ସମକକ୍ଷଙ୍କ ତୁଳନାରେ ହାରାହାରି ପ୍ରାୟ ୮୦% ଅଧିକ ରୋଜଗାର କରୁଛନ୍ତି। ଭଲ ଚାକିରି ଓ ଆର୍ଥିକ ସୁଯୋଗ ଖୋଜି ପ୍ରତିବର୍ଷ ବହୁ ସଂଖ୍ୟକ ଯୁବ ଇଟାଲୀୟ ଦେଶ ଛାଡ଼ୁଥିବା ମଧ୍ୟ ଏକ ବଡ଼ ଚିନ୍ତାର ବିଷୟ।

ସରକାରଙ୍କ କଡ଼ା ଆଇନ ମଧ୍ୟ ଚର୍ଚ୍ଚାରେ

ମେଲୋନି ସରକାରଙ୍କ କଡ଼ା ଆଇନ-ଶୃଙ୍ଖଳା ଆଭିମୁଖ୍ୟ ମଧ୍ୟ ଯୁବପିଢ଼ିଙ୍କ ଏକ ଅଂଶଙ୍କ ମଧ୍ୟରେ ଅସନ୍ତୋଷର କାରଣ ବୋଲି ରିପୋର୍ଟରେ କୁହାଯାଇଛି।

ରେଭ୍ ପାର୍ଟି ଉପରେ ପ୍ରତିବନ୍ଧ, ‘ଲାଇଟ୍ କାନାବିସ୍’ ସମ୍ପର୍କିତ କଟକଣା, ରାସ୍ତାରେ ହିଂସାତ୍ମକ ବିରୋଧ ଏବଂ ବେଆଇନ ଦଖଲ ବିରୋଧରେ ପଦକ୍ଷେପ ଭଳି ବିଭିନ୍ନ ନୀତି ନେଇ ସରକାର ସମାଲୋଚନାର ସମ୍ମୁଖୀନ ହୋଇଛି।

ଗତବର୍ଷ ନଭେମ୍ବରରେ ‘No Meloni Day’ ନାମରେ ଛାତ୍ର ଆନ୍ଦୋଳନ ମଧ୍ୟ ହୋଇଥିଲା। ଛାତ୍ରମାନେ ସୁରକ୍ଷା ନୀତି, ଶିକ୍ଷା ବଜେଟ୍‌ରେ କାଟଛାଟ ଏବଂ ଗାଜା ପ୍ରସଙ୍ଗରେ ସରକାରଙ୍କ ଆଭିମୁଖ୍ୟକୁ ନେଇ ବିରୋଧ ପ୍ରଦର୍ଶନ କରିଥିଲେ।

ଏହା ସହିତ ନାବାଳକ ଅପରାଧ ସମ୍ପର୍କିତ ଆଇନରେ ପରିବର୍ତ୍ତନ ପାଇଁ ସରକାର ଆଣିଥିବା ପ୍ରସ୍ତାବ ମଧ୍ୟ ଚର୍ଚ୍ଚାରେ ରହିଛି। ଏହି ସମସ୍ତ ଘଟଣା ମିଶି ଇଟାଲୀର ଯୁବ ଭୋଟରଙ୍କ ମଧ୍ୟରେ ରାଜନୈତିକ ସମର୍ଥନରେ ପରିବର୍ତ୍ତନ ଆସୁଥିବା ଚିତ୍ରକୁ ସାମ୍ନାକୁ ଆଣିଛି।