ନୂଆଦିଲ୍ଲୀ: ଦିଲ୍ଲୀ ବିଶ୍ୱବିଦ୍ୟାଳୟରେ ପଢ଼ୁଥିବା ଛାତ୍ରଛାତ୍ରୀଙ୍କ ପାଇଁ ଆସିଛି ବଡ଼ ଖବର। ହଷ୍ଟେଲ୍‌ରେ ରହିବା ସୁବିଧା ବଢ଼ାଇବା ଲକ୍ଷ୍ୟରେ ବିଶ୍ୱବିଦ୍ୟାଳୟ ପକ୍ଷରୁ ୫,୮୮୯ କୋଟି ଟଙ୍କାର ଏକ ବଡ଼ ଯୋଜନାକୁ ଅନୁମୋଦନ କରାଯାଇଛି। ଏହାଦ୍ୱାରା ମୋଟ ୨୧,୮୯୫ ଛାତ୍ରଛାତ୍ରୀଙ୍କ ପାଇଁ ରହିବା ବ୍ୟବସ୍ଥା ହୋଇପାରିବ।

ଅକ୍ଟୋବର ୧୩, ୨୦୨୬ରେ ଅନୁଷ୍ଠିତ ବିଶ୍ୱବିଦ୍ୟାଳୟର ୧,୨୮୪ତମ କାର୍ଯ୍ୟକାରୀ ପରିଷଦ ବୈଠକରେ କୁଳପତି ପ୍ରଫେସର ଯୋଗେଶ ସିଂହଙ୍କ ଅଧ୍ୟକ୍ଷତାରେ ଏହି ପ୍ରସ୍ତାବକୁ ଅନୁମୋଦନ ମିଳିଥିଲା। ଭବିଷ୍ୟତର ଆବଶ୍ୟକତାକୁ ଧ୍ୟାନରେ ରଖି ହଷ୍ଟେଲ୍‌ଗୁଡ଼ିକର ଡିଜାଇନ୍ ପ୍ରସ୍ତୁତ କରାଯାଇଛି ବୋଲି କୁଳପତି କହିଛନ୍ତି।

​​​​​​​ଆହୁରି ପଢନ୍ତୁ:ଭୁବନେଶ୍ୱର ଘାଟିକିଆରେ ବଜରଙ୍ଗୀ ଖେଳପଡ଼ିଆ ଉଦ୍‌ଘାଟିତ, ଫୁଟବଲ୍ କିକ୍ ମାରି ଖେଳାଳିଙ୍କୁ ଉତ୍ସାହିତ କଲେ ମୁଖ୍ୟମନ୍ତ୍ରୀ

ନୂଆ ହଷ୍ଟେଲ୍ ପାଇଁ ୪,୦୨୭ କୋଟି

ଅନୁମୋଦିତ ଯୋଜନା ଅନୁଯାୟୀ, ନୂଆ ହଷ୍ଟେଲ୍ ନିର୍ମାଣ ପାଇଁ ପ୍ରାୟ ୪,୦୨୭ କୋଟି ଟଙ୍କା ଖର୍ଚ୍ଚ ହେବ। ଏଥିରେ ୧୫,୭୫୮ ଛାତ୍ରଛାତ୍ରୀଙ୍କ ରହିବା ବ୍ୟବସ୍ଥା ରହିବ। ଅନ୍ୟପଟେ, ଦୁଇଟି ପୁରୁଣା ହଷ୍ଟେଲ୍‌ର ପୁନଃବିକାଶ ପାଇଁ ପ୍ରାୟ ୧,୮୬୨ କୋଟି ଟଙ୍କା ଖର୍ଚ୍ଚ ହେବ। ଏହାଦ୍ୱାରା ଆଉ ୬,୧୩୭ ଛାତ୍ରଛାତ୍ରୀଙ୍କ ପାଇଁ ରହିବା ସୁବିଧା ସୃଷ୍ଟି ହେବ।

ବିଶ୍ୱବିଦ୍ୟାଳୟର ଜୁବିଲି ହଲ୍ ଏବଂ ପିଜି ମେନ୍ସ ହଷ୍ଟେଲ୍‌ର ପୁନଃବିକାଶ ପ୍ରସ୍ତାବକୁ ମଧ୍ୟ ଅନୁମୋଦନ ମିଳିଛି। ପୁନଃବିକାଶ ପରେ ମଧ୍ୟ ପୁରୁଣା ହଷ୍ଟେଲ୍‌ଗୁଡ଼ିକର ନାମ ଅପରିବର୍ତ୍ତିତ ରହିବ ବୋଲି କୁଳପତି ସ୍ପଷ୍ଟ କରିଛନ୍ତି। 

ତିନୋଟି କ୍ୟାମ୍ପସ୍‌ରେ ନିର୍ମାଣ ହେବ ବହୁତଳ ହଷ୍ଟେଲ୍

ଜମିର ସର୍ବୋତ୍ତମ ବ୍ୟବହାର ପାଇଁ ଢାକା କମ୍ପ୍ଲେକ୍ସ, ସୁରଜମଲ ବିହାରସ୍ଥିତ ଇଷ୍ଟ କ୍ୟାମ୍ପସ୍ ଏବଂ ନଜଫଗଡ଼ କ୍ୟାମ୍ପସ୍‌ରେ ବହୁତଳ ହଷ୍ଟେଲ୍ ନିର୍ମାଣ କରାଯିବ। ଏହାସହ ଦ୍ୱାରକାର ୱେଷ୍ଟ କ୍ୟାମ୍ପସ୍ ଏବଂ ରୋଶନପୁରାସ୍ଥିତ ବୀର ସାବରକର କଲେଜରେ ପୁରୁଷ ଓ ମହିଳା ଛାତ୍ରଛାତ୍ରୀଙ୍କ ପାଇଁ ପୃଥକ୍ ହଷ୍ଟେଲ୍ ନିର୍ମାଣ ଯୋଜନା ରହିଛି।

ନୂଆ ହଷ୍ଟେଲ୍‌ଗୁଡ଼ିକରେ ଭୋଜନାଳୟ, ଦୋକାନ, କମନ୍ ରୁମ୍, ପାଠାଗାର ଏବଂ ୱାର୍ଡେନ୍‌ଙ୍କ ରହିବା ପାଇଁ ବ୍ୟବସ୍ଥା ରହିବ। ଏହାଦ୍ୱାରା ଛାତ୍ରଛାତ୍ରୀଙ୍କ ଦୈନନ୍ଦିନ ଆବଶ୍ୟକତା କ୍ୟାମ୍ପସ୍ ମଧ୍ୟରେ ପୂରଣ କରିବା ସହଜ ହେବ। 

କଲେଜଗୁଡ଼ିକୁ ମଧ୍ୟ ହଷ୍ଟେଲ୍ ପ୍ରସ୍ତାବ ଦେବାକୁ ଆହ୍ୱାନ

ଦିଲ୍ଲୀ ବିଶ୍ୱବିଦ୍ୟାଳୟ ଅଧୀନରେ ଥିବା ସମସ୍ତ କଲେଜକୁ ନିଜ କ୍ୟାମ୍ପସ୍‌ରେ ନୂଆ ହଷ୍ଟେଲ୍ ନିର୍ମାଣ ପାଇଁ ପ୍ରସ୍ତାବ ପ୍ରସ୍ତୁତ କରି ଅର୍ଥ ଯୋଗାଣକାରୀ ସଂସ୍ଥାଗୁଡ଼ିକ ନିକଟରେ ଦାଖଲ କରିବାକୁ କୁହାଯାଇଛି।

ଏହି ପଦକ୍ଷେପ ଦ୍ୱାରା ଦିଲ୍ଲୀ ବିଶ୍ୱବିଦ୍ୟାଳୟରେ ରହିବା ସୁବିଧାର ଅଭାବ କମିବା ସହ ଦୂରଦୂରାନ୍ତରୁ ପଢ଼ିବାକୁ ଆସୁଥିବା ଛାତ୍ରଛାତ୍ରୀଙ୍କୁ ଅଧିକ ସୁବିଧା ମିଳିବା ଆଶା କରାଯାଉଛି।