ଜଗତସିଂହପୁର ଜିଲ୍ଲାର ନାଉଗାଁ ବ୍ଲକ ଅଧୀନ ରୋହିଆ ହାଇସ୍କୁଲରେ ପୁରୁଣା ଆଜବେଷ୍ଟସ୍ ସିଟ୍ ଓ କାଠ ବିକ୍ରିକୁ ନେଇ ଅନିୟମିତତା ଅଭିଯୋଗ ସାମ୍ନାକୁ ଆସିଛି। ସ୍କୁଲର ପୂର୍ବତନ ଛାତ୍ରଛାତ୍ରୀମାନେ ପ୍ରଧାନ ଶିକ୍ଷୟିତ୍ରୀଙ୍କ ବିରୋଧରେ ନିଲାମ ପ୍ରକ୍ରିୟା ନଅନୁସରି କମ୍ ଦାମରେ ସାମଗ୍ରୀ ବିକ୍ରି କରିଥିବାର ଅଭିଯୋଗ ଆଣିଛନ୍ତି।

ଅଭିଯୋଗ ଅନୁଯାୟୀ, ସ୍କୁଲର ପୁରୁଣା ଆଜବେଷ୍ଟସ୍ ଛାତ ଥିବା ଏକ କୋଠରୀକୁ ଭାଙ୍ଗି ତାହାର ସିଟ୍ ଓ କାଠକୁ ନିଲାମ ବିନା ବିକ୍ରି କରାଯାଉଥିଲା। ଏହାକୁ ପୂର୍ବତନ ଛାତ୍ରମାନେ ବିରୋଧ କରି ବ୍ଲକ ଶିକ୍ଷା ଅଧିକାରୀ (BEO) ଓ ଜିଲ୍ଲାପାଳଙ୍କୁ ଅବଗତ କରାଇଥିଲେ।

ସ୍ଥାନୀୟ ବାସିନ୍ଦା ଅଜିତ ମହାନ୍ତିଙ୍କ କହିବା ଅନୁସାରେ, ପ୍ରଧାନ ଶିକ୍ଷୟିତ୍ରୀ ସଂଯୁକ୍ତା ମହାନ୍ତି ନିୟମ ବିରୋଧରେ କୋଠରୀ ଭାଙ୍ଗି ଆଜବେଷ୍ଟସ୍ ସିଟ୍ ଓ କାଠ ବିକ୍ରି କରୁଥିଲେ। ଅଭିଯୋଗ ପରେ ଘଟଣାର ତଦନ୍ତ କରାଯାଇଥିବା ବେଳେ ସେମାନେ ମଧ୍ୟ ତଦନ୍ତ ସମୟରେ ଉପସ୍ଥିତ ଥିଲେ।

ଏହାସହ ପୂର୍ବତନ ଛାତ୍ରମାନେ ସ୍କୁଲର ମଧ୍ୟାହ୍ନ ଭୋଜନ (MDM) ଯୋଜନାରେ ମଧ୍ୟ ଅନିୟମିତତା ହୋଇଥିବା ଅଭିଯୋଗ କରି ଜିଲ୍ଲା ଶିକ୍ଷା ଅଧିକାରୀଙ୍କ ନିକଟରେ ଲିଖିତ ଅଭିଯୋଗ ଦାଖଲ କରିଛନ୍ତି।

ଏହି ଘଟଣାରେ ଜଗତସିଂହପୁର ଜିଲ୍ଲା ଶିକ୍ଷା ଅଧିକାରୀ କେଶବ ମେହେର କହିଛନ୍ତି ଯେ, ଅଭିଯୋଗ ପାଇବା ପରେ ତଦନ୍ତ କରାଯାଇଥିଲା। ତଦନ୍ତ ରିପୋର୍ଟ ମିଳିସାରିଛି ଏବଂ ପରବର୍ତ୍ତୀ କାର୍ଯ୍ୟାନୁଷ୍ଠାନ ପାଇଁ ସ୍କୁଲ ଓ ଗଣଶିକ୍ଷା ବିଭାଗକୁ ପଠାଯାଇଛି। ତଦନ୍ତ ରିପୋର୍ଟ ଆଧାରରେ ଉପଯୁକ୍ତ ପଦକ୍ଷେପ ନିଆଯିବ ବୋଲି ସେ କହିଛନ୍ତି।

ତେବେ ଏହି ଘଟଣାରେ ପ୍ରଧାନ ଶିକ୍ଷୟିତ୍ରୀଙ୍କ ପ୍ରତିକ୍ରିୟା ମିଳିପାରିନଥିଲା।