ଭାରତରେ ପୁଣି Formula 1 ରେସ୍ ଆୟୋଜନ କରିବା ନେଇ ବଡ଼ ପଦକ୍ଷେପ ନିଆଯାଇଛି। କେନ୍ଦ୍ର କ୍ରୀଡ଼ାମନ୍ତ୍ରୀ ମନସୁଖ ମାଣ୍ଡଭିୟ ମଙ୍ଗଳବାର ମୋଟରସ୍ପୋର୍ଟ୍ସର ବିକାଶ ଏବଂ Formula 1କୁ ଭାରତକୁ ଫେରାଇ ଆଣିବାର ସମ୍ଭାବନା ଯାଞ୍ଚ ପାଇଁ ୧୦ ଜଣିଆ ଟାସ୍କ ଫୋର୍ସ ଗଠନ ଘୋଷଣା କରିଛନ୍ତି।

୨୦୨୮ରେ ଭାରତରେ Formula 1 ରେସ୍ ଆୟୋଜନ କରିବା ସମ୍ଭବ କି ନାହିଁ, ତାହାର ବିସ୍ତୃତ ଅଧ୍ୟୟନ କରିବ ଏହି ଟାସ୍କ ଫୋର୍ସ। NITI Aayogର Programme Director ଓ Adviser ୟୁଗଳ କିଶୋର ଯୋଶୀ କମିଟିର ଅଧ୍ୟକ୍ଷ ରହିବେ। Joint Secretary (Sports) କୁନାଲ ମଧ୍ୟ କମିଟିରେ ସାମିଲ ହେବେ।

ପର୍ଯ୍ୟଟନ, ବାଣିଜ୍ୟ, ରାଜସ୍ୱ ବିଭାଗ ସହ ଉତ୍ତରପ୍ରଦେଶ ଓ ମହାରାଷ୍ଟ୍ର ସରକାରର ପ୍ରତିନିଧିମାନେ ମଧ୍ୟ ଏହି ଟାସ୍କ ଫୋର୍ସରେ ରହିବେ। ଏହା ସହ ଭାରତର ମୋଟରସ୍ପୋର୍ଟ୍ସ ସଂଗଠନ ଓ ରେସିଂ ସର୍କିଟ୍ଗୁଡ଼ିକୁ ମଧ୍ୟ ପ୍ରତିନିଧିତ୍ୱ ମିଳିବ।

Federation of Motor Sports Clubs of India (FMSCI), Buddh International Circuit (BIC) ଏବଂ Madras International Circuit (MIC)ର ପ୍ରତିନିଧି ଏହି କମିଟିରେ ରହିବେ। FMSCI ଏକ ଟେକ୍ନିକାଲ୍ ଏକ୍ସପର୍ଟଙ୍କୁ ମଧ୍ୟ ନାମିତ କରିବ।

କ'ଣ ରହିବ ଟାସ୍କ ଫୋର୍ସର ଦାୟିତ୍ୱ?

କ୍ରୀଡ଼ାମନ୍ତ୍ରୀଙ୍କ ଅନୁସାରେ, ଟାସ୍କ ଫୋର୍ସର ମୁଖ୍ୟ ଉଦ୍ଦେଶ୍ୟ ହେଉଛି ଭାରତରେ ମୋଟରସ୍ପୋର୍ଟ୍ସର ସ୍ଥାୟୀ ବିକାଶ ପାଇଁ ଉପାୟ ଖୋଜିବା ଏବଂ Formula 1କୁ ପୁଣି ଭାରତକୁ ଆଣିବା ପାଇଁ ଏକ ସମନ୍ୱିତ ରୋଡମ୍ୟାପ୍ ପ୍ରସ୍ତୁତ କରିବା।

ଟିକସ ସମ୍ପର୍କିତ ସମସ୍ୟା, ମୋଟରସ୍ପୋର୍ଟ୍ସ ସାମ୍ନା କରୁଥିବା ବିଭିନ୍ନ ଚ୍ୟାଲେଞ୍ଜ ଏବଂ ଆବଶ୍ୟକ ନୀତିଗତ ପରିବର୍ତ୍ତନ ଉପରେ କମିଟି ଅଧ୍ୟୟନ କରିବ।

ଏହା ସହ ଭାରତରେ ବଡ଼ ମୋଟରସ୍ପୋର୍ଟ୍ସ ଇଭେଣ୍ଟ ଆୟୋଜନର ଆନ୍ତର୍ଜାତୀୟ, ଆର୍ଥିକ, ପର୍ଯ୍ୟଟନ ଓ ନିବେଶ ଲାଭ ମଧ୍ୟ ଯାଞ୍ଚ କରାଯିବ। ଭିତ୍ତିଭୂମି ଓ ଅପରେସନାଲ୍ ଆବଶ୍ୟକତା ମଧ୍ୟ ମୂଲ୍ୟାଙ୍କନ ହେବ।

ଏହା ବ୍ୟତୀତ ମୋଟରସ୍ପୋର୍ଟ୍ସ ପାଇଁ ଏକ ବ୍ୟାପକ ନୀତି ଏବଂ Public-Private Partnership (PPP) ମଡେଲ୍ର ସମ୍ଭାବନା ଉପରେ ମଧ୍ୟ ସୁପାରିସ୍ କରିବ କମିଟି।

୨୦୧୩ରେ ହୋଇଥିଲା ଶେଷ F1 ରେସ୍

ଭାରତ ଶେଷଥର ୨୦୧୩ରେ Greater Noidaର Buddh International Circuitରେ Formula 1 ରେସ୍ ଆୟୋଜନ କରିଥିଲା। ୨୦୧୧ରୁ ୨୦୧୩ ପର୍ଯ୍ୟନ୍ତ ଏଠାରେ Indian Grand Prix ଆୟୋଜିତ ହୋଇଥିଲା।

କିନ୍ତୁ ପ୍ରଶାସନିକ ଓ ଟିକସ ସମ୍ପର୍କିତ ସମସ୍ୟା କାରଣରୁ ଭାରତୀୟ Grand Prix ପରବର୍ତ୍ତୀ Formula 1 କ୍ୟାଲେଣ୍ଡରରୁ ବାଦ ପଡ଼ିଥିଲା।

ଏବେ ନୂଆ ଟାସ୍କ ଫୋର୍ସ ସେହି ପୁରୁଣା ସମସ୍ୟାଗୁଡ଼ିକର ସମାଧାନ ସମ୍ଭବ କି ନାହିଁ, ତାହା ଯାଞ୍ଚ କରିବ। ଯଦି ଆବଶ୍ୟକ ନୀତି, ଭିତ୍ତିଭୂମି ଓ ଆର୍ଥିକ ଢାଞ୍ଚା ପ୍ରସ୍ତୁତ ହୋଇପାରେ, ତେବେ ୨୦୨୮ରେ ଭାରତକୁ Formula 1 ଫେରିବାର ରାସ୍ତା ଖୋଲିପାରେ।