ଜାପାନର ସର୍ବୋଚ୍ଚ ପର୍ବତ ମାଉଣ୍ଟ ଫୁଜି ଚଢ଼ୁଥିବା ବେଳେ ନିଜ ୭ ବର୍ଷର ପୁଅକୁ ଏକା ଛାଡ଼ି ଆଗକୁ ବଢ଼ିଯାଇଥିବା ଜଣେ ବାପାଙ୍କୁ ପୁଲିସ ତାଗିଦ କରିଛି। ସ୍ଥାନୀୟ ଗଣମାଧ୍ୟମ ଅନୁସାରେ, ବାପା ନିଜ ପୁଅକୁ କେବଳ ଏକ ସଫ୍ଟ ଡ୍ରିଙ୍କ୍ ଓ କିଛି ସ୍ନାକ୍ସ ଦେଇ ପର୍ବତରେ ଛାଡ଼ି ଆଗକୁ ଚାଲିଯାଇଥିଲେ।

ଘଟଣାଟି ଫୁଜି ପର୍ବତର ଏକ ହାଇକିଂ ରୁଟ୍‌ରେ ଘଟିଛି। ପ୍ରାୟ ୨,୦୦୦ ମିଟରରୁ ଅଧିକ ଉଚ୍ଚତାରେ ଘନ କୁହୁଡ଼ି ଓ ବର୍ଷା ମଧ୍ୟରେ ଜଣେ ୭ ବର୍ଷର ଶିଶୁ ବେଞ୍ଚ ଉପରେ ଏକା ବସିଥିବା ଦେଖିବାକୁ ମିଳିଥିଲା।

ରିପୋର୍ଟ ଅନୁସାରେ, ଶିଶୁଟି ଥକିଯିବାରୁ ତାଙ୍କ ୪୮ ବର୍ଷୀୟ ବାପା ତାଙ୍କୁ ‘ଏଠାରେ ଅପେକ୍ଷା କର’ ବୋଲି କହିଥିଲେ। ଏହା ପରେ ସେ ବଡ଼ ପୁଅଙ୍କ ସହ ପର୍ବତ ଚଢ଼ା ଜାରି ରଖିଥିଲେ।

ଫୁଜି ପର୍ବତର ଷଷ୍ଠ ଷ୍ଟେସନ୍ ନିକଟରେ ଥିବା ଏକ ମାଉଣ୍ଟେନ୍ ହଟ୍‌ର କର୍ମଚାରୀମାନେ ପିଲାଟିକୁ ଏକା ଦେଖିବା ପରେ ପୁଲିସକୁ ଖବର ଦେଇଥିଲେ। ପରେ ପୁଲିସ ତାଙ୍କ ବାପାଙ୍କୁ ପର୍ବତର ଅଷ୍ଟମ ଷ୍ଟେସନ୍ ନିକଟରେ ଠାବ କରିଥିଲା। ଷଷ୍ଠ ଷ୍ଟେସନ୍‌ଠାରୁ ଏହି ସ୍ଥାନ ପହଞ୍ଚିବାକୁ ପ୍ରାୟ ୩ ଘଣ୍ଟା ସମୟ ଲାଗେ ବୋଲି କୁହାଯାଇଛି।

ଗୁରୁବାର ସକାଳ ପ୍ରାୟ ୭ଟା ୩୦ରେ ପିଲାଟି ଏକା ଥିବା ଜଣାପଡ଼ିଥିଲା। ବାପା ତଳକୁ ଫେରି ନିଜ ପୁଅ ସହ ମିଶିବା ପରେ ପୁଲିସ ତାଙ୍କୁ କଡ଼ା ତାଗିଦ କରିଥିଲା।

ପୁଲିସ ତାଙ୍କୁ କହିଥିଲା ଯେ, ପରିବାର ସହ ଏକାଠି ପର୍ବତ ଚଢ଼ିବା ଯଦି ସମ୍ଭବ ନୁହେଁ, ତେବେ ପର୍ବତ ଚଢ଼ା ଛାଡ଼ିଦେବା ଉଚିତ୍; କିନ୍ତୁ ଜଣେ ଶିଶୁକୁ ଏକା ଛାଡ଼ିବା ଗ୍ରହଣୀୟ ନୁହେଁ। ବାପା ନିଜ ନିଷ୍ପତ୍ତି ପାଇଁ କ୍ଷମା ମାଗିବା ସହ ଏହାକୁ ଏକ ‘ଅବିବେକୀ ନିଷ୍ପତ୍ତି’ ବୋଲି ସ୍ୱୀକାର କରିଥିବା ଜଣାପଡ଼ିଛି।

ପରିବାରଟି ଫୁଜି ପର୍ବତର Fujinomiya Route ଦେଇ ଚଢ଼ୁଥିଲା। ଏହି ରୁଟ୍‌ର ପଞ୍ଚମ ଷ୍ଟେସନ୍ ପର୍ଯ୍ୟନ୍ତ ସାଧାରଣ ପରିବହନରେ ଯାଇହୁଏ। ସେଠାରୁ ଶିଖରରେ ପହଞ୍ଚିବାକୁ ପ୍ରାୟ ୫ ଘଣ୍ଟା ଏବଂ ଫେରିବାକୁ ଆଉ ୩ ଘଣ୍ଟା ଲାଗିପାରେ।

୩,୭୭୬ ମିଟର ଉଚ୍ଚ ମାଉଣ୍ଟ ଫୁଜି ଜାପାନର ଏକ ସକ୍ରିୟ ଆଗ୍ନେୟଗିରି। ୨୦୧୩ରେ ଏହାକୁ ୟୁନେସ୍କୋ ବିଶ୍ୱ ଐତିହ୍ୟ ମାନ୍ୟତା ମିଳିଥିଲା। ପ୍ରତିବର୍ଷ ପ୍ରାୟ ୨ ଲକ୍ଷ ଲୋକ ଏହି ପର୍ବତ ଚଢ଼ନ୍ତି। ଭିଡ଼ ନିୟନ୍ତ୍ରଣ ପାଇଁ କିଛି ରୁଟ୍‌ରେ ଦୈନିକ ଆରୋହଣ ସୀମା ମଧ୍ୟ ରହିଛି।

ଫୁଜି ପର୍ବତରେ ନିକଟ ଅତୀତରେ ଅନେକ ଉଦ୍ଧାର ଘଟଣା ଘଟିଛି। ଜୁଲାଇରେ ଜଣେ ୯୯ ବର୍ଷୀୟ ମହିଳା ପର୍ବତ ଚଢ଼ୁଥିବା ବେଳେ ପଡ଼ିଯାଇ ଆହତ ହେବା ପରେ ଉଦ୍ଧାର ହୋଇଥିଲେ। ଗତ ବର୍ଷ ଜଣେ ୨୭ ବର୍ଷୀୟ ଛାତ୍ର ନିଜ ହଜିଯାଇଥିବା ମୋବାଇଲ୍ ଖୋଜିବାକୁ ପୁଣି ପର୍ବତ ଉପରକୁ ଯିବା ପରେ ଚାରି ଦିନ ମଧ୍ୟରେ ଦୁଇଥର ଉଦ୍ଧାର ହୋଇଥିଲେ।