ନଭି ମୁମ୍ବାଇର ଏକ ଗୋଦାମରୁ ଏକ୍ସପାୟରି ଓ ନିକଟ-ଏକ୍ସପାୟରି ଖାଦ୍ୟ ସାମଗ୍ରୀର ତାରିଖ ଏବଂ ଲେବଲ୍ ବଦଳାଯାଉଥିବା ଘଟଣା ସାମ୍ନାକୁ ଆସିଛି। ମହାରାଷ୍ଟ୍ର ଖାଦ୍ୟ ସୁରକ୍ଷା ଅଧିକାରୀମାନେ ଛଅ ଦିନ ଧରି ତଦନ୍ତ କରି ଏହି ଗୋଦାମରୁ ପ୍ରାୟ ୮୦ ହଜାର ଡଲାର ମୂଲ୍ୟର ସାମଗ୍ରୀ ଜବତ କରିଛନ୍ତି।

ଗୋଦାମଟି ନଭି ମୁମ୍ବାଇର ଏକ ଶିଳ୍ପାଞ୍ଚଳରେ ରହିଛି ଏବଂ ଏହାକୁ ବେସରକାରୀ ସଂସ୍ଥାସାଧନା ଏଣ୍ଟରପ୍ରାଇଜେସ୍ପରିଚାଳନା କରୁଥିଲା। ଏଠାରେ ପେପ୍ସିକୋ, ନେସ୍ଲେ, ୟୁନିଲିଭର ଏବଂ କୋକାକୋଲା ଭଳି ପ୍ରମୁଖ କମ୍ପାନୀର ଉତ୍ପାଦ ମିଳିଥିଲା।

ଅଧିକାରୀମାନେ ଏକ ରାସାୟନିକ ସଲଭେଣ୍ଟ ମଧ୍ୟ ଜବତ କରିଛନ୍ତି। ଏହି ରାସାୟନିକ ପଦାର୍ଥ ବ୍ୟବହାର କରି ପ୍ୟାକେଟ୍ରେ ଥିବା ପୁରୁଣା ଉତ୍ପାଦନ ଓ ଏକ୍ସପାୟରି ତାରିଖକୁ ହଟାଯାଉଥିବା ଅଧିକାରୀମାନେ ଅଭିଯୋଗ କରିଛନ୍ତି। ପରେ କମ୍ପ୍ୟୁଟରରେ ନୂଆ ତାରିଖ ଦିଆଯାଇ ମେସିନ୍ ମାଧ୍ୟମରେ ପ୍ୟାକେଟ୍ ଉପରେ ନୂଆ ସୂଚନା ପ୍ରିଣ୍ଟ କରାଯାଉଥିବା ପୁଲିସ୍ ମାମଲା ଦସ୍ତାବିଜରେ ଉଲ୍ଲେଖ ରହିଛି।

ନକଲି ନ୍ୟୁଟ୍ରିସନ୍ ଲେବଲ୍ ମଧ୍ୟ ଠାବ

ଏହି ଅନିୟମିତତା କେବଳ ଉତ୍ପାଦନ ଓ ଏକ୍ସପାୟରି ତାରିଖ ବଦଳରେ ସୀମିତ ନଥିଲା। ରଏଟର୍ସର ରିପୋର୍ଟ ଅନୁସାରେ ଗୋଦାମରୁ ଅନେକ ମ୍ୟାଗି କାର୍ଟନ୍ ମିଳିଥିଲା। ସେଥିରୁ ଗୋଟିଏ ନମୁନାରେ ମୂଳ ପ୍ୟାକେଜିଂ ଉପରେ ନକଲି ନ୍ୟୁଟ୍ରିସନ୍ ଲେବଲ୍ ଲଗାଯାଇଥିବା ଦେଖାଯାଇଥିଲା। ଏହି ଲେବଲ୍ରେ ଉତ୍ପାଦକୁ ବିଦେଶ ରପ୍ତାନି ପାଇଁ‘Product of India’ବୋଲି ଦର୍ଶାଯାଇଥିଲା।

ସେହିପରି, ପେପ୍ସିକୋର କୁରକୁରେ ପ୍ୟାକେଟ୍ରେ ଇଂରାଜୀ ଓ ଫ୍ରେଞ୍ଚ ଭାଷାରେ ନ୍ୟୁଟ୍ରିସନ୍ ଲେବଲ୍ ରହିଥିଲା। ଅଭିଯୋଗ ଅନୁସାରେ ବଦଳାଯାଇଥିବା ଲେବଲ୍ରେ ଉପାଦାନରେ ଥିବା ସିରିଏଲ୍ର ପରିମାଣ ୧୦ ପ୍ରତିଶତ କମ୍ ଦର୍ଶାଯାଇଥିଲା। କ୍ୟାଲୋରୀ ଓ ସର୍ଭିଂ ସାଇଜ୍ର ସୂଚନା ମଧ୍ୟ ବଦଳାଯାଇଥିବା ଅଧିକାରୀମାନେ ଜାଣିବାକୁ ପାଇଛନ୍ତି।

ଏହା ସହିତ, କିଛି ଉତ୍ପାଦରେ ଏପରି ଉତ୍ପାଦନ ତାରିଖ ମିଳିଥିଲା, ଯାହା ସେତେବେଳେ ଆସିବାକୁ ମଧ୍ୟ ବାକି ଥିଲା। ମହାରାଷ୍ଟ୍ର ଫୁଡ୍ ଆଣ୍ଡ ଡ୍ରଗ୍ ଆଡମିନିଷ୍ଟ୍ରେସନ୍ର ମୁଖ୍ୟ ତୁକାରାମ ମୁଣ୍ଢେ ରଏଟର୍ସକୁ କହିଛନ୍ତି ଯେ କିଛି ପ୍ୟାକେଟ୍ରେ୨ ଅକ୍ଟୋବର ୨୦୨୬ଉତ୍ପାଦନ ତାରିଖ ଛପାଯାଇଥିଲା।

ରପ୍ତାନି ପାଇଁ ହେଉଥିଲା ପ୍ରସ୍ତୁତି

ଅଧିକାରୀମାନଙ୍କ ଅନୁସାରେ ଗୋଦାମରେ ମିଳିଥିବା ସାମଗ୍ରୀ ବିଦେଶକୁ ରପ୍ତାନି ପାଇଁ ପ୍ରସ୍ତୁତ କରାଯାଉଥିଲା। ତେବେ ଏହି ସାମଗ୍ରୀ କେଉଁ ଦେଶକୁ ପଠାଯିବାର ଥିଲା, ତାହା ତୁରନ୍ତ ସ୍ପଷ୍ଟ ହୋଇନାହିଁ।

ପୁଲିସ୍ ମାମଲା ଦସ୍ତାବିଜ ଓ ରାଜ୍ୟର ଏକ ମିଡିଆ ରିଲିଜ୍ ଅନୁସାରେ, ସାଧନା ଏଣ୍ଟରପ୍ରାଇଜେସ୍ର ମାଲିକ ଅଧିକାରୀମାନଙ୍କୁ କହିଥିଲେ ଯେ ୧୯ଟି ଅପରିଚିତ ରପ୍ତାନିକାରୀଙ୍କ ପାଇଁ ଏହି କାର୍ଯ୍ୟ କରାଯାଉଥିଲା।

ତେବେ ଗୋଦାମରୁ ମିଳିଥିବା ପ୍ରମୁଖ ବ୍ରାଣ୍ଡର ଉତ୍ପାଦକାରୀ କମ୍ପାନୀଗୁଡ଼ିକ ବିରୋଧରେ ପୁଲିସ୍ ମାମଲାରେ କୌଣସି ଅଭିଯୋଗ ଆଣାଯାଇନାହିଁ।

ସପ୍ଲାଇ ଚେନ୍ରେ ଦାୟିତ୍ୱ ନିର୍ଦ୍ଧାରଣ ଦାବି

ମହାରାଷ୍ଟ୍ର ଫୁଡ୍ ଆଣ୍ଡ ଡ୍ରଗ୍ ଆଡମିନିଷ୍ଟ୍ରେସନ୍ର ମୁଖ୍ୟ ତୁକାରାମ ମୁଣ୍ଢେ ଏହି ଘଟଣାକୁ ଗୁରୁତର ବୋଲି କହିଛନ୍ତି। ତାଙ୍କ ଅନୁସାରେ ଏହା ଏକ ବ୍ୟବସ୍ଥିତ ପ୍ରକ୍ରିୟା ଭଳି ଲାଗୁଛି। ସେ ସମଗ୍ର ସପ୍ଲାଇ ଚେନ୍ରେ ଅଧିକ ଦାୟିତ୍ୱ ନିର୍ଦ୍ଧାରଣ ଆବଶ୍ୟକ ବୋଲି କହିଛନ୍ତି।

ରଏଟର୍ସକୁ ମୁଣ୍ଢେ କହିଛନ୍ତି ଯେ କମ୍ପାନୀମାନେ ନିଜର ବ୍ରାଣ୍ଡିଂ, ପ୍ୟାକେଜିଂ ଓ ଉତ୍ପାଦ ବିକ୍ରି ସମ୍ପର୍କିତ ନିୟମ ପାଳନ ହେଉଛି କି ନାହିଁ, ତାହା ନିଶ୍ଚିତ କରିବା ଦରକାର।

ମହାରାଷ୍ଟ୍ରରେ ଖାଦ୍ୟ ସୁରକ୍ଷା ଯାଞ୍ଚ କଡ଼ାକଡ଼ି ହେଉଥିବା ସମୟରେ ଏହି ଚଢ଼ାଉ ହୋଇଛି। ସାଧାରଣତଃ ଭାରତରେ ଖାଦ୍ୟ ସୁରକ୍ଷା ଯାଞ୍ଚରେ ଭେଜାଲ ଭଳି ମାମଲା ଉପରେ ଅଧିକ ଗୁରୁତ୍ୱ ଦିଆଯାଏ। କିନ୍ତୁ ଏହି ମାମଲାରେ ବିଦେଶକୁ ପଠାଯିବାକୁ ଥିବା ପ୍ୟାକେଜ୍ଡ ଖାଦ୍ୟ ସାମଗ୍ରୀର ସୂଚନା ହିଁ ବଦଳାଯାଉଥିବା ଅଭିଯୋଗ ସାମ୍ନାକୁ ଆସିଛି।