ଫୁଟବଲ୍ ବିଶ୍ୱର ସବୁଠାରୁ ବଡ଼ କ୍ରୀଡ଼ା ମହୋତ୍ସବ ଫିଫା ବିଶ୍ୱକପ୍ ପୁଣିଥରେ ଚର୍ଚ୍ଚାରେ ରହିଛି। କେବଳ ଟ୍ରଫି ନୁହେଁ, ଏହାକୁ ବହନ କରିବା ପାଇଁ ପ୍ରସ୍ତୁତ ହୋଇଥିବା ସ୍ୱତନ୍ତ୍ର ଟ୍ରଙ୍କ୍ ମଧ୍ୟ ସମସ୍ତଙ୍କ ଆକର୍ଷଣର କେନ୍ଦ୍ରବିନ୍ଦୁ ପାଲଟିଛି।

ଫିଫା ବିଶ୍ୱକପ୍ ଟ୍ରଫିକୁ ନ୍ୟୁୟର୍କର ନ୍ୟୁଜର୍ସି ଷ୍ଟାଡିୟମ୍‌ରେ ହେବାକୁ ଥିବା ଫାଇନାଲ୍ ପାଇଁ ଫ୍ରାନ୍ସର ପ୍ରସିଦ୍ଧ ଲକ୍ଜରି ଫ୍ୟାଶନ୍ ବ୍ରାଣ୍ଡ Louis Vuitton ନିର୍ମିତ ଏକ ବିଶେଷ ଟ୍ରଙ୍କ୍‌ରେ ନିଆଯିବ।

ଏହି ଟ୍ରଙ୍କ୍‌କୁ ଅତ୍ୟନ୍ତ କଳାତ୍ମକ ଓ ଆକର୍ଷଣୀୟ ଭାବେ ଡିଜାଇନ୍ କରାଯାଇଛି। ସାମ୍ନା ଭାଗରେ ସୁନାର ଇଂରାଜୀ ଅକ୍ଷର 'V' ରହିଛି, ଯାହା Victory (ବିଜୟ) ଏବଂ Vuitton – ଉଭୟକୁ ସୂଚାଇଥାଏ। ଏହା ସହ ବ୍ରାଣ୍ଡର ପ୍ରସିଦ୍ଧ ମୋନୋଗ୍ରାମ୍ ପ୍ୟାଟର୍ନ ମଧ୍ୟ ବ୍ୟବହାର କରାଯାଇଛି।

ଟ୍ରଙ୍କ୍‌ର କୋଣଗୁଡ଼ିକୁ ସୁନା ପ୍ଲେଟେଡ୍ ପିତଳରେ ସୁରକ୍ଷିତ କରାଯାଇଥିବାବେଳେ ଭିତର ଭାଗରେ ବେଜ୍ ରଙ୍ଗର ପ୍ରିମିୟମ୍ ଚମଡ଼ା ବ୍ୟବହାର କରାଯାଇଛି। ଏଥିରେ Louis Vuitton ଓ FIFAର ସହଭାଗିତାକୁ ଦର୍ଶାଉଥିବା ଏକ ସ୍ୱତନ୍ତ୍ର ପ୍ୟାଚ୍ ମଧ୍ୟ ରହିଛି।

ଏହା କ୍ରମାଗତ ପଞ୍ଚମ ଥର ପାଇଁ Louis Vuitton ଦ୍ୱାରା ଫିଫା ବିଶ୍ୱକପ୍ ଟ୍ରଫି ପାଇଁ ଟ୍ରଙ୍କ୍ ତିଆରି କରାଯାଇଛି। ଏହାପୂର୍ବରୁ ୨୦୦୪, ୨୦୧୦, ୨୦୧୮ ଏବଂ ୨୦୨୨ ବିଶ୍ୱକପ୍ ପାଇଁ ମଧ୍ୟ ଏହି କମ୍ପାନି ସ୍ୱତନ୍ତ୍ର ଟ୍ରଙ୍କ୍ ନିର୍ମାଣ କରିଥିଲା।

ସୂଚନାଯୋଗ୍ୟ, ଫିଫା ବିଶ୍ୱକପ୍‌ର ପ୍ରକୃତ ଟ୍ରଫି ସ୍ୱିଜରଲ୍ୟାଣ୍ଡର ଜୁରିକ୍‌ ସ୍ଥିତ ଫିଫା ସଂଗ୍ରହାଳୟରେ ସୁରକ୍ଷିତ ଭାବେ ରଖାଯାଇଥାଏ। ବିଶ୍ୱକପ୍ ସମୟରେ ଏହି ମୂଲ୍ୟବାନ ଟ୍ରଫିକୁ ସୁରକ୍ଷିତ ପରିବହନ କରିବା ପାଇଁ ଏପରି ବିଶେଷ ଟ୍ରଙ୍କ୍ ବ୍ୟବହାର କରାଯାଏ। କଳାତ୍ମକ ଡିଜାଇନ୍ ଓ ସୁରକ୍ଷାର ଅନନ୍ୟ ସମନ୍ୱୟ ପାଇଁ Louis Vuittonର ଏହି ପରମ୍ପରା କ୍ରୀଡ଼ା ଜଗତରେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଛି।