ଭାରତରେ ଚାଲିଥିବା ଛାତ୍ର ଆନ୍ଦୋଳନକୁ ନେଇ ପାକିସ୍ତାନର କିଛି ଯୁବକ ସୋସିଆଲ ମିଡିଆରେ ସମର୍ଥନ ଜଣାଇବା ପରେ ଏହାକୁ ନେଇ ନୂଆ ଚର୍ଚ୍ଚା ଆରମ୍ଭ ହୋଇଛି। ଏହି ପ୍ରସଙ୍ଗରେ ଭାରତ ସ୍ପଷ୍ଟ ଭାବେ କହିଛି ଯେ, ପାକିସ୍ତାନ ଭାରତର ଆଭ୍ୟନ୍ତରୀଣ ପ୍ରସଙ୍ଗରେ ହସ୍ତକ୍ଷେପ କରିବା ପରିବର୍ତ୍ତେ ସୀମାପାର ଆତଙ୍କବାଦ ବନ୍ଦ କରିବା ଉପରେ ଧ୍ୟାନ ଦେବା ଉଚିତ।

ବିଦେଶ ମନ୍ତ୍ରଣାଳୟର ମୁଖପାତ୍ର ରଣଧୀର ଜୈସୱାଲ ସାମ୍ବାଦିକ ସମ୍ମିଳନୀରେ କହିଛନ୍ତି ଯେ, ପାକିସ୍ତାନ ଦଶନ୍ଧି ଧରି ଭାରତ ବିରୋଧରେ ସୀମାପାର ଆତଙ୍କବାଦକୁ ପ୍ରୋତ୍ସାହନ ଦେଇଆସୁଛି। ଏହି କାର୍ଯ୍ୟକଳାପ ସମ୍ପୂର୍ଣ୍ଣ ବନ୍ଦ କରିବା ହିଁ ପାକିସ୍ତାନର ପ୍ରାଥମିକତା ହେବା ଉଚିତ ବୋଲି ସେ କହିଛନ୍ତି।

ତାଙ୍କ କହିବା ଅନୁସାରେ, ଭାରତର ଆଭ୍ୟନ୍ତରୀଣ ବିଷୟକୁ ନେଇ ଅନାବଶ୍ୟକ ମନ୍ତବ୍ୟ କରିବା ପରିବର୍ତ୍ତେ ପାକିସ୍ତାନ ନିଜ ଦେଶରୁ ଆତଙ୍କବାଦୀ କାର୍ଯ୍ୟକଳାପ ଶେଷ କରିବା ଉପରେ ଗୁରୁତ୍ୱ ଦେବା ଦରକାର। ସେ ଆହୁରି କହିଛନ୍ତି ଯେ, ପାକିସ୍ତାନର ଯୁବପିଢ଼ି ମଧ୍ୟ ଏହି ଦାବିକୁ ସମର୍ଥନ କରୁଥିବା ଦେଖାଯାଉଛି।

ଅନ୍ୟପଟେ, ଭାରତରେ ଚାଲିଥିବା ପ୍ରଦର୍ଶନକୁ ନେଇ ପାକିସ୍ତାନ ବିଦେଶ ମନ୍ତ୍ରଣାଳୟ ଏହାକୁ ଭାରତର ଆଭ୍ୟନ୍ତରୀଣ ପ୍ରସଙ୍ଗ ବୋଲି କହି କୌଣସି ମତାମତ ଦେବାକୁ ମନା କରିଛି। ଏହି ସମୟରେ ପାକିସ୍ତାନର କିଛି ସୋସିଆଲ ମିଡିଆ ବ୍ୟବହାରକାରୀ ଭାରତୀୟ ଛାତ୍ର ଆନ୍ଦୋଳନ ପ୍ରତି ସମର୍ଥନ ଜଣାଇ ପୋଷ୍ଟ କରିଥିବା ନେଇ ମଧ୍ୟ ଚର୍ଚ୍ଚା ହୋଇଛି।

ଏହାସହ ସିନ୍ଧୁ ସଭ୍ୟତାକୁ ନେଇ ପାକିସ୍ତାନର ଦାବି ଉପରେ ମଧ୍ୟ ଭାରତ କଡ଼ା ପ୍ରତିକ୍ରିୟା ରଖିଛି। ରଣଧୀର ଜୈସୱାଲ କହିଛନ୍ତି, ଯେଉଁ ଦେଶ ବର୍ଷ ବର୍ଷ ଧରି ଆତଙ୍କବାଦ, ଧାର୍ମିକ କଟ୍ଟରବାଦ ଓ ହିଂସାକୁ ପ୍ରୋତ୍ସାହନ ଦେଇଆସୁଛି, ସେହି ଦେଶ ବହୁଳବାଦୀ ସାଂସ୍କୃତିକ ଐତିହ୍ୟ ଉପରେ ଦାବି କରିପାରିବ ନାହିଁ। ସଂଖ୍ୟାଲଘୁ ଓ ସେମାନଙ୍କ ସାଂସ୍କୃତିକ ଅଧିକାର ସୁରକ୍ଷା କ୍ଷେତ୍ରରେ ପାକିସ୍ତାନର ରେକର୍ଡ ମଧ୍ୟ ସନ୍ତୋଷଜନକ ନୁହେଁ ବୋଲି ସେ କହିଛନ୍ତି।

ପହଲଗାମ ଆତଙ୍କୀ ଆକ୍ରମଣ ପରେ ଭାରତ ସିନ୍ଧୁ ଜଳ ଚୁକ୍ତିକୁ ସ୍ଥଗିତ ରଖିଥିବା କଥା ଉଲ୍ଲେଖ କରି ବିଦେଶ ମନ୍ତ୍ରଣାଳୟ କହିଛି ଯେ, ପାକିସ୍ତାନ ପ୍ରାୟୋଜିତ ସୀମାପାର ଆତଙ୍କବାଦ ସିନ୍ଧୁ ଜଳ ଚୁକ୍ତିର ମୂଳ ଭାବନାକୁ କ୍ଷୁଣ୍ଣ କରିଛି। ତେଣୁ ଆତଙ୍କବାଦ ଓ ଏହି ଚୁକ୍ତିକୁ ଅଲଗା କରି ଦେଖାଯାଇପାରିବ ନାହିଁ ବୋଲି ଭାରତ ସ୍ପଷ୍ଟ କରିଛି।

ସୂଚନାଯୋଗ୍ୟ ଯେ, ଇସ୍ଲାମାବାଦରେ ଆୟୋଜିତ ଏକ ସେମିନାରରେ ପାକିସ୍ତାନର ସୂଚନା ମନ୍ତ୍ରୀ ସିନ୍ଧୁ ସଭ୍ୟତାକୁ ପାକିସ୍ତାନର ଜାତୀୟ ପରିଚୟର ମୂଳ ଆଧାର ବୋଲି କହିଥିଲେ। ଏହି ମନ୍ତବ୍ୟର କଡ଼ା ଜବାବ ଦେଇ ଭାରତ ନିଜର ଅବସ୍ଥାନ ସ୍ପଷ୍ଟ କରିଛି।