ଅନ୍ଧାର ଜୀବନରେ ଆତ୍ମବିଶ୍ୱାସର ଆଲୋକ ଜାଳିଛନ୍ତି ଜୟନ୍ତ ଭୋଇ। ଅନୁଗୋଳ ଜିଲ୍ଲା ଛେଣ୍ଡିପଦା ବ୍ଲକ୍ ଚାଙ୍ଗୁଡ଼ିଆ ପଞ୍ଚାୟତର ବଡ଼ବେରଣା ଗାଁର ଜୟନ୍ତ ପିଲାଦିନରୁ ଦୃଷ୍ଟିଶକ୍ତି ହରାଇଥିଲେ। ମୁଣ୍ଡବିନ୍ଧା ସମସ୍ୟା ପାଇଁ ପରିବାର ପକ୍ଷରୁ ଚେଙ୍କ ଚିକିତ୍ସା କରାଯାଇଥିବା ପରେ ତାଙ୍କ ଦୃଷ୍ଟିଶକ୍ତି ଚାଲିଯାଇଥିବା କୁହାଯାଏ।
କିନ୍ତୁ ଦୃଷ୍ଟିଶକ୍ତି ହରାଇବା ତାଙ୍କ ମନୋବଳକୁ ଭାଙ୍ଗିପାରିନାହିଁ। ଅନ୍ୟ ଉପରେ ନିର୍ଭର ନକରି ନିଜ ଦକ୍ଷତା ଓ ପରିଶ୍ରମରେ ପରିବାର ଚଳାଇବାକୁ ସେ ଉଦ୍ୟମ କରିଆସୁଛନ୍ତି।
ପରିବାରର ଆୟ ପାଇଁ ଜୟନ୍ତ ନିଜ ଚାଳଛପର ଘରେ ଏକ ମିନି ଧାନକଳ ବସାଇଛନ୍ତି। ଏହା ସହ ସାଇକେଲ୍ ମରାମତି କାମରେ ମଧ୍ୟ ତାଙ୍କର ଅଭିଜ୍ଞତା ରହିଛି। ନାମସଂକୀର୍ତ୍ତନ ସମୟରେ ବାଦ୍ୟଯନ୍ତ୍ର ବଜାଇବାରେ ମଧ୍ୟ ସେ ପାରଙ୍ଗମ।
ନିଜର ଶାରୀରିକ ଅସୁବିଧାକୁ ପଛରେ ପକାଇ ବିଭିନ୍ନ କାମ ମାଧ୍ୟମରେ ରୋଜଗାର କରିବା ତାଙ୍କ ସଂଘର୍ଷର ଉଦାହରଣ ପାଲଟିଛି।
ଜୟନ୍ତଙ୍କ ପରିବାରକୁ ମିଳୁଥିବା ସରକାରୀ ସହାୟତା ଭାବେ ମାସିକ ୩,୫୦୦ ଟଙ୍କା ଦିବ୍ୟାଙ୍ଗ ଭତ୍ତା ରହିଛି। ତେବେ ବର୍ତ୍ତମାନର ମହଙ୍ଗା ଦିନରେ ଏହି ଟଙ୍କାରେ ପରିବାରର ସମସ୍ତ ଖର୍ଚ୍ଚ ତୁଲାଇବା କଷ୍ଟକର ହେଉଛି।
ପିଲାଙ୍କ ପାଠପଢ଼ା, ଝିଅର ବିବାହ ଏବଂ ପୁଅକୁ ମେଡିକାଲ୍ରେ DMLT ପଢ଼ାଇବା ଭଳି ଦାୟିତ୍ୱ ମଧ୍ୟ ରହିଛି। ତେଣୁ ମିନି ଧାନକଳ ବ୍ୟବସାୟକୁ ଆହୁରି ବଢ଼ାଇବା ପାଇଁ ସେ ଋଣ ଆଶା କରୁଛନ୍ତି।
ଋଣ ପାଇଁ ବ୍ୟାଙ୍କ ଓ ସରକାରୀ କାର୍ଯ୍ୟାଳୟକୁ ବାରମ୍ବାର ଯାଇଥିଲେ ମଧ୍ୟ ଏପର୍ଯ୍ୟନ୍ତ ସଫଳ ହୋଇନଥିବାରୁ ନିରାଶ ହୋଇଛନ୍ତି ଜୟନ୍ତ।
ଜୟନ୍ତଙ୍କ ସଂଘର୍ଷ ଏବେ ଗାଁ ଲୋକଙ୍କ ପାଇଁ ମଧ୍ୟ ପ୍ରେରଣାର ବିଷୟ ହୋଇଛି। ତାଙ୍କ ପରିସ୍ଥିତିକୁ ବିଚାର କରି ଅନୁଗୋଳ ଜିଲ୍ଲା ପ୍ରଶାସନ ତୁରନ୍ତ ଘର ଓ ବ୍ୟବସାୟ ପାଇଁ ବ୍ୟାଙ୍କ ଋଣ ଯୋଗାଇଦେବା ଦିଗରେ ପଦକ୍ଷେପ ନେଉ ବୋଲି ଗାଁ ଲୋକେ ଦାବି କରିଛନ୍ତି।
ଜୟନ୍ତଙ୍କ କାହାଣୀ ଏକ କଥା ସ୍ପଷ୍ଟ କରେ—ଶାରୀରିକ ଅକ୍ଷମତା ମଣିଷର ସ୍ୱପ୍ନ ଓ ଆତ୍ମବିଶ୍ୱାସକୁ ଅଟକାଇ ପାରେ ନାହିଁ।
ବିହାରରେ ଲଗାଣ ବର୍ଷା ଓ ନଦୀଗୁଡ଼ିକର ଜଳସ୍ତର ବୃଦ୍ଧି ଯୋଗୁ...
ପଶ୍ଚିମବଙ୍ଗରେ ନିରାମିଷ ଓ ଆମିଷ ଖାଦ୍ୟକୁ ନେଇ ଚାଲିଥିବା ବ...
ନୂଆଦିଲ୍ଲୀରେ ଚାଲିଥିବା BRICS ଶିଖର ସମ୍ମିଳନୀ ମଧ୍ୟରେ ଭା...
ସାରା ବିଶ୍ୱରେ ଭୂ-ରାଜନୈତିକ ଅସ୍ଥିରତା ମଧ୍ୟରେ ଭାରତରେ ୧୮...
