ମହାରାଷ୍ଟ୍ରର ଉପମୁଖ୍ୟମନ୍ତ୍ରୀ ଏକନାଥ ସିନ୍ଦେ ଲଣ୍ଡନ ଗସ୍ତରୁ ମୁମ୍ବାଇ ଫେରିବା ସମୟରେ ଏକ ଅଜବ ଘଟଣା ଘଟିଛି। ତାଙ୍କ iPhone ବ୍ରିଟିଶ୍ ଏୟାରୱେଜ୍ ବିମାନରେ ହିଁ ରହିଯାଇଥିଲା। ମୁମ୍ବାଇ ବିମାନବନ୍ଦରରେ ପହଞ୍ଚି ଘରକୁ ଯିବା ପରେ ତାଙ୍କ ଫୋନ୍ ନଥିବା ଜଣାପଡ଼ିଥିଲା।

ରିପୋର୍ଟ ଅନୁସାରେ, ବ୍ରିଟିଶ୍ ଏୟାରୱେଜ୍‌ର ବିମାନଟି ମୁମ୍ବାଇର ଛତ୍ରପତି ଶିବାଜୀ ମହାରାଜ ଅନ୍ତର୍ଜାତୀୟ ବିମାନବନ୍ଦରରେ ରାତି ପ୍ରାୟ ୨ଟାରେ ଅବତରଣ କରିଥିଲା। ଘରେ ପହଞ୍ଚିବା ପରେ ପ୍ରାୟ ୩ଟା ସମୟରେ ସିନ୍ଦେ ନିଜ ଫୋନ୍ ନଥିବା ଜାଣିଥିଲେ। ଏହାପରେ ତାଙ୍କ ଟିମ୍ ତୁରନ୍ତ ପୋଲିସକୁ ସୂଚନା ଦେଇଥିଲା।

ସୂଚନା ପାଇବା ପରେ ମୁମ୍ବାଇ ପୋଲିସ ବ୍ରିଟିଶ୍ ଏୟାରୱେଜ୍‌ର ସୁରକ୍ଷା କର୍ମଚାରୀଙ୍କ ସହ ଯୋଗାଯୋଗ କରିଥିଲା। ବିମାନ ଭିତରେ ଫୋନ୍‌ର ସନ୍ଧାନ ଆରମ୍ଭ ହୋଇଥିଲା। ପ୍ରାୟ ଏକ ଘଣ୍ଟାର ସର୍ଚ୍ଚ ପରେ ଫୋନ୍‌ଟି ବିମାନ ଭିତରୁ ମିଳିଥିଲା ଏବଂ ପରେ ଏହାକୁ ଏକନାଥ ସିନ୍ଦେଙ୍କୁ ଫେରାଇ ଦିଆଯାଇଥିଲା।

ରିପୋର୍ଟ ଅନୁସାରେ, ସିନ୍ଦେ ଲଣ୍ଡନରେ ପ୍ରାୟ ଏକ ସପ୍ତାହ ରହିଥିଲେ। ସେପ୍ଟେମ୍ବର ୫ରେ ସେ ନିଜ ସହଯୋଗୀମାନଙ୍କ ସହ ଲଣ୍ଡନ ଯାତ୍ରା କରିଥିଲେ। ଏହି ଗସ୍ତ ସମୟରେ ସେ ବିଭିନ୍ନ କାର୍ଯ୍ୟକ୍ରମରେ ଯୋଗଦେବା ସହ କ୍ରିକେଟର ବିରାଟ କୋହଲିଙ୍କୁ ମଧ୍ୟ ଭେଟିଥିବା ରିପୋର୍ଟରେ କୁହାଯାଇଛି।

ଏହା ପ୍ରଥମ ଥର ନୁହେଁ ଯେ ଏକନାଥ ସିନ୍ଦେଙ୍କ ଫୋନ୍ ହଜିଛି। ସେ ମହାରାଷ୍ଟ୍ରର ମୁଖ୍ୟମନ୍ତ୍ରୀ ଥିବା ସମୟରେ ମଧ୍ୟ ତାଙ୍କ ଫୋନ୍ ହଜିଥିବା ଏବଂ ପରେ ଏହା ଉଦ୍ଧାର ହୋଇଥିବା ରିପୋର୍ଟରେ ଉଲ୍ଲେଖ ରହିଛି।